ທຳອິດເຂີຍເມືອງຊຳກະວ່າຊິບໍ່ຂຽນຂ່າວນີ້ແລ້ວລະ ແຕ່ເບິ່ງຄືບັນຫາມັນຍາວຍືດ ວານນີ້ຕອນແລງ ວັນທີ 31 ຕຸລາ 2016 ມີເພຈດັງແຫ່ງໜຶ່ງໂພສຮູບຊາຍ ແຕ່ງໂຕຄ້າຍຄືຕຳຫຼວດຈະລາຈອນ ກຳລັງລໍຖ້າຈ້ຳກາຜ່ານດ່ານຢູ່ຂົວມິດຕະພາບລາວ-ໄທ ແຫ່ງທີ 1 (ວຽງຈັນ-ໜອງຄາຍ) ໃນນັ້ນ, ມີຂໍ້ຄວາມບອກວ່າ “ຂ້ອຍຢືນຖ້າປະມານ 1 ຊົ່ວໂມງ ຕໍ່ຄີວປົກກະຕິ ແຕ່ແລ້ວກໍ່ມີເຈົ້າຫນ້າທີ່ມາແຊງຄີວ ເທື່ອ 1 ບໍ່ວ່າ ແຕ່ມັນ 4-5 ເທື່ອ ບໍ່ມີໃຜກ້າເວົ້າຫຍັງ ຢາກຮູ້ວ່າເປັນເຈົ້າຫນ້າທີ່ລະແຊງຄີວໄດ້ບໍ ? ມີທັງຄົນລາວ ຄົນຕ່າງຊາດຢືນຕໍ່ຄີວຢ່າງຖືກົດລະບຽບ ແຕ່ແມ່ນເຈົ້າຫນ້າທີ່ສະເພາະບາງຄົນພັດເຮັດຜິດລະບຽບ” (ກົດເບິ່ງຂ່າວດັ່ງກ່າວຢູ່ນີ້) ຂ່າວດັ່ງກ່າວໂດ່ງດັງ ຜ່ານໄປ 23 ຊົ່ວໂມງ ມີຜູ້ແຊຕໍ່ຫຼາຍກວ່າ 1,000 ຄັ້ງ ແລະມີຜູ້ປະກອບຄຳເຫັນເກືອບ 1,000 ຄຳເຫັນ ເຊິ່ງເກືອບທັງໝົດມີຄຳເຫັນວ່າ ເປັນເຫດທີ່ບໍ່ເໝາະສົມ ຍິ່ງເປັນເຈົ້າໜ້າທີ່ທີ່ຕ້ອງເປັນແບບຢ່າງແກ່ສັງຄົມ ໃນຂະນະທີ່ມີຫຼາຍຄຳເຫັນເວົ້າວ່າເຄີຍພົບພໍ້ເຫດການຄ້າຍຄືກັນນີ້ເຊັ່ນກັນ.

