ການປະກວດພາເຂົ້າອາຫານພື້ນເມືອງ ເນື່ອງໃນໂອກາດ ບຸນຊ່ວງເຮືອຍາວ ປະຈຳປີຂອງເມືອງ ຫົງສາ ແຂວງໄຊຍະບູລີ ແມ່ນໄດ້ຈັດຂຶ້ນ ໃນວັນທີ 8 ແລະ ວັນທີ 9 ເດືອນຕຸລາ 2016 ນີ້. ຢູ່ທີ່ເດີ່ນ ທ່ານ້ຳແກນ ບ່ອນຊ່ວງເຮືອ. ໂດໃຫ້ກຽດເຂົ້າຮ່ວມງານຄັ້ງນີ້ ມີທ່ານ ສົມສະຫວາດ ເລັ່ງສະຫວັດ ອາດີດກົມການເມືອງສູນກາງພັກ ອາດີດຮອງນາຍົກລັດຖະມົນຕີ ແຫ່ງ ສ ປປ ລາວ, ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໆ ໄຊຍະບູລີ, ມີຄະນະອຳນາດການປົກຄອງເມືອງ, ຄະນະປະທານຈັດງານບຸນຊ່ວງເຮືອປະຈຳປີ ຂອງເມືອງຫົງສາ, ມີຄະນະກຳມະການກວດກາໃຫ້ຄະແນນ, ແຂກຖືກເຊີນຈາກບັນດາເມືອງອ້ອມຂ້າງ-ໃກ້ຄຽງ ແລະ ບ້ານທີ່ມີພາເຂົ້າອາຫານພື້ນເມືອງພາຍໃນເທດສະບານເມືອງເຂົ້າຮ່ວມ.
ເຊິ່ງການປະກວດ ພາເຂົ້າອາຫານພື້ນເມືອງໃນຄັ້ງນີ້, ປະກອບມີທັງໝົດ 12 ບ້ານເຂົ້າຮ່ວມຄື: ບ້ານ ສີບຸນເຮືອງ, ບ້ານ ຈຳປາ, ບ້ານ ໂພນສະອາດ, ບ້ານ ຈອມແຈ້ງ, ບ້ານ ໂພນໄຊ, ບ້ານ ວຽງແກ້ວ, ບ້ານ ເມືອງຫານ, ບ້ານ ສີມຸງຄຸນ, ບ້ານ ໂພນຈັນ, ບ້ານ ແທ່ນຄຳ, ບ້ານ ນາແກ່ນ ແລະ ບ້ານນາສ້ານ
ການປະກວດພາເຂົ້າອາຫານພື້ນເມືອງ ແມ່ນມີເງື່ອນໄຂການໃຫ້ຄະແນນຄື: ມີອາຫານຄົບ 5 ໝູ່, ມີລົດຊາດດີ, ສະອາດຖືກຫຼັກອະນາໄມ, ການຕົບແຕ່ງອາຫານຈົບງາມ ລວມຮອດການນຸ່ງຖືເຈົ້າຂອງພາເຂົ້າອາຫານພື້ນເມືອງ. ເຊິ່ງການປະກວດຄັ້ງນີ້, ແບ່ງອອກເປັນ 2 ວັນ ຄື: ວັນທີ 8 ແລະ ວັນທີ 9, ປະກວດວັນລະ 6 ບ້ານ ລວມແລ້ວ ມີ 12 ພາເຂົ້າ ແລະ ຜົນປະກົດວ່າ: ທີ່ 1 ບ້ານ ເມືອງຫານ ໄດ້ຄະແນນຈາກກຳມະການໄປ 48 ຄະແນນ ໄດ້ລາງວັນຂັນຢາງ 1 ໜ່ວຍ ແລະ ເງິນຈຳນວນ 800.000 ກີບ, ທີ່ 2 ບ້ານ ນາແກ່ນຄຳ ໄດ້ຄະແນນຈາກກຳມະການໄປ 47 ຄະແນນ ໄດ້ລາງວັນຂັນຢາງ 1 ໜ່ວຍ ແລະ ເງິນລາງວັນ ຈຳນວນ 700.000 ກີບ, ທີ່ 3 ບ້ານ ວຽງແກ້ວ ໄດ້ຄະແນນຈາກກຳມະການໄປ 46 ຄະແນນ ໄດ້ລາງວັນຂັນຢາງ 1 ໜ່ວຍ ແລະ ເງິນລາງວັນ ຈຳນວນ 600.000 ກີບ, ສ່ວນ 9 ບ້ານດັ່ງກ່າວ ແມ່ນໄດ້ລາງວັນຊົມເຊີຍ
ຖ່າຍພາບ ແລະ ຂ່າວ: ກິດຕິສັກ ບົວໄລ