spot_img
Homeຂ່າວເຫດການຄະນະຜູ້ແທນ ສຳເລັດການເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ອາຊຽນ-ອີຢູ ຄັ້ງທີ 21

ຄະນະຜູ້ແທນ ສຳເລັດການເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ອາຊຽນ-ອີຢູ ຄັ້ງທີ 21

Published on

ໃນວັນທີ 13-14 ຕຸລາ 2016, ທ່ານ ສະເຫຼີມໄຊ ກົມມະສິດ, ລັດຖະມົນຕີຕ່າງປະເທດແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ຄັ້ງທີ 21 ຈັດຂຶ້ນທີ່ບາງກອກ, ປະເທດໄທ, ພາຍໃຕ້ການເປັນປະທານຮ່ວມຂອງໄທ ແລະ ອີຢູ.
ກອງປະຊຸມໄດ້ສະແດງຄວາມເພິ່ງພໍໃຈຕໍ່ໝາກຜົນຂອງການພົວພັນຮ່ວມມືອາຊຽນ-ອີຢູ ໃນໄລຍະຜ່ານມາ ໂດຍສະເພາະແມ່ນດ້ານການຄ້າ, ການລົງທຶນ ແລະ ອື່ນໆ. ອີຢູເປັນຄູ່ຄ້າໃຫຍ່ອັນດັບສອງຂອງ
ອາຊຽນ ຊຶ່ງມູນຄ່າການຄ້າສອງຝ່າຍບັນລຸໄດ້  272.6 ຕື້ໂດລາສະຫະລັດ (246 ຕື້ ເອີໂຣ) ໃນປີ 2014 ແລະ ອາຊຽນ ກໍເປັນຄູ່ຄ້າໃຫຍອັນດັບສາມຂອງອີຢູ ແລະ ອີຢູ ກໍເປັນຜູ້ລົງທຶນໂດຍກົງລາຍໃຫຍ່ຂອງອາຊຽນ ຊຶ່ງມີມູນຄ່າສະເລ່ຍ 20.9 ຕື້ ໂດລາສະຫະລັດ (19 ຕື້ ເອີໂຣ) ໃນແຕ່ລະປີ ນັບແຕ່ປີ 2012 ເປັນຕົ້ນມາ.
ກອງປະຊຸມ ຍັງໄດ້ທົບທວນຄືນການຈັດຕັ້ງປະຕິບັດບັນດາໂຄງການການຮ່ວມມື ລະຫວ່າງ ອາຊຽນ ແລະ ອີຢູ ທີ່ຢູ່ພາຍໃຕ້ແຜນປະຕິບັດງານບັນດາສິຣິ ເບກາວັນ (2013-2017) ຊຶ່ງເຫັນວ່າໄດ້ຮັບຜົນສໍາເລັດໃນຫຼາຍດ້ານເປັນຕົ້ນແມ່ນດ້ານການຄ້າ, ການລົງທຶນ, ການສຶກສາ, ການແລກ ປ່ຽນຂໍ້ມູນຂ່າວສານ, ວິທະຍາສາດ-ເຕັກໂນໂລຊີ, ການບິນ, ການເຊື່ອມຈອດ ແລະ ອື່ນໆ. ພ້ອມກັນນີ້, ບັນດາລັດຖະມົນຕີຕ່າງປະເທດອາຊຽນ-ອີຢູ ໄດ້ເຫັນດີໃຫ້ເພີ້ມທະວີການຮ່ວມມືກັນຫຼາຍຂຶ້ນຕື່ມໃນດ້ານການເຊື່ອມຈອດ, ການໄປມາຫາສູ່ກັນຂອງປະຊາຊົນສອງພາກພື້ນ, ການບິນ, ການຄ້າ, ການລົງທຶນ, ການຮັບມືໄພພິບັດ, ການຕ້ານການກໍ່ການຮ້າຍ ແລະ ລັດທິຫົວຮຸນ ແຮງ  ແລະ ອື່ນໆ. ບັນດາລັດຖະມົນຕີຕ່າງປະເທດອາຊຽນກໍໄດ້ສະແດງຄວາມຊົມເຊີຍຕໍ່ການປະກອບສ່ວນຂອງອີຢູເຂົ້າໃນຂະບວນການສ້າງປະຊາຄົມອາຊຽນກໍຄືການເຊື່ອມໂຍງ ແລະ ການເຊື່ອມຈອດອາຊຽນ ແລະ ສະ ແດງຄວາມຍິນດີຕໍ່ຄວາມໝາຍໝັ້ນຂອງອີຢູ ທີ່ຈະສືບຕໍ່ໃຫ້ການສະໜັບສະໜູນແຜນວຽກຂອງຂໍ້ລິເລີ່ມການເຊື່ອມໂຍງອາຊຽນໄລຍະສາມ ແລະ ແຜນແມ່ບົດເພື່ອການເຊື່ອມຈອດອາຊຽນ 2025 ຊຶ່ງຜູ້ນໍາອາຊຽນໄດ້ຮັບຮອງເອົາຢູ່ກອງ ປະຊຸມສຸດຍອດອາຊຽນ ຄັ້ງທີ 28 ໃນວັນທີ 6 ກັນຍາ 2016 ທີ່ ນະ ຄອນຫຼວງວຽງຈັນ, ສປປ ລາວ.
ບັນດາລັດຖະມົນຕີຕ່າງປະເທດອາຊຽນ ແລະ ອີຢູ ຍັງໄດ້ແລກປ່ຽນຄຳຄິດເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນເປັນຕົ້ນແມ່ນສະພາບການການຢູ່ຕາເວັນອອກກາງ, ການປ່ຽນແປງສະພາບດິນຟ້າອາກາດ, ການກໍ່ການຮ້າຍ, ການຄ້າມະນຸດ  ແລະ ອື່ນໆ.
ກອງປະຊຸມ ໄດ້ຮັບຮອງເອົາຖະແຫຼງການບາງກອກ ວ່າດ້ວຍການສົ່ງເສີມການເປັນຄູ່ຮ່ວມສາກົນ ລະຫວ່າງ ອາຊຽນ ແລະ ອີຢູ ເພື່ອກ້າວໄປສູ່ການຍົກລະດັບຂຶ້ນເປັນຄູ່ຮ່ວມຍຸດທະສາດໃນອະນາຄົດ “Bangkok Declaration on Promoting an ASEAN-EU Global Partnership for Shared Strategic Goals”. ກອງປະຊຸມຍັງ ໄດ້ເຫັນດີຈັດກິດຈະກໍາສະເຫຼີມສະຫຼອງການພົວພັນຮ່ວມມື ອາຊຽນ-ອີຢູ ຄົບຮອບ 40 ປີ ໃນປີ 2017.

