ໃນທ້າຍອາທິດຜ່ານມາ ທີ່ ນະຄອນຫລວງວຽງຈັນ, ທ່ານ ຄຳລຽນ ພົນເສນາ ຮອງລັດຖະມົນຕີກະ ຊວງແຜນການ ແລະ ການລົງທຶນ ແລະ ທ່ານ ຄິມ ວອນພຽວປະທານ ບໍລິສັດ ຊີມອນ ທີ່ປຶກສາດ້ານການລົງທຶນ ພາຍໃນ-ຕ່າງປະເທດ ຈຳກັດ (Simon Consulting) ໄດ້ຮ່ວມລົງນາມ ໃນສັນຍາ ການພັດທະນາໂຄງການ (PDA) ເຂື່ອນໄຟຟ້ານ້ຳຊຳ 4 ທີ່ ເມືອງຊຳເໜືອ ແຂວງຫົວພັນ ໂດຍການເປັນພິຍານຂອງທ່ານ ໄຊປະເສີດ ພົມສຸພາ ຫົວໜ້າກົມທຸລະກິດ ພະລັງງານ ກະຊວງພະລັງງານ ແລະ ບໍ່ແຮ່ ແລະ ທ່ານ ອິມ ໂຮ ທີ່ປຶກສາທາງດ້ານກົດໝາຍ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຄີພິຍານ.
ໂຄງການເຂື່ອນໄຟຟ້ານ້ຳຊຳ 4 ມີກຳລັງຕິດຕັ້ງ 100 MW, ມູນຄ່າການກໍ່ສ້າງ 186 ລ້ານໂດລາສະຫະລັດ, ລັດຖະບານຖືຮຸ້ນ 20%, ຂາຍໄຟຟ້າໃນການຊົມໃຊ້ ພາຍໃນປະເທດ (ລັດວິສະຫະກິດໄຟຟ້າລາວ) ໂຄງການໄດ້ຮັບຮອງ ບົດການສຶກສາຄວາມເປັນໄປໄດ້ຂັ້ນກາງ, ສະບັບເລກທີ 0428/MEM/ DEPP ລົງວັນທີ 15/6/2015 ແລະ ໄດ້ຮັບຮອງບົດສຶກສາ ການປະເມີນຜົນກະທົບ ຕໍ່ສິ່ງແວດລ້ອມ ແລະ ສັງຄົມສະບັບເລກທີ 1557/ກຊສ.ກປສສ, ລົງວັນທີ 07/08/2015, ສຳເລັດການເຈລະຈາສັນຍາ PDAຄັ້ງວັນທີ 18/7/2016.
ຂ່າວ: ສຳນັກຂ່າວສານປະເທດລາວ