ອີງຕາມການລາຍງານຂອງເຈົ້າໜ້າທີ່ຈາກກົມພາສີ ກະຊວງການເງິນ ແຈ້ງໃຫ້ຊາບວ່າ: ໃນທ້າຍອາທິດຜ່ານມາ ທີ່ດ່ານສາກົນນາເພົ້າ ແຂວງຄຳມ່ວນ ເຈົ້າໜ້າທີ່ພາສີໄດ້ກວດພົບການລັກລອບສິນຄ້າປະເພດໄມ້ທີ່ຫວງຫ້າມສົ່ງອອກ ຈຳນວນ 2 ຄະດີ ຊຶ່ງລາຍລະອຽດມີດັ່ງນີ້: ວັນທີ 8/10/2016 ມີຄົນຂັບລົດຕູ້ຄອນແທນເນີ ຊາວຫວຽດນາມ ນຳເອກະສານສິນຄ້າແຈ້ງຕໍ່ເຈົ້າໜ້າທີ່ພາສີ ເພື່ອສົ່ງສິນຄ້າອອກໄປປະເທດຫວຽດນາມ ຜ່ານການກວດກາເອກະສານ ແລະ ສາຍລອກຕູ້ສິນຄ້າແລ້ວ ເຈົ້າໜ້າທີ່ພາສີໄດ້ກວດພົບຄວາມບໍ່ຖືກຕ້ອງ ແລະ ໄດ້ກວດກາລົດຄັນດັ່ງກ່າວໃໝ່ ດ້ວຍລະບົບສາຍແສງສະແກນເນີ້ ຈຶ່ງພົບເຫັນການຊຸກເຊື່ອງໄມ້ໜູນ ແລະ ໄມ້ດູ່ແປຮູບ ຈຳນວນທັງໝົດ 1.233 ໂຕ ຫຼື 38.281 ແມັດກ້ອນ.
ມື້ຕໍ່ມາ ອີງຕາມແຫຼ່ງຂ່າວພົນລະເມືອງດີ ໄດ້ແຈ້ງຂ່າວການນຳເອົາໄມ້ຂຶ້ນລົດເມໂດຍສານ ເຊິ່ງເຈົ້າຂອງລົດເປັນຄົນຫວຽດ ທີ່ຈະເດີນທາງຜ່ານເສັ້ນທາງເລກທີ 12 ຄາດໝາຍປາຍທາງໄປປະເທດຫວຽດນາມ ດັ່ງນັ້ນ ເຈົ້າໜ້າທີ່ພາສີໄດ້ຕິດຕາມ ແລະ ພົບເຫັນລົດເມຄັນດັ່ງກ່າວ ໃນວັນທີ 9/10/2016 ຈຶ່ງນຳເອົາລົດຄັນດັ່ງກ່າວ ເຂົ້າກວດກາດ້ວຍລະບົບສາຍແສງສະແກນເນີ້ ແລ້ວກວດພົບເຫັນການຊຸກເຊື່ອງໄມ້ດູ່ແປຮູບ ຈຳນວນ 23 ໂຕ ຫຼື 0,221 ແມັດກ້ອນ ແລະ ໄມ້ຂະຍຸງ ຈຳນວນ 145 ໂຕ ຫຼື 1.971 ກິໂລກຼາມ.
ຜ່ານການກວດກາຕົວຈິງເຫັນລົດທັງສອງກໍລະນີ ແມ່ນໄດ້ນຳສິນຄ້າປະເພດໄມ້ທີ່ຫວງຫ້າມສົ່ງອອກຢ່າງແທ້ຈິງ ແລະ ຕາມການລາຍງານຄົນຂັບລົດທັງສອງກໍລະນີ ແມ່ນສວຍໂອກາດຫຼົບໜີເຈົ້າໜ້າທີ່ ປັດຈຸບັນ ລົດ ແລະ ໄມ້ຈຳນວນດັ່ງກ່າວ ຢຶດໄວ້ຢູ່ທີ່ດ່ານພາສີສາກົນນາເພົ້າ ແຂວງຄຳມ່ວນ ເປັນການຊົ່ວຄາວ ເພື່ອດຳເນີນການຕາມລະບຽບກົດໝາຍ ໂດຍສະເພາະ ປະຕິບັດຕາມຄຳສັ່ງນາຍົກລັດຖະມົນຕີ ສະບັບເລກທີ 15/ນຍ
ຂ່າວ: ໜັງສືພິມ ວຽງຈັນໃໝ່