ໂຮງແຮມ The President By Akaryn (ເດິ ເພຣັດຊິເດັນ ໂດຍ ອະຄະຣິນ) ເປັນໂຮງແຮມໜຶ່ງທີ່ກຳລັງກໍ່ສ້າງ ເຊິ່ງໃກ້ຈະເປີດໃຫ້ບໍລິການ ພາຍໃນຕົ້ນປີໜ້າ ເດືອນກຸມພາ 2017 ນີ້, ໂຮງແຮມດັ່ງກ່າວຕັ້ງຢູ່ດ້ານຫຼັງຂອງຫໍພະແກ້ວ, ທາງຂ້າງຕິດກັບຫໍຄຳ ແລະທາງໜ້າຕິດກັບສະຖານທີ່ທ່ອງທ່ຽວແຄມຂອງ ໂດຍແມ່ນ ໄດ້ຮັບປະທານສຳປະທານ ຈາກຫ້ອງການປະທານປະເທດ ໃນນາມກຸ່ມບໍລິສັດ ພອນສັກ ຈຳກັດ ເປັນເວລາ 30 ປີ ໂດຍເຈົ້າຂອງເປັນຄົນລາວ, ກຸ່ມບໍລິສັດ ພອນສັກ ຈໍາກັດ ໄດ້ມີການຮ່ວມມືກັບກຸ່ມ ໂຮງແຮມ ອະຄະຣິນ (Akaryn) ເຊິ່ງມີສໍານັກງານໃຫຍ່ຢູ່ບາງກອກປະເທດໄທ ແລະໄດ້ມອບໃຫ້ ກຸ່ມໂຮງແຮມ ອະຄະຣິນ ເປັນຜູ້ບໍລິການ ແລະຈັດຄຸ້ມຄອງໃຫ້ໂດຍກົງ ໂດຍທີ່ກຸ່ມບໍລິສັດ ພອນສັກ ຈຳກັດ ບໍ່ໄດ້ມາຫຍຸ້ງກ່ຽວຫຍັງນຳອີກ. ໂຮງແຮມດັ່ງກ່າວ ແມ່ນມີຄວາມຫຼູຫຼາ ໂດຍການອອກແບບສະຖາປານນິກທີ່ທັນສະໄໝຂອງວັດທະນະທຳລາວ ມີລະດັບ 5 ດາວ.

ໂຮງແຮມ The President By Akaryn ມີທັງໝົດ 32 ຫ້ອງ ເຊິ່ງເປັນຫ້ອງຊຸດ (suite) ທັງໝົດ, ໂດຍແຍກອອກເປັນຫ້ອງປະເພດ suite 2 ຫ້ອງ, Executive suite 6 ຫ້ອງ, Deluxe suite 16 ຫ້ອວ ແລະ Garden suite 8 ຫ້ອງ, ຮ້ານອາຫານລາວ, ຮ້ານອາຫານ All day dining, ຮ້ານກາເຟຂະໜົມປັງແບບຝຣັ່ງເສດ, ບາ Whisky/Cigar ແລະບາ Champapagne. ນອກຈາກນີ້, ຍັງມີບໍລິການສະປາທີ່ທັນສະໄໝ ທີ່ແຕກຕ່າງຈາກບ່ອນອື່ນໆ ເຊິ່ງສະປານີ້ ເອົາໃຈໃສ່ກ່ຽວກັບສຸຂະພາບຂອງລູກຄ້່າເປັນຫຼັກ, ມີຮ້ານເສີມຄວາມງາມ, ມີສູນອອກກຳລັງກາຍ, ຫ້ອງ Yoga/Pilates, ມີຮ້ານຂາຍເຄື່ອງທີ່ລະນຶກ, ມີຫ້ອງ Oxygen ສໍາລັບແຂກທີ່ຕ້ອງການມາໃຊ້ບໍລິການເຊັ່ນ: ມີອາການເຈັບຫົວ ເພາະມີອາການເມົາຄ້າງ ແລະອື່ນໆ ຖືໄດ້ວ່າໂຮງແຮມນີ້ມີຄວາມຫຼາກຫຼາຍໃນການໃຫ້ບໍລິການ ເມື່ອປຽບທຽບກັບໂຮງແຮມອື່ນໆ

