ລັດໄດ້ອອກຄຳສັ່ງ ແລະ ຈຳກັດການຫັນເອົາທີ່ດິນກະສິກຳໄປສູ່ເປົ້າໝາຍອື່ນ ໂດຍສະເພາະດິນນາໃນເຂດ

ຊົນລະປະທານທີ່ແຂວງຮັບຜິດຊອບ ເພື່ອເຮັດໃຫ້ການນຳໃຊ້ດິນນາຖືກຕ້ອງຕາມເປົ້າໝາຍ ແລະ ປ້ອງ

ກັນການໝູນໃຊ້ທີ່ດິນນາໄປປູກພືດແນວພັນອື່ນຢ່າງເຂັ້ມງວດ.

ທ່ານ ວິໄລວັນ ພົມເຂ ລັດຖະມົນຕີວ່າການກະຊວງກະສິກຳ ແລະ ປ່າໄມ້ ໄດ້ກ່າວຊີ້ແຈງຕໍ່ກອງປະຊຸມ

ສະພາບໍ່ດົນຜ່ານມານີ້ຮູ້ວ່າ: ຜ່ານມາໄດ້ສ້າງຕັ້ງກົມຄຸ້ມຄອງ ແລະ ພັດທະນາທີ່ດິນກະສິກຳ ຂຶ້ນໃນປີ

2012 ເພື່ອເປັນເສນາທິການໃຫ້ ກະຊວງກະສິກຳ – ປ່າໄມ້ ພ້ອມດຽວກັນ ນັ້ນກໍມີຕາໜ່າງທີ່ເປັນສາຍ

ຕັ້ງທາງວິຊາການພະແນກ – ຫ້ອງການກະສິກຳ – ປ່າໄມ້ແຂວງ ແລະ ເມືອງໃນທົ່ວປະເທດ ໂດຍມີພາລະ

ບົດບາດຄວາມຮັບຜິດຊອບຂອງແຕ່ລະຂັ້ນຢ່າງຈະແຈ້ງ, ເຮັດສຳເລັດການສຳຫຼວດ ພ້ອມໄດ້ວາງແຜນ

ນຳໃຊ້ທີ່ດິນກະສິກຳ ໃນຂອບເຂດທົ່ວປະເທດລະດັບແຂວງ ແລະ ເມືອງ.

ໂດຍປະຈຸບັນກຳລັງດຳເນີນການສຳຫຼວດວາງແຜນນຳໃຊ້ທີ່ດິນກະສິກຳ ຂັ້ນບ້ານໃນລະດັບມາດຕາສ່ວນ

1 ສ່ວນ  5.000 ສຳເລັດແລ້ວ ໃນຈຳນວນ 201 ບ້ານ ແລະ ຈະສືບຕໍ່ໃຫ້ສຳເລັດໃນຊຸມປີໜ້າ ເພື່ອເປັນບ່ອນ

ອີງຂອງການນຳໃຊ້ ທີ່ດິນກະສິກຳຢ່າງມີປະສິດທິພາບ ແລະ ປະສິດທິຜົນໄປພ້ອມໆກັບຈັດຕັ້ງດຳເນີນການ

ສຳຫຼວດ ເກັບກຳສະຖິຕິຕອນດິນກະສິກຳປະເພດຕ່າງໆລະດັບຄອບຄົວ ເພື່ອຂຶ້ນສຳມະໂນທີ່ດິນກະສິກຳ,

ທັງນີ້ ກໍເພື່ອໃຫ້ສາມາດຕິດຕາມການເຄື່ອນໄຫວການປ່ຽນແປງການນຳໃຊ້ທີ່ດິນ ກະສິກຳເປັນແຕ່ລະໄລຍະ

ໂດຍມອບໃຫ້ໜ່ວຍງານຄຸ້ມຄອງ ແລະ ພັດທະນາທີ່ດິນກະສິກຳຂັ້ນເມືອງສົມທົບກັບອຳນາດການປົກຄອງ

ບ້ານເປັນຜູ້ຈັດຕັ້ງປະຕິບັດ.

ພ້ອມກັນນັ້ນ ກໍໄດ້ມອບໝາຍໃຫ້ກົມວິຊາການ ເພື່ອກຳນົດພື້ນທີ່ຂອບເຂດ, ແຕ້ມແຜນວາດ, ປັກຫຼັກ

ໝາຍເຂດສະ ໜອງນ້ຳຊົນລະປະທານທີ່ມີແລ້ວ ແລະ ຮັບປະກັນທັງລະດູແລ້ງ-ຝົນໃຫ້ຊັດເຈນຄາດຄະເນ

ພື້ນທີ່ຈະຂະຫຍາຍໃນສະເພາະໜ້າ-ຍາວນານ ເພື່ອສະຫງວນ ແລະ ບໍ່ໃຫ້ມີການຫັນປ່ຽນໄປເປັນເປົ້າໝາຍ

ຢ່າງດັດຂາດ, ມີມາດຕະການເຂັ້ມງວດຕໍ່ຜູ້ລະເມີດ.

