ລາຍງານຈາກສຳນັກຂ່າວຕ່າງປະເທດ ໃນວັນທີ 10/10/2025 ທີ່ຜ່ານມາ ທ່ານ ໂດນັລ ທຣຳ ປະທານນາທິບໍດີ ສະຫະລັດອາເມລິກາ ໄດ້ອອກຄໍາສັ່ງ ຈະຮຽກເກັບພາສີນຳເຂົ້າສິນຄ້າຈາກຈີນ ເພີ່ມອີກ 100% ຈາກທີ່ປັດຈຸບັນສະຫະລັດເກັບພາສີສິນຄ້າຈີນຢູ່ທີ່ 30% ເຮັດໃຫ້ກຳແພງພາສີສິນຄ້າຈີນເພີ່ມຂຶ້ນເປັນ 130% ໂດຍເລີ່ມມີຜົນ ວັນທີ 1 ພະຈິກ 2025.
ຄຳສັ່ງຂອງ ໂດນັລ ທຣຳ ມີຂຶ້ນເພື່ອຕອບໂຕ້ມາດຕະການຈຳກັດການສົ່ງອອກແຮ່ຫາຍາກຂອງຈີນ ເຊິ່ງເປັນສ່ວນປະກອບສຳຄັນໃນສິນຄ້າອຸປະໂພກບໍລິໂພກ ແລະ ຜະລິດຕະພັນທາງການທະຫານຫຼາຍຊະນິດ ພ້ອມຂູ່ຈະຍົກເລີກກຳນົດການພົບປຶກສາຫາລືກັບ ທ່ານ ສີ ຈິ້ນຜິງ ປະທານາທິບໍດີຈີນ ໃນລະຫວ່າງກອງປະຊຸມຄວາມຮ່ວມມືທາງເສດຖະກິດອາຊີ-ປາຊີຟິກ ຫຼື APEC ທີ່ເກົາຫຼີໃຕ້ ໃນອີກ 2 ອາທິດຂ້າງໜ້າ.
ທ່ານ ທຣໍາ ໄດ້ອອກຄໍາສັ່ງດັ່ງກ່າວ, ຫຼັງຈາກທີ່ລັດຖະບານຈີນ ໄດ້ປະກາດຄຸມເຂັ້ມການສົ່ງອອກແຮ່ (Rare Earths) ເພື່ອປົກປ້ອງຜົນຂອງຊາດ ເຊິ່ງວ່າ ຈີນເປັນປະເທດທີ່ມີການຜະລິດແຮ່ Rare Earths ຫຼາຍທີ່ສຸດ ແລະ ວັດສະດຸສຳຄັນອື່ນໆ ເຊິ່ງເປັນສ່ວນປະກອບສຳຄັນສຳລັບການຜະລິດລົດຍົນ, ສະມາດໂຟນ ແລະ ສິນຄ້າອື່ນໆ ອີກຈຳນວນຫລາຍ.
ຫຼັງຈາກທີ່ທ່ານ ທຣຳ ປະກາດຂຶ້ນພາສີສິນຄ້າຈີນໃນຕົ້ນປີ ຈີນກໍ່ໄດ້ປະກາດຄວບຄຸມການສົ່ງອອກ ເຊິ່ງເຮັດໃຫ້ບໍລິສັດສະຫະລັດ ຫຼາຍແຫ່ງທີ່ຕ້ອງການເພິ່ງພາວັດສະດຸ ເກີດຄວາມບໍ່ພໍໃຈຫລາຍ ເຖິງຂະໜາດທີ່ບໍລິສັດຜະລິດລົດຍົນ Ford ຕ້ອງຢຸດຜະລິດຊົ່ວຄາວ.
ທີ່ຜ່ານມານັ້ນ ຜູ້ຊ່ຽວຊານທາງດ້ານການເງິນ ແລະ ນັກລົງທຶນທົ່ວໂລກຕ່າງສະແດງຄວາມກັງວົນຕໍ່ຄວາມເປັນໄປໄດ້ທີ່ຈະເກີດສົ່ງຄາມການຄ້າເຕັມຮູບແບບ ລະຫວ່າງ ສະຫະລັດ ກັບ ຈີນ ໂດຍພວກເຂົາເຕືອນວ່າການປະເຊີນໜ້າລະຫວ່າງສອງມະຫາອຳນາດນີ້ອາດສົ່ງຜົນກະທົບຕໍ່ຕະຫຼາດໂລກ ແລະ ເປັນຊະນວນໃຫ້ເກີດພາວະເສດຖະກິດທົດຖອຍໄດ້.
ແຫຼ່ງຂໍ້ມູນ: OFF Chainon