ໃນໂອກາດຂຶ້ນປະກອບຄໍາເຫັນຕໍ່ແຜນພັດທະນາເສດຖະກິດ-ສັງຄົມສົກປີໃໝ່ ຂອງທ່ານ ຄໍາແດງ ສີລາວົງ ສະມາຊິກສະພາແຫ່ງ ຊາດເຂດເລືອກຕັ້ງ 18 ແຂວງໄຊສົມບູນຢູ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ VIII ໃນວັນທີ 25 ຕຸລານີ້, ທ່ານໄດ້ສະເໜີໃຫ້ລັດຖະບານຄົ້ນຄວ້າ ແລະ ພິຈາລະນາການລົງທຶນຂອງລັດເຂົ້າໃນການພັດທະນາພື້ນຖານໂຄງລ່າງຢູ່ແຂວງໄຊສົມບູນ ເຊິ່ງເປັນແຂວງຕັ້ງຂຶ້ນໃໝ່ໃຫ້ຫລາຍຂຶ້ນກວ່າເກົ່າ, ພາຍຫລັງເຫັນວ່າຈະເປັນພື້ນຖານໜັກແໜ້ນໃຫ້ແກ່ການພັດທະນາຊົນນະບົດ, ແກ້ໄຂຄວາມທຸກຍາກ ແລະ ນໍາຄວາມສະຫງົບສຸກມາສູ່ປະ ຊາຊົນທ້ອງຖິ່ນດັ່ງກ່າວ.
ທ່ານ ຄໍາແດງ ສີລາວົງ ກ່າວວ່າ: ການພັດທະນາຊົນນະບົດ ແລະ ລຶບລ້າງຄວາມທຸກຍາກແມ່ນວຽກງານຍຸດທະສາດຂອງພັກ ແລະ ລັດຖະບານທີ່ໄດ້ ກໍານົດໄວ້ໃນແຜນພັດທະນາເສດຖະກິດ-ສັງຄົມແຕ່ລະໄລຍະ ແລະ ຜ່ານມາກໍເຫັນວ່າລັດຖະບານໄດ້ມີຄວາມພະຍາຍາມສູງໃນການແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ຊຶ່ງສະແດງອອກໃຫ້ເຫັນຕົວຈິງໃນການເອົາໃຈໃສ່ປັບປຸງກໍ່ສ້າງພື້ນຖານໂຄງລ່າງທີ່ຈໍາເປັນໄປຄຽງຄູ່ກັບການສົ່ງເສີມປະຊາຊົນຜູ້ທຸກຍາກໃນເຂດຊົນນະບົດຫ່າງໄກສອກຫລີກໄດ້ເຂົ້າເຖິງແຫລ່ງທຶນເພື່ອຊຸກຍູ້ການຜະລິດເປັນສີນຄ້າ, ອັນເປັນການສ້າງລາຍຮັບ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ເກືອບວ່າມາຮອດປັດຈຸບັນມີຫລາຍແຂວງ, ຫລາຍເມືອງ, ຫລາຍບ້ານ ແລະ ຫລາຍຄອບຄົວສາມາດຫລຸດພົ້ນອອກຈາກຄວາມທຸກຍາກໄດ້ເທື່ອລະກ້າວແລ້ວ. ສໍາລັບແຂວງໄຊສົມບູນ, ຊຶ່ງເປັນແຂວງສ້າງຕັ້ງຂຶ້ນໃໝ່ໄດ້ບໍ່ເທົ່າໃດປີມານີ້, ຄະນະນໍາຂອງແຂວງກໍໄດ້ຖືເອົາວຽກງານແກ້ໄຂຄວາມທຸກຍາກຂອງປະຊາຊົນເປັນບູລິມະສິດສໍາຄັນ ແລະ ມາຮອດປັດຈຸບັນຄອບຄົວທຸກຍາກຍັງເຫລືອ 1.800 ກວ່າຄອບຄົວເທົ່າກັບ 13,85% ຂອງຄອບຄົວທັງໝົດ, ບ້ານທຸກຍາກຍັງເຫລືອ 26 ບ້ານ, ນອກນີ້ການສ້າງບ້ານໃຫຍ່ເປັນຕົວເມືອງນ້ອຍກໍໄດ້ຮັບການສົ່ງເສີມ ແລະ ຈັດຕັ້ງປະຕິບັດເປັນຮູບປະທໍາຫລາຍຂຶ້ນ. ແຕ່ແນວໃດກໍຕາມ, ແຂວງໄຊສົມບູນກໍຍັງປະສົບບັນຫາຫຍຸ້ງຍາກຫລາຍດ້ານ ເປັນຕົ້ນ: ລະບົບພື້ນຖານໂຄງລ່າງຍັງບໍ່ທັນໄດ້ຮັບການພັດທະນາກວ້າງຂວາງ, ຄວາມບໍ່ສະຫງົບພາຍໃນແຂວງຍັງບໍ່ທັນໜັກແໜ້ນ ແລະ ແກ້ໄຂໄດ້ຢ່າງຂາດຕົວ, ບັນຫາລັກລອບຂຸດຄົ້ນຊັບພະຍາກອນທໍາມະຊາດຍັງມີຢູ່, ປະຊາຊົນສ່ວນຫລາຍຍັງທຸກຍາກ ແລະ ການດໍາລົງຊີວິດຍັງຕິດພັນກັບທໍາມະຊາດເປັນສ່ວນໃຫຍ່, ການຜະລິດເປັນສີນຄ້າຍັງອ່ອນນ້ອຍ ແລະ ການເຄື່ອນໄຫວຂອງບັນດາຂະແໜງການອື່ນໆກໍບໍ່ທັນຟົດຟື້ນດີເທົ່າທີ່ຄວນ.

ສະນັ້ນເພື່ອໃຫ້ຄວາມຫຍຸ້ງຍາກຂາດເຂີນດັ່ງກ່າວຄ່ອຍໆໄດ້ຮັບການແກ້ໄຂດີຂຶ້ນເທື່ອລະກ້າວນັ້ນ, ຂໍສະເໜີລັດຖະບານໄດ້ຄົ້ນຄວ້າ, ພິຈາລະນາໃນການເພີ່ມງົບປະມານການລົງທຶນຂອງລັດໃສ່ພື້ນຖານໂຄງລ່າງຂອງແຂວງຫລາຍຂຶ້ນຕື່ມ, ໂດຍສະເພາະການປັບປຸງກໍ່ສ້າງເສັ້ນທາງຍຸດທະສາດ , ເສັ້ນທາງຫລວງ ກໍຄືເສັ້ນທາງເຊື່ອມຕໍ່ລະຫວ່າງເມືອງ ເພື່ອອໍານວຍຄວາມສະດວກໃນດ້ານຄົມມະນາຄົມ, ການຂົນສົ່ງສິນຄ້າ, ການທ່ອງທ່ຽວ ກໍຄືການພັດທະນາແຂວງໄຊສົມບູນໃຫ້ມີໃບໜ້າໃໝ່, ນອກຈາກນີ້ກໍສະເໜີລັດຖະບານ ຄົ້ນຄວ້າການຈັດແບ່ງລາຍຮັບປະມານ 5 ຫລື 10% ຈາກບັນດາໂຄງການໃຫຍ່ທີ່ມີຢູ່ພາຍໃນແຂວງ ເປັນຕົ້ນ: ໂຄງການບໍ່ຄໍາພູເບ້ຍ ແລະ ບັນດາເຂື່ອນຕ່າງໆ ເພື່ອເປັນທຶນຮອນໃນການພັດທະນາແຂວງໃນຕໍ່ໜ້າ.

ຂ່າວ: ລາວພັດທະນາ