ສຳນັກຂ່າວຕ່າງປະເທດ ລາຍງານໃນວັນທີ 12 ຕຸລາຜ່ານມານີ້ວ່າ ທ່ານ ເກິ່ງ ສ່ວງ ໂຄສົກກະຊວງການຕ່າງປະເທດຈີນ ໄດ້ອອກມາຖະແຫລງວ່າ ທ່ານ ໂຣດຣິໂກ ດູເຕີເຕ ປະທານາທິບໍດີ ແຫ່ງ ຟິລິບປິນ ຈະເດີນທາງຢ້ຽມຢາມ ສາທາລະນະລັດປະຊາຊົນຈີນ ໃນວັນທີ 18-21 ຕຸລານີ້ ເພື່ອຮັດແໜ້ນການພົວພັນຮ່ວມມືລະຫວ່າງສອງປະເທດ ໂດຍມີກຳນົດເຂົ້າພົບປະຫາລືກັບ ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ຫລີເຄີ່ສຽງ ນາຍົກລັດຖະມົນຕີຈີນອີກດ້ວຍ.
ດ້ານແຫລ່ງຂ່າວຂອງຟິລິບປິນ ໄດ້ເປີດເຜີຍວ່າ ຮ່ວມເດີນທາງຢ້ຽມຢາມໃນຄັ້ງນີ້ ຈະມີນັກທຸລະກິດຂອງຟິລິບປິນ ປະມານ 250 ຄົນ ເດີນທາງໄປຍັງນະຄອນຫລວງປັກກິ່ງ ເພື່ອຫາລືກັບຜູ້ນຳທຸລະກິດ ແລະ ເຈົ້າໜ້າທີ່ລັດຖະບານຈີນ ກ່ຽວກັບຂໍ້ຕົກລົງຮ່ວມມືທາງເສດຖະກິດຕ່າງໆ ນັບຕັ້ງແຕ່ການລົດໄຟ ໄປຈົນເຖິງການກໍ່ສ້າງ, ການທ່ອງທ່ຽວ, ກະສິກຳ, ພະລັງງານ ແລະ ອຸດສາຫະກຳປຸງແຕ່ງ.
ການຢ້ຽມຢາມຈີນຂອງ ປະທານາທິບໍດີຟິລິບປິນ ໃນຄັ້ງນີ້ ຖືເປັນການຢ້ຽມຢາມຢ່າງເປັນທາງການ ເປັນປະເທດທຳອິດ ພາຍຫລັງເຂົ້າຮັບຕຳແໜ່ງປະທານາທິບໍດີຂອງ ທ່ານ ໂຣດຣິໂກ ດູເຕີເຕ ນັບຕັ້ງແຕ່ວັນທີ 30 ມິຖຸນາທີ່ຜ່ານມາ ຊຶ່ງເປັນການເຄື່ອນໄຫວໃນທາງສັນຍາລັກ ທີ່ເນັ້ນຢ້ຳລຳດັບຄວາມສຳຄັນ ທາງນະໂຍບາຍການຕ່າງປະເທດ ທີ່ຫັນເຫອອກຈາກອາເມຣິກາ ແລະ ພັດທະນາຄວາມສຳພັນກັບຈີນແທນ.
ຕິດຕາມເຮົາທາງFacebook ກົດຖືກໃຈເລີຍ!