ໃນໄລຍະເຂົ້າຮ່ວມກອງປະຊຸມ, ຫົວໜ້າຄະນະຜູ້ແທນຂອງ ສປປ ລາວ ຍັງໄດ້ພົບສອງຝ່າຍກັບລັດຖະມົນຕີຕ່າງປະເທດຂອງໂຮນລັງ, ຮົງກາລີ, ຣູມານີ, ເອສໂຕນີ, ສະໂລວັກ; ຮອງລັດຖະມົນຕີຕ່າງປະເທດໂປໂລຍ, ຝຣັ່ງ ແລະ ຫວຽດນາມ ເພື່ອທົບທວນຄືນການຮ່ວມມືສອງຝ່າຍໃນໄລະຜ່ານມາ ພ້ອມທັງປຶກສາຫາລືເພື່ອວາງທິດທາງໃນການເພີ່ມທະວີການຮ່ວມມືໃນຂອບສອງຝ່າຍ ແລະ ໃນຂອບ ອາຊຽນ-ອີຢູ ໃນອະນາຄົດໃຫ້ນັບມື້ນັບຂະຫຍາຍຕົວຍິ່ງຂຶ້ນ.

ຂ່າວ: ລາວພັດທະນາ

ບົດຄວາມຫຼ້າສຸດ

ປະກາດ-ແຕ່ງຕັ້ງ ສະຫາຍ ພົນຈັດຕະວາ ແປ້ນຄໍາ ບຸດຈັດແພງ ຮັກສາການແທນເຈົ້າແຂວງ ແຂວງບໍ່ແກ້ວ (ຜູ້ໃໝ່)

ມອບ-ຮັບ ໜ້າທີ່ ລະຫວ່າງ ເລຂາຄະນະບໍລິຫານງານພັກແຂວງ, ເຈົ້າແຂວງ ແຂວງບໍ່ແກ້ວ (ຜູ້ເກົ່າ) ກັບ ຮັກສາການແທນເລຂາຄະນະບໍລິຫານງານພັກແຂວງ, ຮັກສາການເຈົ້າແຂວງ ແຂວງບໍ່ແກ້ວ (ຜູ້ໃໝ່) ປະກາດ ແລະ ມອບ-ຮັບ...

ຍີ່ປຸ່ນກຽມຮັບມື! ສຶນາມິສູງເຖິງ 3 ແມັດ ຫຼັງຈາກເກີດເຫດແຜ່ນດິນໄຫວລະດັບ 8.7 ຣິກເຕີ.

ຍີ່ປຸ່ນສັ່ງອົບພະຍົບປະຊາຊົນຫຼາຍພັນຄົນ ພາຍຫຼັງພົບຄຶ້ນສຶນາມິພັດເຂົ້າຝັ່ງ ເຈົ້າໜ້າທີ່ຄາດວ່າຄຶ້ນອາດຈະສູງເຖິງ 3 ແມັດ. ສຳນັກຂ່າວໃນປະເທດຍີ່ປຸ່ນລາຍງານໃນວັນທີ 30 ກໍລະກົດ 2025 ຜ່ານມາ, ຍີ່ປຸ່ນກຍມຮັບມືກັບສຶນາມິທີ່ເລີ່ມພັດເຂົ້າຊາຍຝັ່ງອີກຮອບ ໂດຍຄາດການວ່າ: ຄຶ້ນອາດຈະສູງເຖິງ 3 ແມັດ,...

ລາຄານໍ້າປະປາ ຢູ່ແຂວງວຽງຈັນເພີ່ມຂຶ້ນ ເນື່ອງຈາກລາຄານຳເຂົ້າອຸປະກອນ ເພີ່ມຂຶ້ນເທົ່າຕົວ

ປັບລາຄາຂຶ້ນຄັ້ງທຳອິດ! ລາຄານໍ້າປະປາ ຢູ່ແຂວງວຽງຈັນເພີ່ມຂຶ້ນ ເນື່ອງຈາກລາຄານຳເຂົ້າອຸປະກອນ ເພີ່ມຂຶ້ນເທົ່າຕົວ. ແຫຼ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ປັດຈຸບັນ ໄດ້ເກີດມີຫາງສຽງຈົ່ມວ່າ ຈາກພໍ່ແມ່ປະຊາຊົນ ກໍຄືສື່ສັງຄົມອອນລາຍ ກ່ຽວກັບການປັບຂຶ້ນລາຄາຄ່ານ້ຳປະປາ ຢູ່ພາຍໃນແຂວງວຽງຈັນ, ຕໍ່ກັບບັນຫາດັ່ງກ່າວ,...

ຣັດເຊຍເກີດແຜ່ນດິນໄຫວຮຸນແຮງລະດັບ 8.7 ຣິກເຕີ ທາງດ້ານຍີ່ປຸ່ນກຽມຮັບມືກັບຄຶ້ນໃຫຍ່ສຶນາມິ

ທາງການຣັດເຊຍເປີດເຜີຍ: ຄຶ້ນສຶນາມິສູງ 3-4 ແມັດ ພັດເຂົ້າສູ່ແຄມຝັ່ງທາງຕາເວັນອອກ ຫຼັງເກີດແຜ່ນດິໄຫວລະດັບ 8.7 ຣິກເຕີ ເບື້ອງຕົ້ນບໍ່ມີລາຍງານຜູ້ເສຍຊີວິດ ແລະ ບາດເຈັບ. ອີງຕາມສຳນັກຂ່າວຕ່າງປະເທດລາຍງານໃນວັນທີ 30 ກໍລະກົດ 2025,...