ນຳເຂົ້າເຄື່ອງຂ້າມຂົວລາວ-ໄທ I ງຽບເຫງົາຫຼັງເລີ່ມເກັບອາກອນ 10%

0
5852

ການເກັບອາກອນມູນຄ່າເພີ່ມ 10% ສຳລັບເຄື່ອງຕິດຕົວຜູ້ໂດຍສານໄດ້ເລືອກເອົາດ່ານຂົວມິດຕະພາບ ລາວ-ໄທ I ເປັນດ່ານທົດສອບຂອງການຈັດເກັບ ຊຶ່ງໄດ້ເລີ່ມຈັດຕັ້ງປະຕິບັດແລ້ວນັບແຕ່ວັນ 1 ພະຈິກ 2016 ເປັນຕົ້ນມາ ແຕ່ ຕາມການຕິດຕາມຂອງທີມຂ່າວເສດຖະ ກິດໃນວັນທີ 2 ບັນຍາກາດ ໂດຍລວມ ງຽບເຫງົາມີການເດີນທາງເຂົ້າ-ອອກປົກ ກະຕິ ແຕ່ບໍ່ປາກົດເຫັນການຂົນສົ່ງເຄື່ອງທີ່ຊື້ເຂົ້າມາຈຳນວນຫຼາຍຄືແຕ່ກ່ອນ.
ທ່ານ ສຸດໃຈ ອິນທະວົງ ຮອງຫົວໜ້າ ດ່ານພາສີສາກົນຂົວມິດຕະພາບ 1 ໄດ້ ໃຫ້ສຳພາດເມື່ອວັນທີ 2 ພະຈິກຜ່ານມາວ່າ: ຜ່ານການຈັດຕັ້ງປະຕິບັດວຽກງານ ການເກັບອາກອນ 10% ດ້ວຍການນຳ ໃຊ້ລະບົບເອເລັກໂຕຣນິກ SmartVat ຢູ່ດ່ານພາສີຂົວມິດຕະພາບ ລາວ-ໄທ I ໃນໄລຍະ 2 ວັນມານີ້ ເຫັນໄດ້ວ່າບັນດາ ພໍ່ແມ່ປະຊາຊົນຍັງບໍ່ທັນມີຄວາມເຂົ້າ ໃຈປານໃດກ່ຽວກັບວິທີການ ແລະຂັ້ນ ຕອນການປະຕິບັດ, ໂດຍວັນທີ 1 ພະຈິກ 2016 ເປັນມື້ທຳອິດຂອງການເລີ່ມຈັດ ເກັບລະບົບໃໝ່ ແລະມີລົດແຈ້ງອອກທັງ ໝົດຈຳນວນ 556 ຄັນ ແລະມີລົດມາ ແຈ້ງເສຍອາກອນຜ່ານລະບົບ 7 ຄັນ, ສ່ວນວັນທີ 2 ພະຈິກ ກໍມາລົດແຈ້ງອອກ ທັງໝົດ 637 ຄັນ ແລະມາຮອດເວລາ 16:30 ມີລົດມາແຈ້ງເສຍ ຈຳນວນ 7 ຄັນເຊັ່ນກັນ.

ຢ່າງໃດກໍຕາມ ຄຽງຄູ່ກັບການເລີ່ມ ປະຕິບັດການເກັບອາກອນ 10% ນີ້ປະຊາຊົນ ກໍຄືຜູ້ໂດຍສານແມ່ນມີຄວາມຕື່ນຕົວກັນຫຼາຍຂຶ້ນໃນການຈັບຈ່າຍໃຊ້ສອຍ ສັງເກດຈາກການຊື້ເຄື່ອງຕິດຕົວ ເມື່ອທຽບກັບໄລຍະຜ່ານມາ, ອັນນີ້ ກໍເນື່ອງມາຈາກການຍົກເວັ້ນອາກອນ 50 ໂດລາ ຫຼື 4 ແສນກີບນັ້ນ ສະເລ່ຍມູນຄ່າ ເຄື່ອງລວມທີ່ມີໃສ່ຈຳນວນຄົນທີ່ມີຢູ່ໃນລົດ, ດັ່ງນັ້ນ ການເສຍອາກອນມູນຄ່າເພີ່ມຂອງຜູ້ໂດຍສານແມ່ນຫຼຸດລົງຈາກການແຈ້ງເສຍປົກກະຕິຂອງໄລຍະຜ່ານມາ, ແນວໃດກໍດີ ເພື່ອເຮັດໃຫ້ປະຊາຊົນມີຄວາມເຂົ້າໃຈກ່ຽວກັບການນຳໃຊ້ລະບົບດັ່ງກ່າວນີ້ຫຼາຍຂຶ້ນ, ພວກເຮົາກໍຍັງ ຈະສືບຕໍ່ໂຄສະນາເຜີຍແຜ່ກ່ຽວກັບການ ນຳໃຊ້ລະບົບ SmartVat ນີ້ຕື່ມອີກ, ພ້ອມນັ້ນ ກໍຈະສືບຕໍ່ຈະຂະຫຍາຍຊ່ອງ ແລະລະບົບເກັບຕື່ມອີກ 2 ເລນ, ທັງນີ້ ກໍເພື່ອອຳນວຍຄວາມສະດວກໃຫ້ກັບ ພໍ່ແມ່ປະຊາຊົນ, ພໍ່ຄ້າຊາວຂາຍທີ່ເດີນ ທາງຜ່ານດ່ານແຫ່ງນີ້, ທ່ານ ສຸດໃຈ ກ່າວ.

