ແຫຼ່ງຂ່າວຈາກຕ່າງປະເທດລາຍງານວ່າ ລັດຖະບານສະຫະລັດອາຫຼັບເອມິເຣດ (UAE) ປະກາດໃນວັນພະຫັດ
17 ກໍລະກົດນີ້ວ່າ ພວກເຂົາໄດ້ເປີດໂຕໂຄງການສົ່ງຍານອາວະກາດແບບໄຮ້ນັກບິນ ໄປຍັງດາວອັງຄານ ໃຫ້ສຳ
ເລັດພາຍໃນປີ 2021 ຫຼື ອີກ 7 ປີຂ້າງໜ້າ ໂດຍອ້າງວ່າພວກເຂົາເຈົ້າບໍ່ມີຂໍ້ຈຳກັດເລື່ອງງົບປະມານ.
ທ່ານ ຊີກ ຄາລິຟາ ບິນ ໄຊເອັດ ອັນ ນາຍານ ປະທານາທິບໍດີແຫ່ງສະຫະລັດອາຫຼັບເອມິເຣດ ປະກາດຈັດຕັ້ງ
ສຳນັກງານອາວະກາດແຫ່ງຊາດຂອງຕົນເອງຂຶ້ນຢ່າງເປັນທາງການ ເພື່ອເຮັດໜ້າທີ່ດຳເນີນງານໂຄງການ
ສົ່ງຍານອາວະກາດແບບໄຮ້ຄົນຂັບ ໄປສຳຫຼວດດາວອັງຄານ ໃນອີກ 7 ປີ ໂດຍພ້ອມທີ່ຈະທຸ້ມງົບປະມານບໍ່
ອັ້ນ ເພື່ອໃຫ້ໂຄງການນີ້ບັນລຸຜົນສຳເລັດຕາມເປົ້າໝາຍ.
ຄວາມເຄື່ອນໄຫວດັ່ງກ່າວ ສົ່ງຜົນເຮັດໃຫ້ສະຫະລັດອາຫຼັບເອມິເຣດ ກາຍເປັນປະເທດທີ 9 ຂອງໂລກ ທີ່ມີ
ການຈັດຕັ້ງໂຄງການສຳຫຼວດດາວອັງຄານຢ່າງເປັນທາງການ ໂດຍທາງການປະເທດດັ່ງກ່າວ ຕັ້ງເປົ້າໃຫ້
ປະເທດຂອງຕົນ ຖືກບັນທຶກຊື່ໄວ້ໃນໜ້າປະຫວັດສາດ ໃນຖານະປະເທດຈາກໂລກມຸສລິມປະເທດທຳອິດ
ທີ່ສາມາດພິຊິດດາວອັງຄານ ທີ່ຢູ່ຫ່າງຈາກໂລກຫຼາຍກ່ວາ 60 ລ້ານກິໂລແມັດ ແລະ ຕ້ອງໃຊ້ເວລາໃນການ
ເດີນທາງຍາວນານກ່ວາ 9 ເດືອນ.
ການປະກາດເດີນໜ້າໂຄງການສົ່ງຍານອາວະກາດ ໄປຍັງດາວອັງຄານຂອງລັດຖະບານ ສ.ອາຫຼັບໃນຄັ້ງນີ້
ຖືກຕີລາຄາວ່າ ເປັນໜຶ່ງໃນຄວາມພະຍາຍາມຂອງພາກລັດ ໃນການສ້າງຄວາມເຕີບໂຕທາງດ້ານເຕັກໂນ
ໂລຊີພາຍໃນປະເທດ ເພື່ອກະຈາຍຄວາມຫຼາກຫຼາຍທາງດ້ານເສດຖະກິດ ອອກຈາກພາກພະລັງງານທີ່ເປັນ
ລາຍໄດ້ຫຼັກຂອງປະເທດມາແຕ່ດົນນານ.
ບັນດາປະເທດ 9 ຊາດໃນໂລກ ທີ່ມີການຈັດຕັ້ງໂຄງການສຳຫຼວດດາວອັງຄານ ຫຼື ໂຄງການວິໄຈອື່ນໆກ່ຽວ
ຂ້ອງກັບດາວອັງຄານແມ່ນປະກອບດ້ວຍ: ຣັດເຊຍ, ສະຫະລັດອາເມລິກາ, ຈີນ, ອິນເດຍ, ຍີ່ປຸ່ນ, ສະຫະລາ
ຊະອານາຈັກ, ເນເທີແລນ, ຟິນແລນ ແລະ ສະຫະລັດອາຫຼັບເອມິເຣດ.