ເອກະລັກຂອງໂຮງແຮມ The President By Akaryn ແມ່ນເປັນແບຣນຂອງໂຮງແຮມອັນດັບຕົ້ນໆ ທີ່ມາຈາກປະເທດໄທ ເຊິ່ງເປັນໂຮງແຮມທຳອິດທີ່ Akaryn ໄດ້ມາເປີດບໍລິການຢູ່ວຽງຈັນ, ໃນປັດຈຸບັນກໍາລັງຈະເປີດບໍລິການໄປສູ່ແຂວງຫຼວງພະບາງ ເຊິ່ງການບໍລິການຂອງ Akaryn ແມ່ນສາມາດເຊື່ອມຕໍ່ກັນກັບທຸກເຄືອຂ່າຍ ຖ້າຫາກລູກຄ້າຫາກຕ້ອງການທີ່ຈະໃຊ້ບໍລິການ ບໍ່ວ່າຈະຢູ່ສາຂາໃດກໍຕາມ

ສຳລັບແຂກທີ່ຈະເຂົ້າມາພັກແມ່ນ ແຂກລະດັບສູງຈາກຕ່າງປະເທດ, ກຸ່ມນັກທຸລະກິດຈາກພາກເອກະຊົນ, ນັກທ່ອງທ່ຽວ ແລະອື່ນໆ ທີ່ຈະເດີນທາງມາ ສປປ ລາວ, ໂຮງແຮມ  The President By Akaryn ເປັນທາງເລືອກທີ່ດີທີ່ສຸດ ສຳລັບການບໍລິການດ້ານອາຫານ ແລະເຄື່ອງດື່ມ, ລວມເຖິງການສະແດງ ແລະຄວາມບັນເທີງຕ່າງໆ ເຊິ່ງໄດ້ວ່າໄດ້ວາງແຜນ ທີ່ຈະເອົາວົງດົນຕີ ທີ່ຫຼາກຫຼາຍສີສັນເຂົ້າມາໃຫ້ບໍລິການເຊັ່ນ: ວົງດົນຕີຈາກປະເທດ Cuba, ການສະແດງຂອງຄົນລາວ ແລະສາກົນອີກດ້ວຍ

ໂຮງແຮມ  The President By Akaryn ຖືວ່າເປັນອີກໜຶ່ງໂຮງແຮມ ທີ່ໄດ້ຮັບຄວາມສົນໃຈທີ່ສຸດທັງພາຍໃນ ແລະຕ່າງປະເທດ ລວມໄປເຖິງໜັງສືພິມ, ວາລະສານ ແລະເວັບໄຊອື່ນໆ ທີ່ຢູ່ໃນຂົງເຂດອາຊີແລະໃນປະເທດ ຢູໂຣບ, ໜັງສືພິມຊື່ດັງ ຈາກຕ່າງປະເທດເຊັ່ນ New York Times ກໍໄດ້ໃຫ້ຄວາມສົນໃຈ ແລະໄດ້ຈັດອັນດັບ ໃຫ້ໂຮງແຮມ The President By Akaryn ເປັນໜຶ່ງໃນເຈັດຂອງໂຮງແຮມ ທີ່ກຳລັງຈະເປີດໂຕທີ່ດີທີ່ສຸດໃນໂລກ.

ປັດຈຸບັນໂຮງແຮມ The President By Akaryn ສ້າງສຳເລັດແລ້ວປະມານ 80%

ໂຮງແຮມດັ່ງກ່າວ ຕັ້ງຢູ່ຖະໜົນຟ້າງຸ່ມ, ບ້ານຊຽງຍືນ, ເມືອງຈັນທະບູລີ, ນະຄອນຫຼວງວຽງຈັນ ແລະຖ້າຫາກໂຮງແຮມດັ່ງກ່າວ ເປີດໂຕຢ່າງເປັນທາງການມື້ໃດທາງເວັບໄຊຂອງພວກເຮົາ ຈະບໍ່ພາດໂອກາດທີ່ຈະນໍາສະເໜີຕື່ມອີກແນ່ນອນ