ທ່ານ ອັດສະວິນ ເທບພະກັນ ວິຊາ ການພັດທະນາລະບົບ SmartVat ທະນາຄານການຄ້າຕ່າງປະເທດລາວມະ ຫາຊົນກ່າວວ່າ: ການຕິດຕັ້ງລະບົບການ ຈັດເກັບພາສີອາກອນ 10% ຢູ່ພາຍໃນ ດ່ານສາກົນນີ້ຖືວ່າສຳເລັດແລ້ວ 100%, ເປັນຕົ້ນອຸປະກອນຕ່າງໆທີ່ຮັບໃຊ້ວຽກ ງານດັ່ງກ່າວເຊັ່ນ: ເຄື່ອງກວດໃບແຈ້ງ ມູນຄ່າສິນຄ້າຈຳນວນ 10 ເຄື່ອງ, ເຄື່ອງຮັບເງິນຈຳນວນ 10 ເຄື່ອງ ແລະແຕ່ລະເຄື່ອງແມ່ນສາມາດສາກແບັດ ແລະເກັບໄຟໄດ້ ເພື່ອຮັບປະກັນບໍ່ໃຫ້ມີບັນຫາໃນ ເວລາເຮັດວຽກຕົວຈິງ, ພ້ອມກັນນັ້ນລະບົບດັ່ງກ່າວຍັງສາມາດຮັບຊຳລະການເກັບອາກອນຜ່ານລະບົບບັດ VISA, JCB, Master Cart, BCEL ATM-UnionPay, Smart Vat, Smart Tax ແລະBCEL One ຫຼື ທຸກລາຍ ການທີ່ຜູ້ໂດຍສານຮ່ວມໃຊ້ບໍລິການກັບ ທາງທະນາຄານ.

ທ່ານ ນາງ ນ້ອຍ ປະຊາຊົນ ຜູ້ໃຊ້ບໍລິ ການລະບົບສະມາດແວັດ Smartvat ກ່າວວ່າ: ໄລຍະຜ່ານມາກໍໄດ້ຂ້າມໄປຫຼິ້ນ ແລະຊື້ເຄື່ອງໃຊ້ຢູ່ປະເທດເພື່ອນບ້ານ ແຕ່ກໍບໍ່ເຄີຍໄດ້ມາແຈ້ງເສຍອາກອນຈັກ ເທື່ອເພາະຈະບໍ່ຄ່ອຍໄດ້ຊື້ຫຍັງ ເນື່ອງ ຈາກຢູ່ພາຍໃນ ຫຼື ຕະຫຼາດທົ່ວໄປໃນ ລາວເຮົາກໍມີຢູ່ແລ້ວ ແລະບາງຢ່າງກໍມີ ລາຄາຖືກກວ່າ, ແຕ່ເທື່ອນີ້ແມ່ນຖືເປັນ ຄັ້ງທຳອິດທີ່ໄດ້ຊື້ເຄື່ອງຫຼາຍ ຊຶ່ງກໍຕ້ອງ ໄດ້ມາແຈ້ງເສຍອາກອນ 10% ໃນລະບົບ ເອເລັກໂຕຣນິກທີ່ທັນສະໄໝ ແລະຜ່ານການຊຳລະຜ່ານລະບົບດັ່ງກ່າວກໍເຫັນ ວ່າຍັງມີຫຼາຍຢ່າງທີ່ຍັງບໍ່ທັນຮູ້ຈັກ ໂດຍສະເພາະຂັ້ນຕອນຕ່າງໆໃນການຊຳລະ ເນື່ອງຈາກເພິ່ນຫາກໍເລີ່ມປະຕິບັດ, ແຕ່ກໍ ຮູ້ມາແຕ່ດົນແລ້ວ ວ່າເພີ່ນຈະຫັນຈາກ ການເກັບລະບົບຈົດກ່າຍມານຳໃຊ້ລະບົບທັນສະໄໝແທນ, ຖືວ່າເປັນອີກລະບົບ ໜຶ່ງຈະຊ່ວຍອຳນວຍຄວາມສະດວກໃນ ການຈ່າຍອາກອນຂອງຜູ້ທີ່ຊື້ເຄື່ອງເກີນກຳນົດ ແລະຍັງຊ່ວຍໃຫ້ເຈົ້າໜ້າທີ່ເຮັດ ວຽກງ່າຍຂຶ້ນກວ່າເກົ່າ.

ຂ່າວ: ເສດຖະກິດ-ສັງຄົມ