ເຊົ້າມື້ນີ້, ວັນທີ 11 ຕຸລາ 2016 ສຳນັກຂ່າວລາວໂພສໄດ້ຮັບໂທລະສັບສາຍໜຶ່ງ ໂດຍຮຽກຮ້ອງໃຫ້ສົ່ງນັກຂ່າວໄປເບິ່ງເສັ້ນທາງໄປໂຮງໝໍແມ່ແລະເດັກເກີດໃໝ່ສູນກາງ ທີ່ຕັ້ງຢູ່ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ໂດຍບອກວ່າສະພາບເສັ້ນທາງເປ່ເພໜັກໜ່ວງ.
ພາຍຫຼັງທີ່ນັກຂ່າວພວກເຮົາລົງໄປເບິ່ງຕົວຈິງ ຈຶ່ງພົບວ່າເສັ້ນທາງລັດແຕ່ບ້ານຫ້ວຍຫົງ ຫາໂຮງໝໍແມ່ແລະເດັກເກີດໃໝ່ສູນກາງ ຄວາມຍາວເສັ້ນທາງປະທານ 3 ກິໂລແມັດ ມີສະພາບເປັນບວກເປັນຂຸມຢ່າງຮ້າຍແຮງ. ໂດຍອີງຕາມການສອບຖາມປະຊາຊົນໃນເຂດໃກ້ຄຽງບອກວ່າ ເສັ້ນທາງດັ່ງກ່າວເປັນເສັ້ນທາງທີ່ຖືກສ້າງເປັນທາງດິນແດງມາໄດ້ຫຼາຍປີ ແລະໃນໄລຍະ 2-3 ປີທີ່ຜ່ານມາ ໄດ້ມີບໍລິສັດມາລົງມືກໍ່ສ້າງ ໂດຍໄດ້ຂົນດິນມາຖົມຂຶ້ນຕື່ມແລະວາງຈຸດຕັ້ງເສົາໄຟຟ້າໄວ້ແລ້ວ ແຕ່ເສັ້ນທາງບໍ່ທັນສຳເລັດແລ້ວກໍປະປ່ອຍມາເປັນເວລາປະມານ 2 ປີແລ້ວ ເມື່ອກ່ອນຄົນບໍ່ຄ່ອຍມັກທຽວປານໃດ ແຕ່ເມື່ອເສັ້ນທາງຢາງໃຫຍ່ຈາກດົງໂດກ ຫາໜອງບຶກມີຄວາມເປ່ເພ ປະຊາຊົນຈຶ່ງມັກລັດມາທາງນີ້ເພາະເຫັນວ່າໃກ້ກວ່າ.
ໃນຂະນະທີ່ປະຊາຊົນທ່ານດັ່ງກ່າວນັ້ນເວົ້າຕື່ມວ່າ: ໂຕເອງໄດ້ຍິນຂ່າວວ່າເສັ້ນທາງໃຫຍ່ຈາກດົງໂດກຫາໜອງບຶກຈະມີການລົງມືກໍ່ສ້າງໃນໄວໆ ນີ້ ກໍເປັນຫ່ວງໃນການສັນຈອນໄປ-ມາຂອງປະຊາຊົນຢູ່ ໂດຍສະເພາະແມ່ນແມ່ມານແລະເດັກນ້ອຍທີ່ຕ້ອງທຽວໄປຝາກທ້ອງແລະປິ່ນປົວພະຍາດຢູ່ໂຮງໝໍແມ່ແລະເດັກເກີດໃໝ່ສູນກາງ.
ສ່ວນປະຊາຊົນຜູ້ທີ່ໂທຫານັກຂ່າວຄົນດັ່ງກ່າວຂ້າງເທິງ ກ່າວວ່າ ຕົນເອງກຳລັງຖືພາທ້ອງໃຫຍ່ ຮູ້ສຶກລຳບາກກັບການທຽວໄປໂຮງໝໍຕາມການນັດຂອງແພດ ຈະໄປທາງຕານມີໄຊ-ໜອງພະຍາ ເສັ້ນທາງກໍເພແລະກຳລັງຈະໄດ້ຮັບການກໍ່ສ້າງ ຈະລັດໄປແຕ່ຫ້ວຍຫົງກໍທາງເປັນບວກເປັນຂຸມຢ່າງຮ້າຍແຮງ. ໃນນາມທີ່ເປັນແມ່ມານຜູ້ໜຶ່ງ ຕາງໜ້າໃຫ້ແມ່ມານແລະເດັກນ້ອຍນັບຮ້ອຍນັບພັນຄົນ ທີ່ຕ້ອງທຽວໄປໂຮງໝໍດັ່ງກ່າວ ຂໍຮຽກຮ້ອງໃຫ້ຂັ້ນເທິງທີ່ກ່ຽວຂ້ອງຊ່ວຍເລັ່ງສ້ອມແປງເສັ້ນທາງລັດດັ່ງກ່າວນີ້ໂດຍໄວ ກ່ອນທີ່ເສັ້ນທາງໃຫຍ່ໜອງພະຍາຈະມີການກໍ່ສ້າງ ເພາະຖ້າທາງເສັ້ນນີ້(ຫ້ວຍຫົງ-ໜອງພະຍາ)ເປ່ເພໜັກ ເສັ້ນທາງເບື້ອງນັ້ນ (ດົງໂດກ-ໜອງບຶກ) ພັດກຳລັງມີການກໍ່ສ້າງ ແມ່ນອາດຈະບໍ່ສາມາດໄປເກີດລູກຢູ່ໂຮງໝໍດັ່ງກ່າວໄດ້ ທັ້ງໆ ທີ່ຕົນເອງຝາກທ້ອງຢູ່ໂຮງໝໍດັ່ງກ່າວ.
