ຄວາມຄືບໜ້າກ່ຽວກັບສາຍການບິນມາເລເຊຍ
ນາຍົກມາເລເຊຍກ່າວວ່າ, ເສັ້ນທາງການບິນຂອງເຮືອບິນໂດຍສານສາຍການບິນມາເລເຊຍທີ່ເກີດອຸບັດເຫດນັ້ນ, ໃນຕອນເຊົ້າຂອງວັນທີ 18 ກໍລະກົດນີ້, ທ່ານນາຈິບຕຸນຣາຊັກ ນາຍົກລັດຖະມົນຕີມາເລເຊຍໄດ້ກ່າວໃນງານຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງກົວລາລຳເປີວ່າ: ອົງການການບິນພົນລະເຮືອນສາກົນໄດ້ປະກາດແລ້ວວ່າ ເສັ້ນທາງການບິນຂອງເຮືອບິນຖ້ຽວບິນ MH17 ຂອງສາຍການບິນມາເລເຊຍທີ່ເກີດອຸບັດເຫດຕົກຢູ່ພາກຕາເວັນອອກອູແກຣນນັ້ນແມ່ນມີຄວາມປອດໄພດີ. ພ້ອມດຽວກັນນັ້ນ, ທ່ານນາຈິບຊີ້ບອກວ່າ ສະມາຄົມການຂົນສົ່ງທາງອາກາດສາກົນ ກໍໄດ້ຮັບປະກັນວ່າເຂດນ່ານຟ້າທີ່ຖ້ຽວບິນດັ່ງກ່າວບິນຜ່ານນັ້ນບໍ່ແມ່ນເຂດຫ້າມບິນ, ສ່ວນສາຍການບິນມາເລເຊຍກໍຢືນຢັນວ່າ, ເຮືອບິນດັ່ງກ່າວບໍ່ໄດ້ສົ່ງສັນຍານຂໍຄວາມຊ່ວຍເຫຼືອແຕ່ຢ່າງໃດ.
ທ່ານນາຈິບຍັງກ່າວຕື່ມອີກວ່າ: ‘‘ ລັດຖະບານອູແກຣນເຊື່ອໝັ້ນວ່າເຮືອບິນຖ້ຽວບິນ MH17 ທີ່ເດີນທາງອອກຈາກອຳສະເຕີດາມຂອງໂຮນລັງບິນໄປສູ່ກົວລາລຳເປີຂອງມາເລເຊຍໃນວັນທີ 17 ກໍລະກົດນີ້ແມ່ນຖືກຍິງຕົກ. ພວກຂ້າພະເຈົ້າຈະທຳຄວາມພະຍາຍາມຈົນສຸດຄວາມສາມາດເພື່ອສືບສວນຫາສາເຫດທີ່ເຮັດໃຫ້ເກີດເຫດການໃນຄັ້ງນີ້. ຖ້າເຮືອບິນຫາກແມ່ນຖືກຍິງຕົກແທ້, ພວກຂ້າພະເຈົ້າຈະຢຶດຖືວ່າ ຜູ້ກໍ່ເຫດຕ້ອງໄດ້ຖືກຈັບຕົວເພື່ອນຳໄປລົງໂທດຕາມກົດໝາຍຢ່າງຮີບດ່ວນ ”
f.mahasonmagazine