ຂປລ. ນາຍົກລັດຖະມົນຕີ ໄດ້ເນັ້ນໃຫ້ຂະບວນການຂອງຊາວໜຸ່ມລາວພວກເຮົາ ຕ້ອງມີຄວາມສາມັກຄີ, ພ້ອມຈິດພ້ອມໃຈ, ທັງແຂ່ງຂັນຊຸກຍູ້ຊ່ວຍເຫລືອເຊິ່ງກັນ ແລະ ກັນ ໃນນັ້ນ ຊາວໜຸ່ມກໍຕ້ອງໄດ້ບຸກບືນຕົວໃຫ້ຫລາຍກວ່າເກົ່າ, ວ່ອງໄວ, ຟົດຟື້ນ ແລະ ໜັກແໜ້ນກວ່ານີ້ ເພື່ອພ້ອມກັນກ້າວໄປພັດທະນາປະເທດຊາດ ໃຫ້ຈະເລີນຮຸ່ງເຮືອງ.
ໃນໂອກາດພົບປະໂອ້ລົມຊາວໜຸ່ມ ແລະ ເຍົາວະຊົນ ໃນໂອກາດວັນປະກາດເອກະລາດຄົບຮອບ 71 ປີ (12 ຕຸລາ 1945-12 ຕຸລາ 2016) ທີ່ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕີລາຄາ ແລະ ຍົກໃຫ້ເຫັນເຖິງຄວາມໝາຍ ຄວາມສໍາຄັນຂອງວັນດັ່ງກ່າວ ໃນການນໍາພາຂອງພັກ ແລະ ການຕໍ່ສູ້ຂອງປະຊາຊົນລາວບັນດາເຜົ່າ ໂດຍມີຊາວໜຸ່ມເປັນກໍາລັງແຮງ ໃນຂະບວນການຕໍ່ສູ້ປົດປ່ອຍຊາດ ອອກຈາກແອກຄອບຄອງຂອງພວກລ່າເມືອງຂຶ້ນແບບເກົ່າ ແລະ ແບບໃໝ່, ນໍ້າໃຈຕໍ່ສູ້ພິລະອາດຫານ ແລະ ຄວາມເສຍສະຫລະອັນສູງສົ່ງຂອງຊາວໜຸ່ມລາວ ເຮັດໃຫ້ສາມາດຍາດເອົາເອກະລາດໃນປີ 1945 ຖືວ່າຊາວໜຸ່ມເປັນກໍາລັງແຮງຕົ້ນຕໍ ແລະ ເປັນຜູ້ສືບທອດພາລະກິດປະຕິວັດ ດັ່ງປະທານໄກສອນ ພົມວິຫານ ກ່າວໄວ້ວ່າ: “ ບໍ່ວ່າຈະເປັນຍຸກໃດສະໄໝໃດ ແລະ ສັງຄົມໃດ ຊາວໜຸ່ມໄດ້ເປັນກໍາລັງໃຫຍ່ໂຕ, ຫລວງຫລາຍ, ຂະຫຍັນຂັນແຂງ, ໃນຍຸກນັ້ນ, ສະໄໝນັ້ນ”, “ ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊຂອງຍຸກສະໄໝພວກເຮົາ ”.
ທ່ານນາຍົກລັດຖະມົນຕີ ຍັງກ່າວເນັ້ນຕື່ມວ່າ: ຊາວໜຸ່ມ ເຊິ່ງເປັນກໍາລັງແຮງປະຈັນບານຂອງພັກ, ເປັນກໍາລັງຫລັກຂອງຊາດ ທັງໃນປັດຈຸບັນ ແລະ ອະນາຄົດ ຈໍາເປັນຕ້ອງສືບຕໍ່ເດັດດ່ຽວ ແລະ ບຸກບືນປະຕິບັດພາລະໜ້າທີ່ທີ່ພັກ ແລະ ລັດມອບໝາຍໃຫ້. ຊາວໜຸ່ມ ຕ້ອງເປັນຄົນຮຽນຮູ້ຢູ່ຕະຫລອດເວລາ, ຮຽນຮູ້ຕະຫລອດຊີວິດໃຫ້ຫລາຍຂຶ້ນ, ຊາວໜຸ່ມທີ່ຢູ່ໃນອົງການຈັດຕັ້ງ ກໍຕ້ອງມີຄວາມຈົ່ງຮັກພັກດີ ເອົາໃຈໃສ່ປັບປຸງການຈັດຕັ້ງໃຫ້ໜັກແໜ້ນເຂັ້ມແຂງ ໂດຍສະເພາະແມ່ນການຈັດຕັ້ງຮາກຖານຂອງຊາວໜຸ່ມ, ຕ້ອງຊຸກຍູ້ຂະບວນການຂອງຊາວໜຸ່ມໃຫ້ກວ້າງຂວາງ, ເສີມຂະຫຍາຍບົດບາດປະຈັນບານຂອງຊາວໜຸ່ມ, ມີຫົວຄິດປະດິດສ້າງຂອງຄົນຮຸ່ນໜຸ່ມ, ຍູ້ແຮງຂະບວນການຮັກຊາດ-ພັດທະນາ ແລະ ວຽກງານ 3 ສ້າງດ້ວຍການປຸກລະດົມຂະບວນການ 4 ບຸກ ຂອງຊາວໜຸ່ມ ແລະ 3 ດີ 4 ຮູ້ຂອງເຍົາວະຊົນທັນວາ. ຂະນະດຽວກັນ, ກໍຕ້ອງກໍາແໜ້ນ ແນວທາງນະໂຍບາຍການຕ່າງປະເທດຂອງພັກ ແລະ ລັດ ແລ້ວຜັນຂະຫຍາຍຈັດຕັ້ງປະຕິບັດໃຫ້ຖືກທິດ ຮັບປະກັນທັງການຍາດແຍ່ງເອົາການສະໜັບສະໜູນ ແລະ ຊ່ວຍເຫລືອຂອງສາກົນ ແລະ ການປົກປ້ອງແນວທາງການເມືອງຂອງພັກ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!