ວັນທີ 19 ຕຸລາ ປີ 2010 ຫຼືມື້ນີ້ເມື່ອ 6 ປີທີ່ແລ້ວ ເປັນມື້ວາງຈຳໜ່າຍຂອງເກມ Vanquish ເທິງເຄື່ອງ PS3 ແລະ Xbox 360 ທີ່ປະເທດສະຫະລັດອາເມຣິກາ. ໂດຍເກມນີ້ເປັນແນວແອັກຊັ່ນແນວຊູດຕິ້ງມຸມມອງບຸກຄົນທີ 3 ພັດທະນາໂດຍບໍລິສັດ PlatinumGames ແລະມີທ່ານຊິນຈິ ມິຄາມິ ອະດີດຜູ້ໃຫ້ກຳເນີດຊີຣີ Resident Evil ທີ່ລາອອກຈາກ Capcom ມາຮັບໜ້າທີ່ເປັນໄດເຣັກເຕີໃຫ້ກັບເກມນີ້ນຳ.
ພລ໋ອດເລື່ອງຂອງ Vanquish ຈະກ່າວເຖິງໂລກອະນາຄົດ ເມື່ອປະຊາກອນເທິງໂລກເພີ່ມຈຳນວນຢ່າງວ່ອງໄວແລະເກີດການຍາດແຍ່ງຊັບພະຍາກອນກັນ ໃນທີ່ສຸດທາງສະຫະລັດອາເມຣິກາກໍພະຍາຍາມຈະແກ້ໄຂບັນຫາຊັບພະຍາກອນໃນປະເທດບໍ່ພຽງພໍດ້ວຍການສົ່ງສະຖານີອະວະກາດໂພຣວິເດນ (Providence) ທີ່ສາມາດເກັບພະລັງງານແສງອາທິດມາໄວ້ເປັນພະລັງງານສຳຮອງສູ່ໂລກໄດ້, ໃນຂະນະດຽວກັນ ທາງລັດຖະບານຂອງຣັສເຊຍກໍຖືກກໍ່ລັດທະປະຫານໂດຍກຸ່ມກະບົດ ແລະປ່ຽນຮູບແບບການປົກຄອງເປັນຜະເດັດການໂດຍສົມບູນ ພ້ອມທັງເຮັດການຍຶດສະຖານີອະວະກາດຂອງສະຫະລັດອາເມຣິກາ ແລະປ່ຽນເອົາພະລັງງານແສງອາທິດມາເປັນຄື້ນພະລັງງານແຮງສູງຖະຫຼົ່ມເມືອງຊານຟຣານຊິສໂກຈົນເອະເລະ ແລະແລ້ວ ວິກເຕີ ເຊດເຊບ (Victor Zaitsev) ຜູ້ນຳກຸ່ມກະບົດຣັສເຊຍກໍຍື່ນຄຳຂາດວ່າໃຫ້ສະຫະລັດອາເມຣິກາ ຍອມຈຳນົນ ບໍ່ສະນັ້ນຕົນຈະສັ່ງຍິງທຳລາຍກຸງນິວຢອຣ໌ກ ໃຫ້ເລະໄປອີກເມືອງ, ດ້ວຍເຫດນີ້ ແຊມ ກິດຽນ (Sam Gideon) ເຈົ້າໜ້າທີ່ຈາກໜ່ວຍ DARPA ຈຶ່ງຖືກສົ່ງມາຢຸດເຫດການວິນາດສະກຳດັ່ງກ່າວທີ່ມີຊະຕາຂອງຄົນອາເມຣິກັນນັບລ້ານເປັນເດີມພັນ.