ສຳລັບພື້ນທີ່ດິນກະສິກຳທີ່ມີຈຸດພິເສດ ແລະ ເປັນເອກະລັກສະເພາະເປັນຕົ້ນແມ່ນການປູກກາເຟເຂດພູ

ພຽງບໍລະເວນ, ການປູກເຂົ້າໄກ່ນ້ອຍທີ່ແຂວງຫົວພັນ ແລະ ແຂວງຊຽງຂວາງ, ການລ້ຽງສັດໃຫຍ່ໃນເຂດພູ

ພຽງຊຽງຂວາງ ເປັນຕົ້ນແມ່ນຈະໄດ້ດຳເນີນການສຳຫຼວດຈັດສັນເປັນອັນລະອຽດກຳນົດຂອບເຂດ ສະຫງວນ

ພື້ນທີ່ດັ່ງກ່າວ ເພື່ອບໍ່ໃຫ້ມີການຫັນປ່ຽນໄປສູ່ເປົ້າໝາຍອື່ນຢ່າງເດັດຂາດ.

ທັງນີ້ ກໍຍັງຄົ້ນຄວ້ານຳສະເໜີ ແລະ ສ້າງນິຕິກຳຕ່າງໆເປັນຕົ້ນແມ່ນດຳລັດ, ຄຳສັ່ງຂອງນາຍົກລັດຖະມົນຕີ

ແລະ ຂໍ້ຕົກລົງ, ຄຳແນະນຳ ລະບຽບການຕ່າງໆຂັ້ນກະຊວງ; ພ້ອມດຽວກັນນັ້ນກໍເອົາໃຈໃສ່ຊຸກຍູ້ອົງການປົກ

ຄອງທ້ອງຖິ່ນເປັນເຈົ້າການ ແລະ ສ້າງນິຕິກຳອັນສະເພາະ ເພື່ອຄຸ້ມຄອງສະກັດກັ້ນບັນຫາທີ່ເກີດ ຂຶ້ນໃນທ້ອງ

ຖິ່ນຂອງຕົນ ໂດຍສະເພາະໃນໄລຍະຜ່ານມາໄດ້ສະເໜີໃຫ້ນາຍົກລັດຖະມົນຕີອອກຄຳສັ່ງ ສະບັບເລກ ທີ09/ນຍ

ລົງວັນທີ3 ມິຖຸນາ 2014 ວ່າ ດ້ວຍການຫ້າມຫັນປ່ຽນທີ່ດິນກະສິກຳ ເຂດຊົນລະປະທານປະຕູນ້ຳປ່ອງທີ 3 ຕາມ

ຄອງລະບາຍນ້ຳເຂື່ອນໄຟຟ້ານ້ຳ ຕົກນ້ຳເທີນ 2 ເມືອງຍົມມະລາດ ແຂວງ ຄຳມ່ວນ ຊຶ່ງໂຄງການນີ້ຈະກາຍເປັນ

ຕົວແບບໃຫ້ແກ່ໂຄງການຕ່າງໆທີ່ມີເງື່ອນໄຂ, ພ້ອມດຽວກັນລັດຖະບານ ກໍໄດ້ມີແຈ້ງການເລກທີ 830/ຫລບ.

ກສສ ລົງວັນທີ 24 ມິຖຸນາ 2014 ກ່ຽວ ກັບການເຊົ່າ ຫຼື ສຳປະທານດິນນາທີ່ມີລະບົບຊົນລະປະທານແລ້ວ ປະຊາ

ຊົນນຳໃຊ້ດິນສຳລັບການປູກກ້ວຍຂອງບໍລິສັດຈີນໃນເຂດພາກເໜືອ ເພື່ອແນະນຳໃຫ້ທ່ານເຈົ້າແຂວງອອກ

ຄຳສັ່ງບໍ່ອະນຸຍາດໃຫ້ນຳໃຊ້ດິນນາໃນເຂດຊົນລະປະທານໃຫ້ບໍລິສັດ – ບຸກຄົນເຊົ່າ ຫຼື ສຳປະທານປູກກ້ວຍຢ່າງ

ເດັດຂາດ.

ແນວໃດກໍດີ  ທ່ານ ວິໄລວັນ ພົມເຂ ກ່າວຕື່ມວ່າ: ການກຳນົດມາດຕະການ ທາງດ້ານນິຕິກຳຕ້ອງໄດ້ເອົາໃຈໃສ່

ຊຸກຍູ້ສົ່ງເສີມຊາວນາເຮັດການຜະລິດດ້ວຍ ການວາງນະໂຍບາຍທີ່ເໝາະສົມເພື່ອ ເປັນສິ່ງຈູງໃຈໃຫ້ຊາວນາເຮັດ

ການຜະລິດຕາມແຜນການນຳໃຊ້ທີ່ດິນທີ່ກຳນົດໃຫ້ ເພື່ອຫຼີກເວັ້ນແນວຄິດການຫັນດິນນາໄປສູ່ເປົ້າໝາຍອື່ນ,

ນອກນັ້ນ ຍັງໄດ້ປະສານງານກັບບັນດາຂະແໜງທີ່ກ່ຽວ ຂ້ອງເພື່ອພ້ອມກັນຄົ້ນຄວ້າ, ວາງແຜນ ຜັງ, ກຳນົດ

ເຂດທີ່ດິນປຸກສ້າງ ແລະ ທີ່ດິນກະສິກໍາຢ່າງຈະແຈ້ງ ໂດຍສະເພາະໃນເຂດຊານເມືອງ ແລະ ເທສະບານ ກໍຈະຕ້ອງ

ມີການປຶກສາຫາລືເປັນເອກະ ພາບໃນທາງປະຕິບັດຕາມພາລະບົດບາດ, ໜ້າທີ່ ແລະ ຄວາມຮັບຜິດຊອບຂອງຕົນ.

ແຫຼ່ງຂ່າວ: ໜັງສືພິມເສດຖະກິດ – ສັງຄົມ