ສຳນັກຂ່າວຕ່າງປະເທດ ລາຍງານໃນວັນທີ 17 ຕຸລາຜ່ານມານີ້ວ່າ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ໄດ້ປະກາດໂດຍຜ່ານການໃຫ້ສຳພາດກັບ ສະຖານີໂທລະພາບ Phoenix Television ໂດຍລະບຸວ່າ ຈະຈັດໃຫ້ມີການເຝິກຊ້ອມສູ້ຮົບ ຮ່ວມກັບຈີນ ແລະ ຣັດເຊຍ ໂດຍເນັ້ນຢ້ຳວ່າ ທ່ານຈະບໍ່ຍອມໃຫ້ມີການຊ້ອມຮົບຮ່ວມກັບອາເມຣິກາອີກຕໍ່ໄປ.
ທັງນີ້ ທ່ານ ດູເຕີເຕ ໄດ້ພະຍາຍາມຮັດແໜ້ນການພົວພັນຕ່າງປະເທດ ແບບປ່ຽນທິດທາງຢ່າງວ່ອງໄວ ນັບຕັ້ງແຕ່ທ່ານເຂົ້າຮັບຕຳແໜ່ງ ເປັນປະທານາທິບໍດີຟິລິບປິນ ໃນວັນທີ 30 ມິຖຸນາທີ່ຜ່ານມາ ດ້ວຍການຫັນໄປໃຫ້ຄວາມສຳຄັນກັບຈີນ ແລະ ຣັດເຊຍ, ໃນຂະນະດຽວກັນ ກໍໄດ້ຖອຍຫ່າງອອກຈາກສະຫະລັດອາເມຣິກາ ເນື່ອງຈາກທ່ານບໍ່ພໍໃຈທີ່ຖືກອາເມຣິກາ ວິພາກວິຈານເລື່ອງ ນະໂຍບາຍສົງຄາມຕ້ານອາຊະຍາກຳຂອງຕົນເອງ ແລ້ວຫັນໄປຍົກຍ້ອງຈີນ ແລະ ຣັດເຊຍແທນ ຊຶ່ງສອງປະເທດດັ່ງກ່າວນີ້ ໃຫ້ຄວາມເຄົາລົບຕໍ່ກິດຈະການພາຍໃນຂອງຟິລິບປິນ.
ຕິດຕາມເຮົາທາງFacebook ກົດຖືກໃຈເລີຍ!