ເກມນີ້ຜູ້ຫຼິ້ນຈະໄດ້ຮັບບົດເປັນແຊມ ກິດຽນ ຜູ້ສວມຊຸດເກາະສຸດລ້ຳທີ່ມີຄວາມສາມາດໃນການຊະລໍເວລາເພື່ອຫຼົບຫຼີກການໂຈມຕີຂອງສັດຕູໄດ້ ລວມເຖິງເລັງຫາສັດຕູໄດ້ຢ່າງວ່ອງໄວ ພ້ອມກັນນີ້ຍັງມີລະບົບບູສເຕີຫຼືການສະໄລ້ທີ່ຊ່ອຍໃຫ້ຜູ້ຫຼິ້ນເຄື່ອນທີ່ໄດ້ວ່ອງໄວແລະຂ້າມໄປມາຕາມຈຸດຕ່າງໆໄດ້ ແຕ່ຖ້າຫາກຜູ້ຫຼິ້ນໃຊ້ໂໝດຊະລໍເວລາຫຼືບູສເຕີຫຼາຍເກີນໄປ ຊຸດເກາະຈະເກີດອາການໂອເວີຮີດແລະຈະໃຊ້ບໍ່ໄດ້ແປັບໜຶ່ງຈົນກວ່າເສື້ອຈະເຮັດການຄລູດາວແລ້ວກ່ອນ ເຊິ່ງລະຫວ່າງທີ່ຊຸດເກາະເຮັດການຄລູດາວແຊມຈະເຄື່ອນໄຫວໄດ້ຊ້າລົງ ຜູ້ຫຼິ້ນຈຶ່ງຕ້ອງລະມັດລະວັງແລະຄຳນຶງເຖິງການໃຊ້ທ່າຕ່າງໆໃຫ້ດີ. ນອກຈາກນີ້ໃນສ່ວນຂອງອາວຸດ ຜູ້ຫຼິ້ນຈະມີໃຊ້ທັງອາວຸດປືນ, ອາວຸດປະຊິດ ແລະລະເບີດ ສາມາດສະຫຼັບປ່ຽນໄປມາເພື່ອໃຊ້ຕາມສະຖານະການຕ່າງໆໄດ້ ເຊິ່ງສາມາດອັບເກຣດອາວຸດແລະລະເບີດທຸກຊະນິດໄດ້ດ້ວຍການເກັບກ່ອງອັບເກຣດ ຫຼືເກັບອາວຸດຊະນິດດຽວກັນເມື່ອລູກປືນນັ້ນເຕັມຢູ່ແລ້ວເປັນຕົ້ນ.
Fact ເລັກນ້ອຍກ່ຽວກັບເກມ Vanquish
- ສຳລັບຜູ້ທີ່ຫຼິ້ນ Vanquish ເທິງເວີຊັ່ນ PS3 ເມື່ອຢູ່ທີ່ໜ້າໄຕເຕິ້ນ ໃຫ້ຄວງອານາລ໋ອກຂວາ (R3) ຕາມເຂັມໂມງຫຼືທວນເຂັມໂມງໃຫ້ຄົບ 20 ຮອບ ຈະສາມາດປົດລ໋ອກລະດັບຄວາມຍາກ God Hard Mode ໄດ້
- ໂຕເກມສາມາດເຮັດຍອດໄປໄດ້ 820,000 ຊຸດທົ່ວໂລກ ເຖິງວ່າຈະເຫັນຍອດຂາຍສູງໃນເກນໃຊ້ໄດ້ ແຕ່ເຊື່ອບໍ່ວ່າກະແສຜູ້ຄົນທີ່ເວົ້າເຖິງເກມນີ້ໃນໂລກອິນເຕີເນັດພັດໜ້ອຍກວ່າທີ່ຄຶດຫຼາຍ
ຂະໜາດທີ່ວ່າ GameSpot ທີ່ເປັນສຳນັກຂ່າວເກມຈາກຕ່າງປະເທດໄດ້ມອບລາງວັນ Best Game No One Played ຫຼື “ເກມສຸດຍອດທີ່ບໍ່ມີຄົນຫຼິ້ນ” ປະຈຳປີ 2010 ໄວ້ໃຫ້ທາງ Platinum Games ຊ້ຳໃຈກັນເລີຍ.
- ທ່ານຊິນຈິ ມິຄາມິ ໄດເຣັກເຕີຂອງເກມນີ້ໄດ້ເຜີຍວ່າເກມ Vanquish ໄດ້ແຮງບັນດານໃຈມາຈາກອະນິເມະເລື່ອງ Casshern ທີ່ສາຍທາງໂທລະພາບໃນຊ່ວງຍຸກ 70 ຫຼືປະມານ 40 ປີກ່ອນ ເຊິ່ງເຈົ້າໂຕກ່າວເພີ່ມຕື່ມອີກວ່າແຮງບັນດານໃຈທີ່ເວົ້ານີ້ມີທັງການອອກແບບໂຄງສ້າງຂອງເກມ ໄປຈົນຮອດກຣາບຟິກຂອງເກມນຳ.
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station