ເຮືອທະນາຄານຮ່ວມພັດທະນາ ຈາກບ້ານທ່ານາແລ້ງ ແຊງ ລາວໂຕໂຢຕ້າ ຈາກບ້ານຕານປ່ຽວ ຕັ້ງແຕ່ໄລຍະ 400 ແມັດທໍາອິດ ເຂົ້າເສັ້ນໄຊໄປໃນທີ່ສຸດ ຄວ້າແຊັມເຮືອປະເພນີຊາຍ ໃນການແຂ່ງຂັນຊ່ວງເຮືອປະຈໍາປີ 2016 ທີ່ທ່າວັດຈັນ ນະຄອນຫຼວງວຽງຈັນ ໃນຕອນແລງຂອງວັນທີ 17 ຕຸລາທີ່ຜ່ານມາ.

ໃນຮອບຮອງຊະນເລີດ ເຮືອທະນາຄານຮ່ວມພັດທະນາ ແຊງ ເຮືອແສງມະນີ ເຂົ້າເສັ້ນໄຊ ຜ່ານເຂົ້າຮອບຊີງຊະນະເລີດ ພົບກັບ ເຮືອລາວໂຕໂຢຕ້າທີ່ດັບຝັນແຊັມເກົ່າ ເຮືອຫຼວງພະບາງທີ່ຫວັງເອົາຂັນກັບບ້ານ ເພາະເຄີຍໄດ້ແຊັ້ມມາສອງສະໄໝຕິດຕໍ່ກັນແລ້ວ ກ່ອນທີ່ໃນຮອບຊິງຊະນະເລີດ ເຮືອຂອງທະນາຄານຮ່ວມພັດທະນາ ຈະເອົາຊະນະເຮືອຂອງລາວໂຕໂຢຕ້າຄ້ວາແຊັ້ມປີນີ້ໄປຄອງ ສ່ວນເຮືອຫຼວງພະບາງໄດ້ທີ່ 3 ແລະ ເຮືອແສງມະນີໄດ້ທີ 4

ສ່ວນການແຂ່ງຂັນເຮືອປະເພນີຍິງ ຊະນະເລີດຕົກເປັນຂອງບ້ານແສນດິນ, ອັນດັບສອງ ເຮືອລາວໂຕໂຢຕ້າ, ອັນດັບທີສາມ ເຮືອເມືອງຈັນທະບູລີ ແລະ ອັນດັບທີສີ່ແມ່ນເຮືອຈາກຫາດກ້ຽງ

ແລະການແຂ່ງຂັນເຮືອສູດຊາຍ (ເຮືອດັດແປງ) ຊະນະເລີດຕົກເປັນຂອງເຮືອນາວາສັກສິດ ຈາກບ້ານ ໄຊສະຖານ, ອັນດັບທີສອງ ເຮືອພອນພະແກ້ວ ຈາກບ້ານສີຖານໃຕ້, ສ່ວນອັນດັບທີສາມເປັນຂອງເຮືອເທບທິດາສ້ອຍຟ້າ (M150) ແລະ ອັນດັບທີສີ່ເປັນຂອງເຮືອ ນາງສາວຍອດຄຳ ຈາກບ້ານຈອມແຈ້ງ

ຂ່າວຈາກ: ຂ່າວເສດຖະກິດ-ການຄ້າ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!