ຕໍ່ຂ່າວດັ່ງກ່າວນັ້ນ, ໃນນາມສື່ມວນຊົນຜູ້ເຮັດໜ້າທີ່ເປັນກາງ ບໍ່ເຂົ້າພຸ້ນອອກພີ້ ເຂີຍເມືອງຊຳ ຂໍມີຄຳເຫັນດັ່ງນີ້:
1. ເພື່ອນຜູ້ອ່ານທີ່ເຫັນຮູບ, ຂ່າວ ຫຼືຂໍ້ຄວາມ ເທິງເຟສບຸກ ຂໍໃຫ້ພິຈາລະນາໃຫ້ຖີ່ຖ້ວນ ນັ້ນເປັນພຽງຮູບທີ່ບໍ່ສາມາດພິສູດໄດ້ເລີຍວ່າບຸກຄົນໃນຮູບໄດ້ແຊງຄິວແທ້ຫຼືບໍ່.
ຫຼືຖ້າຮູບດັ່ງກ່າວນັ້ນ ເປັນເຈົ້າໜ້າທີ່ຕຳຫຼວດຈະລາຈອນມາລັດຄິວແທ້ໆ ກໍຍັງບໍ່ແນ່ວ່າເປັນຄິວເຫດຟ້າວຟັ່ງ ເຊັ່ນເປັນການສົ່ງຄົນເຈັບໄປປິ່ນປົວຫຼືບໍ່. ດັ່ງນັ້ນ, ຈົ່ງພິຈາລະນາໃຫ້ດີໆ ກ່ອນລົງມືປະກອບຄຳຄິດເຫັນ.
2. ຖ້າເປັນເຫດການເຈົ້າໜ້າທີ່ລັດຄິວແທ້ໆ ໂດຍບໍ່ມີເຫດອັນສົມຄວນແລ້ວ ກໍຖືວ່າເຈົ້າໜ້າທີ່ໃຊ້ອຳນາດບໍ່ຖືກຕ້ອງ ລະເມີດສິດທິຂອງຜູ້ອື່ນ, ລະເມີດວິໄນຂອງຕົນ ແລະບໍ່ເປັນແບບຢ່າງໃຫ້ແກ່ປະຊາຊົນ (ກາຍເປັນປາເນົ່າໃນຂ້ອງໂຕໜຶ່ງໄປເລີຍ). ເພາະຖ້າຫາກມີເຫດຈຳເປັນເລັ່ງດ່ວນກໍຄວນຈະກ່າວຂໍອະນຸຍາດແລະຂໍໂທດກັບຫຼາຍຄົນທີ່ຢືນຕໍ່ຄິວຢູ່ຫັ້ນກ່ອນ.
3. ຖ້າມັນແມ່ນເລື່ອງຈິງ, ບໍ່ແມ່ນສະເພາະແຕ່ຜູ້ລັດຄິວເທົ່ານັ້ນທີ່ຖືວ່າຜິດ ແຕ່ເຈົ້າໜ້າທີ່ທີ່ເປັນຜູ້ປະທັບກາຜ່ານໃສ່ບັດຜ່ານແດນນັ້ນ ກໍຄວນຈະໄດ້ຮັບຜິດຊອບບໍ່ນ້ອຍໄປກວ່າເຈົ້າໜ້າທີ່ທີ່ລັດຄິວເຊັ່ນກັນ ຫຼືຕ້ອງຮັບຜິດຫຼາຍກວ່າອີກ ບັນຫາດັ່ງກ່າວນີ້ ມັນເປັນເລື່ອງໃຫຍ່ພົວພັນເຖິງຄວາມສະຫງົບສຸກຂອງສັງຄົມ ກໍຄືຄວາມໝັ້ນຄົງຂອງຊາດ.

ແນວໃດກໍຕາມ, ຈົ່ງເຂົ້າໃຈວ່າຈະເປັນຕຳຫຼວດ ຫຼືເຈົ້າໜ້າທີ່ຝ່າຍໃດ ກໍລ້ວນແຕ່ເປັນລູກຫຼານຂອງປະຊາຊົນ ທີ່ປະກອບໃສ່ໜ້າທີ່ຕ່າງໆ ຕາມຊາດຮຽກຮ້ອງ ຈຶ່ງອາດຈະມີຜູ້ຮ້າຍແລະຜູ້ດີປະສົມປົນເປກັນໄປ ຈຶ່ງອາດຈະມີການປະພຶດທີ່ບໍ່ເໝາະສົມກໍໄດ້ ແຕ່ໃຫ້ເຂົ້າໃຈກວ່າ 100 ຄົນ ຫຼື 1000 ຄົນ ກໍມີພຽງຄົນດຽວທີ່ມັກປະພຶດຜິດ ຫຼືບໍ່ຖືກຕ້ອງເໝາະສົມ ເພາະຖ້າຄົນສ່ວນຫຼາຍເປັນຄົນບໍ່ດີສັງຄົມກໍຄົງບໍ່ສາມາດຢູ່ຢ່າງສະຫງົບໄດ້ດັ່ງຊູ່ມື້ນີ້.

ນັ້ນກໍອາດຈະພຽງເປັນປາໂຕດຽວ ເນົ່າໝົດຂ້ອງກໍໄດ້! ແຕ່ຖ້າປາເຕັມຂ້ອງບໍ່ມີໂຕໃດເນົ່າເລີຍຍິ່ງຈະເປັນການດີ ສັງຄົມຊົມເຊີຍ!