ສຳນັກຂ່າວຕ່າງປະເທດ ລາຍງານໃນວັນທີ 12 ຕຸລາຜ່ານມານີ້ວ່າ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ກຽມເຊັນປະກາດໃຊ້ ກົດໝາຍຄວບຄຸມຢາສູບ ໂດຍຈະຫ້າມປະຊາຊົນສູບຢາ ໃນພື້ນທີ່ສາທາລະນະທຸກແຫ່ງ ໃນຂອບເຂດທົ່ວປະເທດ ບໍ່ວ່າຈະເປັນສວນສາທາລະນະ, ປ້າຍລົດເມ ຈົນເຖິງໃນຍານພາຫະນະ ເຫລົ່ານີ້ເປັນຕົ້ນ ຊຶ່ງຈະກາຍເປັນກົດໝາຍຄວບຄຸມຢາສູບ ທີ່ມີຄວາມເຂັ້ມງວດທີ່ສຸດໃນພາກພື້ນ.
ທ່ານ ພໍລິນ ຍິນ ໂຣເຊວ-ອູບຽນ ລັດຖະມົນຕີກະຊວງສາທາລະນະສຸກຟິລິບປິນ ໄດ້ໃຫ້ສຳພາດກັບສຳນັກຂ່າວຣອຍເຕີ ໃນວັນທີ 11 ຕຸລາຜ່ານມານີ້ວ່າ ກົດໝາຍຄວບຄຸມຢາສູບສະບັບນີ້ ຄາດວ່າຈະໄດ້ຮັບການລົງນາມໂດຍ ປະທານາທິບໍດີ ດູເຕີເຕ ພາຍໃນທ້າຍເດືອນຕຸລາ ແລະ ຈະມີຜົນບັງຄັບໃຊ້ທັນທີ ໃນເດືອນພະຈິກປີນີ້.
ທັງນີ້ ອີງຕາມບົດລາຍງານຂອງ ມູນນິທິ SEATCA (Southeast Asia Tobacco Control Alliance) ໄດ້ລາຍງານໃນປີ 2014 ຜ່ານມາພົບວ່າ ມີຊາວຟິລິບປິນສູບຢາກວ່າ 17 ລ້ານຄົນ ຊຶ່ງກວມເອົາເກືອບ 1/3 ຂອງຈຳນວນປະຊາກອນຜູ້ໃຫຍ່ທັງໝົດ ແລະ ຫລາຍເປັນອັນດັບທີ 2 ຂອງອາຊຽນ ຮອງຈາກປະເທດອິນໂດເນເຊຍ.
ຕິດຕາມເຮົາທາງFacebook ກົດຖືກໃຈເລີຍ!