ອີງຕາມການລາຍງານຂ່າວຂອງສຳນັກຂ່າວຕ່າງປະເທດໃນວັນທີ 3 ພະຈິກ ຜ່ານມາວ່າ ມີການສຳຫຼວດພົບຟອສຊິນເນື້ອເຍື່ອສະໝອງຂອງໄດໂນເສົາ ເປັນຄັ້ງທຳອິດຂອງໂລກ ໂດຍໄດ້ມີປະໂຫຍດຕໍ່ການວິໄຈເຖິງວິຖີຊີວິດຂອງສິ່ງທີ່ມີຊີວິດບູຮານຊະນິດນີ້ໄດ້ລະອຽດຍິ່ງຂຶ້ນ
ເຊິ່ງວ່າສິ້ນສ່ວນດັ່ງກ່າວ ຖືກນັກສຳຫຼວດຈາກຊັສເຊັກ ປະເທດອັງກິດ, ເຊິ່ງຄົ້ນພົບເມື່ອ 10 ກວ່າປີທີ່ແລ້ວ ກ່ອນຈະມີການເອົາມາເປີດເຜີຍເປັນຄັ້ງທຳອິດ ໂດຍເນື້ອເຍື່ອນີ້ ມີລັກສະນະທີ່ບໍ່ໃຫຍ່ຫຼາຍປານໃດ ແລະມີສີນໍ້າຕານ ເຊິ່ງໂຊກດີທີ່ມັນບໍ່ຍ່ອຍສະຫຼາຍໄປຕາມການເວລາ ກ່ອນຈະມີການຄົ້ນພົບໃນເວລາຕໍ່ມາ
ເດວິດ ນໍແມນ ນັກວິທະຍາສາດ ຈາກມະຫາວິທະຍາໄລເຄມບຣິດ ເຊື່ອວ່າສິ້ນສ່ວນສະໝອງນີ້ ເປັນຂອງໄດໂນເສົາກິນພືດພັນ ອິກົວໂນດອນ ເຊິ່ງເປັນໂຕໃຫຍ່ ແລະມີຊີວິດຢູ່ໃນຊ່ວງຕົ້ນຂອງ 133 ລ້ານປີທີ່ແລ້ວ ແນວໃດກໍຕາມເຖິງວ່າສະໝອງຂອງໄດໂນເສົາພັນນີ້ຈະໃຫຍ່ ແຕ່ພວກມັນກໍໄດ້ໃຊ້ງານສຳຫຼັບການປະມວນພຽງແຕ່ເຄິ່ງດຽວ, ສ່ວນອີກເຄິ່ງໜຶ່ງ ຈະເປັນຫຼອດເລືອດ ແລະມີລັກສະນະຄ້າຍຄືກັບໂຄງສ້າງຂອງສັດເລືອຄານໃນປັດຈຸບັນ
ນອກຈາກນີ້ການວິໄຈຍັງບອກວ່າ ເຖິງວ່າສະໝອງຂອງ ອິກົວໂນດອນ ຈະບໍ່ສະຫຼາດ ແລະຊັບຊ້ອນຄືກັບສັດໃນປັດຈຸບັນ ແຕ່ມັກກໍຖືເປັນສ່ວນໜຶ່ງໃນການວິວັດທະນາການໄປສູ່ສັດຫຼາຍໆຊະນິດ ເນື່ອງຈາກວ່າສະໝອງຂອງມັນ ມີໂຄງສ້າງຄືກັບນົກ ແລະແຂ້ ຫຼາຍທີ່ສຸດ