ຂປລ. ວັນທີ 12 ຕຸລາ 2016 ນີ້, ແຂວງເຊກອງ ເປີດເຜີຍແຜນພັດທະນາເສດຖະກິດ-ສັງຄົມວ່າ ຕົນເອງໄດ້ຕັ້ງເປົ້າໝາຍສູ້ຊົນ ການຜະລິດສະບຽງອາຫານ ໂດຍສະເພາະແມ່ນເຂົ້າ ເພື່ອຮອງຮັບການເພີ່ມຂຶ້ນຂອງປະຊາກອນຮອດປີ 2020 ປະມານ 1 ແສນກວ່າຄົນ, ໃນເນື້ອທີ່ສູ້ຊົນ 12 ພັນກວ່າເຮັກຕາ, ຜົນຜະລິດໃຫ້ໄດ້ 60 ພັນໂຕນ.
ທ່ານ ທອງຄຳ ມະນີວົງ ຫົວໜ້າພະແນກແຜນການ ແລະ ການລົງທຶນ ແຂວງເຊກອງ ໃຫ້ຮູ້ວ່າ: ຄາດຄະເນໃນປີ 2020 ແຂວງເຊກອງ ຈະມີພົນລະເມືອງປະມານ 123.300 ຄົນ ໃນເວລານັ້ນຄວາມຕ້ອງການສະບຽງອາຫານ ໂດຍສະເພາະແມ່ນເຂົ້າເປືອກ ຄາດວ່າຈະມີເຖິງ 58.904 ໂຕນ ແລະ ເປັນຄັງແຮ 200 ໂຕນ ລວມທັງໝົດບໍ່ໃຫ້ຫຼຸດ 59.104 ໂຕນ, ສະນັ້ນ ຕ້ອງການເນື້ອທີ່ການຜະລິດທັງສອງລະດູປະມານ 12.445 ເຮັກຕາ, ພ້ອມສູ້ຊົນຍົກຜະລິດຕະພັນໃຫ້ໄດ້ຢ່າງໜ້ອຍ 4,7-5 ໂຕນຕໍ່ເຮັກຕາ.
ຄຽງຄູ່ກັບການຜະລິດເຂົ້າ ກໍຊຸກຍູ້ປະຊາຊົນລ້ຽງສັດປະເພດຕ່າງໆ ເພື່ອຜະລິດຊີ້ນ, ປາ ແລະ ໄຂ່ ສະໜອງຕະຫຼາດໃຫ້ພຽງພໍ ແລະ ສາມາດແກ້ໄຂຊີວິດການເປັນຢູ່ຂອງປະຊາຊົນ ໃຫ້ໄດ້ທັງໝົດ 8.145 ໂຕນ, ສະເລ່ຍການບໍລິໂພກຊີ້ນ, ປາ, ໄຂ່ ໃຫ້ໄດ້ປະມານ 62 ກິໂລຕໍ່ຄົນຕໍ່ປີ, ໃນນັ້ນ ເຂດຕົວເມືອງ ໃຫ້ໄດ້ 72 ກິໂລ ແລະ ເຂດຊົນນະບົດ ໃຫ້ໄດ້ 52 ກິໂລ. ສ່ວນການຜະລິດເປັນສິນຄ້າ, ຫົວໜ້າພະແນກແຜນການ ແລະ ການລົງທຶນ ກ່າວວ່າ: ສູມໃສ່ພືດທີ່ເປັນທ່າແຮງ ແລະ ມີຕະຫຼາດຮອງຮັບໃຫ້ໄດ້ໃນເນື້ອທີ່ 19.957 ເຮັກຕາ, ຜົນຜະລິດລວມ 128.130 ໂຕນ, ໃນນີ້ເນື້ອທີ່ປູກກາເຟ 11.420 ເຮັກຕາ, ຜົນຜະລິດ 39.970 ໂຕນ; ພືດຜັກ 862 ເຮັກຕາ, ຜົນຜະລິດ 19.476 ໂຕນ; ສາລີແຂງ 513 ເຮັກຕາ, ຜົນຜະລິດ 5.130 ໂຕນ; ອ້ອຍ 140 ເຮັກຕາ, ຜົນຜະລິດ 1.820 ໂຕນ; ຖົ່ວດິນ-ຖົ່ວເຫຼືອງ 845 ເຮັກຕາ, ຜົນຜະລິດ 1.100 ໂຕນ; ມັນຕົ້ນ 790 ເຮັກຕາ, ຜົນຜະລິດ 12.640 ໂຕນ; ສາລີຫວານ 1.268 ເຮັກຕາ, ຜົນຜະລິດ 5.542 ເຮັກຕາ; ເຜືອກ-ມັນ 1.111 ເຮັກຕາ, ຜົນຜະລິດ 11.388 ໂຕນ; ປະເພດໄມ້ໃຫ້ໝາກ 668 ເຮັກຕາ, ຜົນຜະລິດ 21.767 ໂຕນ ແລະ ພືດອື່ນໆ 1.260 ເຮັກຕາ, ຜົນຜະລິດ 9.387 ໂຕນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!