5 ປະເທດຍັກໃຫຍ່ແນວໜ້າຂອງໂລກ ໃນນາມກຸ່ມ ບຣິກ (BRICS) ປະກາດຕັ້ງທະນາຄານແຫ່ງໃໝ່
ໃນວົງເງິນ 100 ຕື້ໂດລາ ປ່ອຍກູ້ຊ່ວຍເຫຼືອປະເທດກຳລັງພັດທະນາ ແຂ່ງກັບທະນາຄານໂລກ ແລະ IMF.
ສຳນັກຂ່າວຕ່າງປະເທດລາຍງານ ໃນມື້ນີ້ (16 ກໍລະກົດ) ວ່າ ບັນດາຜູ້ນຳ 5 ປະເທດລະດັບແນວໜ້າ
ຂອງໂລກ ເຊິ່ງປະກອບດ້ວຍ ບຣາຊິນ, ຣັດເຊຍ, ອິນເດຍ, ຈີນ ແລະ ອາຟຣິກກາໃຕ້ ໃນນາມກຸ່ມປະ
ເທດບຣິກ (BRICS countries) ໄດ້ຈັບມືລົງນາມຈັດຕັ້ງທະນາຄານແຫ່ງໃໝ່ ” ທະນາຄານເພື່ອການ
ພັດທະນາ ” ໃນວົງເງິນລົງທຸນຮ່ວມມະຫາສານ ນັບ 100 ຕື້ໂດລາສະຫະລັດ ເພື່ອປ່ອຍກູ້ຊ່ວຍເຫຼືອ
ບັນດາປະເທດກຳລັງພັດທະນາ ແລະ ແນ່ນອນວ່າ ເພື່ອຫວັງແຂ່ງກັບທະນາຄານໂລກ ແລະ ກອງທຶນ
ການເງິນລະຫວ່າງປະເທດ ຫຼື IMF.
ປະທານາທິບໍດີ ດິນມາ ຣູສເຊບ ແຫ່ງບຣາຊິນ ເປັນຜູ້ປະກາດກໍ່ຕັ້ງທະນາຄານ ລະຫວ່າງ 5 ຜູ້ນຳກຸ່ມ
ບຣິກ ເຊິ່ງປະກອບດ້ວຍ: ທ່ານນາງ ດິນມາ ຣຸສເຊບ ປະທານາທິບໍດີບຣາຊິນ, ປະທານາທິບໍດີ ປູຕິນ
ແຫ່ງຣັດເຊຍ, ນາຍົກລັດຖະມົນຕີ ນະເຣນທາ ໂມດີ ແຫ່ງປະເທດອິນເດຍ, ປະທານາທິບໍດີ ສີຈິ້ນຜິງ
ຂອງຈີນ ແລະ ປະທານາທິບໍດີ ຈາຄອບ ຊູມາ ແຫ່ງອາຟຣິກາໃຕ້ ເຊິ່ງໄດ້ມາຮ່ວມປະຊຸມສຸດຍອດຂອງ
ກຸ່ມ ທີ່ເມືອງຟໍຕາເລຊາ ປະເທດບຣາຊິນ ເມື່ອວັນອັງຄານທີ່ຜ່ານມາ (15 ກໍລະກົດ) ໂດຍສຳນັກງານ
ໃຫຍ່ຂອງທະນາຄານ ຈະຕັ້ງຢູ່ໃນນະຄອນຊຽງໄຮ້ ສປ ຈີນ ແລະ ປະທານທະນາຄານຄົນທຳອິດ ຈະມາ
ຈາກປະເທດອິນເດຍ ແລະ ຈາກນັ້ນຈະສະຫຼັບກັນປ່ຽນໝູນວຽນໄປແຕ່ລະປະເທດ.
ສຳລັບເຈຕະນາໃນການກໍ່ຕັ້ງທະນາຄານແຫ່ງໃໝ່ຂອງກຸ່ມນີ້ ເຊິ່ງລວມເຖິງການຈັດຕັ້ງກອງທືນຊ່ວຍ
ເຫຼືອສຸກເສີນ ເພື່ອຕ້ອງການໃຫ້ເງິນກູ້ຊ່ວຍເຫຼືອແກ່ປະເທດກຳລັງພັດທະນາທັງຫຼາຍ ສາມາດຈະຫຼີກ
ລ່ຽງປັນຫາການກູ້ຢືມເງິນໄລຍະສັ້ນ ລວມເຖິງຕ້ອງການສົ່ງເສີມຄວາມຮ່ວມມື, ການສ້າງຄວາມເຂັ້ມ
ແຂງຂອງລະບົບເຄືອຂ່າຍຄວາມປອດໄພການເງິນໂລກ ແລະ ສົ່ງເສີມການພົວພັນລະຫວ່າງປະເທດ.
ຂະນະດຽວກັນ ກຸ່ມປະເທດບຣິກ ໄດ້ວິພາກວິຈານທະນາຄານໂລກ ແລະ ໄອເອັມເອັບວ່າ ບໍ່ໃຫ້ສິດທິແກ່
ບັນດາປະເທດກຳລັງພັດທະນາເທົ່າທີ່ຄວນ ໂດຍເງິນກູ້ກ້ອນທຳອິດຂອງທະນາຄານແຫ່ງການພັດທະ
ນາ ຈະປ່ອຍກູ້ໃຫ້ແກ່ປະເທດກຳລັງພັດທະນານັ້ນ ຈະເລີ່ມຕົ້ນທີ່ 50 ຕື້ໂດລາ.