ຂໍ້ມູນຈາກສຳນັກງານບໍລິຫານຈັດການໄພພິບັດແຫ່ງຊາດຟີລິບປິນ ຢືນຢັນວ່າ ໃນຂະນະນີ້ຄວາມໄວລົມ
ທີ່ສູນກາງຂອງພາຍຸຣາມະສູນ ໄດ້ທະລຸລະດັບ 250 ກິໂລແມັດຕໍ່ຊົ່ວໂມງໄປແລ້ວ ແລະ ອິດທິພົນຂອງມັນ
ກໍ່ໃຫ້ເກີດຝົນຕົກລົງມາຢ່າງໜັກ ທົ່ວນະຄອນຫຼວງມະນີລາ ແລະ ຫຼາຍເມືອງທີ່ຢູ່ໂດຍຮອບ ທ່າມກາງ
ລາຍງານຂ່າວທີ່ລະບຸວ່າ ທາງການຟີລິບປິນ ຕ້ອງປະກາດການງົດຈ່າຍກະແສໄຟຟ້າໃນຫຼາຍພື້ນທີ່ດ້ວຍ
ເຫດຜົນດ້ານຄວາມປອດໄພ.
ລ່າສຸດມີການຢືນຢັນພົບຜູ້ເສຍຊີວິດລາຍທຳອິດ ທີ່ຕົກເປັນເຫຍື່ອໄຕ້ຝຸ່ນຣາມະສູນແລ້ວ ເຊິ່ງເປັນຍິງ
ລາຍໜຶ່ງເທິງເກາະຊາມາ ທາງພາກຕາເວັນອອກຂອງຟີລິບປິນ ຫຼັງຈາກທີ່ນາງຖືກເສົາໄຟຟ້າທີ່ຕ້ານ
ທານພາຍຸບໍ່ໄຫວຫັກໂຄ່ນລົງມາທັບ, ຢ່າງໃດກໍຕາມ ຫຼັງຈາກພົບຜູ້ເສຍຊີວິດຄົນທຳອິດບໍ່ດົນ ຕົວເລກ
ຜູ້ເສຍຊີວິດລ່າສຸດ ໄດ້ເພີ່ມຂຶ້ນເປັນຢ່າງໜ້ອຍ 11 ຄົນແລ້ວ.
ຂະນະດຽວກັນ ທາງການຟິລິບປິນເຜີຍວ່າ ຍັງຄົງບໍ່ພົບຮ່າງຂອງຊາວປະມົງ 3 ຄົນ ທີ່ສູນຫາຍໄປໃນທະເລ
ຂະນະອອກໄປຫາປານອກຊາຍຝັ່ງ ທາງພາກຕາເວັນອອກກ່ອນໜ້ານີ້ ແລະ ຄາດວ່າທັງໝົດອາດເສຍ
ຊີວິດແລ້ວ.
ທ່ານ ກໍຣາຊອນ ໂຊລິມັນ ລັດຖະມົນຕີກະຊວງສະຫວັດດີການສັງຄົມຂອງຟີລິບປິນ ອອກມາຍອມຮັບ
ວ່າ ມີປະຊາຊົນຫຼາຍກ່ວາ 450,000 ຄົນ ຕ້ອງອົບພະຍົບອອກຈາກບ້ານເຮືອນຂອງຕົນ ແລະ ເຂົ້າມາ
ພັກຢູ່ຕາມສູນພັກພິງຊົ່ວຄາວ ເຊິ່ງຄາດວ່າຈຳນວນຜູ້ອົບພະຍົບຂອງພາຍຸໄຕ້ຝຸ່ນຣາມະສູນ ອາດເພີ່ມ
ຈຳນວນຂຶ້ນອີກ ໃນ 24 ຊົ່ວໂມງຈາກນີ້.
ເມື່ອເດືອນພະຈິກປີທີ່ແລ້ວ ພື້ນທີ່ພາກກາງຂອງຟີລິບປິນ ຫາກໍປະເຊີນກັບຫາຍະນະຄັ້ງໃຫຍ່ຈາກ
ການພັດຖະຫຼົ່ມຂອງ ຊຸເປີໄຕ້ຝຸ່ນ ໄຫ່ຢ້ຽນ ເຊິ່ງເປັນເຫດໃຫ້ມີຜູ້ເສຍຊີວິດຫຼາຍກ່ວາ 7,300 ຄົນ.