ພໍ່ແມ່ຜູ້ປົກຄອງທັງຫຼາຍ ຈົ່ງໄດ້ເພີ່ມທະວີຄວາມເອົາໃຈໃສ່ໃນການເບິ່ງແຍງດູແລລູກຫຼານ ໃຫ້ເຂັ້ມງວດຂຶ້ນກ່ອນເກົ່າ ເພື່ອຫຼີກເວັ້ນຄວາມເສຍຫາຍທີ່ບໍ່ເພິ່ງປາດຖະໜາ ທີ່ອາດຈະເກີດຂຶ້ນກັບຄອບຄົວ ຂອງທ່ານດັ່ງເຫດການສະເທືອນໃຈ ໃຫ້ກັບພໍ່ແມ່ປະຊາຊົນ ໂດຍສະເພາະ ເດັກນ້ອຍ ຊຶ່ງມີເຫດການຜູ້ໃຫຍ່ໄວກາງຄົນໄດ້ຂົ່ມຂືນສຳເລົາເດັກຈົນເຖິງຂັ້ນ ເສຍຊີວິດທີ່ແຂວງສາລະວັນ.
ອີງຕາມແຫຼ່ງຂ່າວຈາກແຂວງສາລະວັນລາຍງານໃຫ້ຮູ້ວ່າ: ວັນທີ 12 ຕຸລາ ຜ່ານມາ ສານປະຊາຊົນແຂວງສາລະວັນ ໄດ້ຕັດສິນຄະດີຜູ້ໃຫຍ່ຂົ່ມຂືນທຳສຳເລົາ ເດັກນ້ອຍ ອັນເຮັດໃຫ້ຜູ້ເຄາະຮ້າຍເຖິງ ຂັ້ນເສຍຊີວິດ ໂດຍມີຄະນະສານປະຊາຊົນ, ຕາງໜ້າອົງການໄອຍະການປະຊາຊົນແຂວງ, ນາຍບ້ານ ແລະຍາດຕີພີ່ນ້ອງ ເຂົ້າຮ່ວມເປັນສັກຂີພິຍານ.
ຄະດີນີ້ໄດ້ເກີດຂຶ້ນໃນເວລາປະມານ 13: 00 ໂມງ ຂອງວັນທີ 20 ມິຖຸນາ 2016 ຊຶ່ງທ້າວ ດົງ (ຈໍາເລີຍ) ອາຍຸ 43 ປີ, ອາຊີບກໍາມະກອນ ບ້ານວັດກາງ ໄດ້ຂີ່ລົດຈັກໄປຫຼິ້ນນໍາ ທ້າວ ຈ່ອຍ ຢູ່ບ້ານ ຫຼັກ 2 ເມື່ອໄປຮອດບ່ອນເກີດເຫດ ທ້າວ ດົງ ໄດ້ແນມເຫັນ ນາງ ໃຫຍ່ (ນາມສົມມຸດ) ອາຍຸ 12 ປີ ອາບນໍ້າຢູ່ໜອງສະ ກັບໝູ່ 2 ຄົນ, ຈໍາເລີຍຈິ່ງໄດ້ຈັບເອົາກ້ອນຫີນ ແກວ່ງລົງໜອງນ້ຳ ແລ້ວກັວກມືເອີ້ນເອົາ ນາງ ໃຫຍ່ ຊວນເຂົ້າໄປໃນປ່າຫ່າງຈາກ ໜອງປະມານ 100 ແມັດ ແລ້ວຂົ່ມຂືນ ທຳສຳເລົາ.
ຫຼັງຈາກນັ້ນຜູ້ກ່ຽວໄດ້ເຫັນວ່າມີ ເລືອດໄຫຼອອກມາຈາກຊ່ອງຄອດຂອງ ເດັກ ທ້າວ ດົງ ໄດ້ຢຸດເຊົາແລ້ວນັ່ງຄິດຢູ່ດົນພໍສົມຄວນແຕ່ເລືອດຍັງໄຫຼອອກມາບໍ່ຢຸດ ຈາກນັ້ນໄດ້ພາໄປລ້າງເລືອດຢູ່ ໜອງນໍ້າແລ້ວນັ່ງພັກຜ່ອນປະມານ 1-2 ຊົ່ວໂມງ ຜູ້ເຄາະຮ້າຍໄດ້ບອກກັບຈໍາເລີຍ ວ່າເມື່ອຍ ທ້າວ ດົງ ຄິດຢ້ານເລີຍເອົາ ໄປສຸກສາລາແຕຢໍ ເມືອງຕຸ້ມລານ ແຕ່ ແພດແນະນໍາໃຫ້ໄປໂຮງເມືອງຕຸ້ມລານ ແຕ່ທາງໂຮງໝໍເມືອງໄດ້ແນະນໍາເອົາ ໄປໂຮງໝໍແຂວງ ມາຮອດເວລາ 4:00 ໂມງຂອງວັນທີ 21 ມິຖຸນາ 2016 ນາງ ໃຫຍ່ ກໍໄດ້ເສຍຊີວິດຍ້ອນຂາດເລືອດ.
ຕໍ່ເຫດການດັ່ງກ່າວ ສານປະຊາຊົນ ແຂວງສາລະວັນ ໄດ້ຕັດສິນລົງໂທດ ທ້າວ ດົງ ມີຄວາມຜິດເຫັນຕາມມາດຕາ 128 ວັກ 4 ແລະມາດຕາ 41 ຂໍ້ 4 ຂອງກົດໝາຍອາຍາ ດ້ວຍເຫດນີ້ ສານປະຊາຊົນ ໄດ້ລົງໂທດຕັດອິດສະຫຼະພາບຈໍາຄຸກ 15 ປີ ພ້ອມທັງປັບໃໝເປັນເງິນ 13 ລ້ານກີບ.
ຂ່າວ: ເສດຖະກິດ-ສັງຄົມ