ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ລົງເຄື່ອນໄຫວຢ້ຽມຢາມ ແລະ ເຮັກວຽກຢູ່ກອງ ກ 2 ໃນວັນທີ 22 ຕຸລາ 2016 ທີ່ຜ່ານມາ ໂດຍໃຫ້ກຽດຕ້ອນຮັບຂອງທ່ານ ພັນເອກ ຄຳຫຼ້າ ວົງວິໄລ ຫົວໜ້າການເມືອງ ກອງ ກ 2 ພ້ອມດ້ວຍຄະນະ ແລະ ພ້ອມດ້ວຍອ້າຍນ້ອງນັກຮົບພາຍໃນກອງ ກ 2.
ໃນໂອກາດດັ່ງກ່າວ ຫົວໜ້າການເມືອງ ກອງ ກ 2 ໄດ້ລາຍງານສະພາບການຕ່າງໆຮອບດ້ານຂອງກົມກອງ ເປັນຕົ້ນ ການຈັດຕັ້ງເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IV ຂອງຄະນະພັກກະຊວງປ້ອງກັນປະເທດ ປະກອບມີ 4 ແຜນງານ 26 ໂຄງການ ໂດຍສະເພາະ ກົມກອງພວມສຳເລັດການສະເຫຼີມສະຫຼອງ ວັນສ້າງຕັ້ງກົມກອງຂອງຕົນ ຄົບຮອບ 35 ປີ ແລະ ສະພາບການເຄື່ອນໄຫວປະຕິບັດ ໃນການເຝິກແອບຮ່ຳຮຽນການເມືອງ ການທະຫານ ການສ້າງເສດຖະກິດ ແກ້ໄຂຊີວິດການເປັນຢູ່ ການປັບປຸງຖັນແຖວພະນັກງານສະມາຊິກພັກ ຫັນລົງກໍ່ສ້າງຮາກຖານການເມືອງເຂດກົມກອງຮັບຜິດຊອບ ຕິດພັນກັບການພັດທະນາວຽກງານ 3 ສ້າງ.
ຈາກນັ້ນ ທ່ານ ບຸນຍັງ ວໍລະຈິດ ກໍ່ໃຫ້ກຽດໂອ້ລົມນາຍ ແລະ ພົນທະຫານ ກ່ອນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງກົມກອງທີ່ຍາດມາໄດ້ໃນໄລຍະຜ່ານມາ ແລະ ໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນ ທີ່ມີການຜັນແປຢ່າງສັບສົນຕໍ່ບັນຫາດັ່ງກ່າວ ພະນັກງານ ສະມາຊິກພັກ ກຳລັງປະກອບອາວຸດ ຕ້ອງເປັນເຈົ້າການໃນການປັບປຸງກຳລັງ ມີສະຕິກຽມພ້ອມຕອບຕ້ານທຸກເລ່ກົນການໂຄສະນາບິດເບືອນຂອງສັດຕູ ຕ້ອງຖືສຳຄັນວຽກງານປ້ອງກັນຊາດ-ປ້ອງກັນຄວາມສະຫງົບ ຫັນລົງກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານ ເຊິ່ງຍາມໃດກອງທັບກັບປະຊາຊົນ ກໍ່ມີຄວາມສາມັກຄີຢ່າງແໜ້ນແຟ້ນເປັນກຳລັງອັນດຽວ ເພື່ອພ້ອມກັນຕ້ານ ແລະ ສະກັດກັ້ນທັບມ້າງເລ່ຫຼ່ຽມກົນອຸບາຍຂອງພວກກຸ່ມຄົນບໍ່ຫວັງດີໃຫ້ພັງທະລາຍ ຈາກໃນເງື່ອນໄຂປັດໄຈໃໝ່ ກອງທັບເຮົາມີການປັບປຸງເຂັ້ມແຂງໜັກແໜ້ນ ໃນຮາກຖານກົມກອງ ກໍ່ຕ້ອງໄດ້ປັບປຸງໃຫ້ມີຄວາມເຂັ້ມແຂງ ການປັບປຸງກໍ່ສ້າງພັກ ກໍ່ສ້າງພະນັກງານ ການຮ່ຳຮຽນຫັດແອບດ້ານສິລະປະຍຸດທະວິທີກຽມພ້ອມສູ້ຮົບ ຮັບປະກັນກົມກອງໃຫ້ມີຄວາມເຂັ້ມແຂງ ແມ່ນການຫັນກົມກອງກໍ່ສ້າງພະລາທິການກັບທີ່ ການປູກຝັງລ້ຽງສັດ ທຳການຜະລິດ ແກ້ໄຂຊີວິດການເປັນຢູ່ໃຫ້ດີຂຶ້ນ ຕາມເງື່ອນໄຂເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອເຮັດໃຫ້ສຳເລັດນັ້ນ ບົນພື້ນຖານຕ້ອງໄດ້ເສີມຂະຫຍາຍທາດແທ້ມູນເຊື້ອຂອງກອງທັບວິລະຊົນ ສະຫງ່າອົງອາດຂອງກົມກອງ ມູນເຊື້ອຂອງກົມກອງໃຫ້ດີ ຍົກສູງມານະຈິດ ເປັນເຈົ້າການເຮັດສຳເລັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍໃຫ້ ຕັ້ງໜ້າເປັນເຈົ້າການເຄື່ອນໄຫວປ້ອງກັນຊາດ-ປ້ອງກັນຄວາມສະຫງົບ ປົກປັກຮັກສາລະບອບໃໝ່ ກໍ່ຄືປະເທດຊາດ ໄດ້ຢ່າງໝັ້ນຄົງ.

ຂ່າວ: ສຳນັກຂ່າວສານປະເທດລາວ