ໃນວັນທີ 5 ຕຸລາ 2016 ນີ້ ອໍານາດການປົກຄອງ ແຂວງໄຊຍະບູລີ ໄດ້ເປີດເຜີຍວ່າຕົນເອງ ໄດ້ຄັດເລືອກ ເອົາຊ້າງຄໍາຮູ້ 5 ເຊືອກ ເພື່ອເຂົ້າຮ່ວມ ສະເຫລີມສະຫລອງ ວັນອາຫານໂລກ, ວັນສາກົນ ແລະ ວັນສັບປະດາແຫ່ງຊາດ ລຶບລ້າງຄວາມທຸກຍາກ ຂະນະທີ່ ລັດຖະບານລາວ ກໍໄດ້ຕັ້ງເປົ້າໝາຍ ສູ້ຊົນຜະລິດ ສະບຽງອາຫານ, ການເຂົ້າເຖິງແຫຼ່ງສະບຽງອາຫານຂອງຊຸມຊົນ ຢ່າງຕັ້ງໜ້າເພື່ອແກ້ໄຂ ໄພອຶດຫີວ ແລະ ລຶບລ້າງຄວາມທຸກຍາກ ພາຍໃນປະເທດ ໃຫ້ຫລຸດນ້ອຍ ຖອຍລົງເທື່ອລະກ້າວ.
ທ່ານ ຄຳຫຼ້າ ຜີວວັນນາ ຫົວໜ້າ ພະແນກກະສິກຳ ແລະ ປ່າໄມ້ ແຂວງໄຊຍະບູລີ ໄດ້ຊີ້ແຈງວ່າຕົນເອງ ມີຄວາມພາກພູມໃຈ ແລະ ດີໃຈທີ່ໄດ້ຮັບກຽດ ເປັນເຂົ້າພາບຈັດງານ ສະເຫຼີມສະຫຼອງ ວັນອາຫານໂລກ, ວັນສາກົນ ແລະ ວັນສັບປະດາແຫ່ງຊາດ ລຶບລ້າງຄວາມທຸກຍາກ ຮ່ວມກັບ ກະຊວງກະສິກຳ ແລະ ປ່າໄມ້ ສະນັ້ນ ປັດຈຸບັນ ການຫ້າງຫາກະກຽມ ງານສະເຫຼີມສະຫຼອງ ວັນດັ່ງກ່າວແມ່ນມີ ຄວາມພ້ອມແລ້ວທຸກຢ່າງ ເປັນຕົ້ນແມ່ນ ໄດ້ແຕ່ງຕັ້ງອານຸກຳມະການ ຮັບຜິດຊອບທັງໝົດ 7 ອະນຸກຳມະການເຊັ່ນ: ກະກຽມເນື້ອໃນການກຳນົດ ແຂກທີ່ເຂົ້າຮ່ວມ ທັງສູນກາງ ແລະ ທ້ອງຖິ່ນ, ການປ້ອງກັນ ຄວາມສະຫງົບ, ການອານາໄມສະຖານທີ່, ການອອກແບບຕົບແຕ່ງເວທີ, ສະຖານທີ່ວາງສະແດງ, ເຂດຕະຫຼາດນັດ ແລະ ຂະບວນກ້ອນກຳລັງຕ່າງໆ ສິ່ງທີ່ຂາດບໍ່ໄດ້ແມ່ນ ໃນງານຈະໄດ້ຊົມ ການສະແດງ ກິດຈະກຳຕ່າງໆ ຂອງຊ້າງຄຳຮູ້ 5 ໂຕ.
ທ່ານ ຄຳຫຼ້າ ຜີວວັນນາ ຍັງໃຫ້ຮູ້ຕື່ມວ່າ ໃນງານສະເຫຼີມສະຫຼອງ ວັນສຳຄັນ ປີນີ້ທີ່ແຂວງໄຊຍະບູລີ ຈະມີບັນດາແຂວງ ເຂົ້າຮ່ວມທັງໝົດ 12 ແຂວງ ແລະ ໜຶ່ງນະຄອນຫຼວງ, ຈະມີຮ້ານວາງສະແດງ ສິນຄ້າທັງໝົດເກືອບ 170 ຫົວໜ່ວຍ ທີ່ມາຈາກສູນກາງ, ແຂວງ ແລະ ທ້ອງຖິ່ນ ພາຍໃນແຂວງໄຊຍະບູລີ, ສິນຄ້າທີ່ມາວາງສະແດງສ່ວນໃຫຍ່ ຈະເປັນຜະລິດຕະພັນ ກະສິກຳພືດ-ຜັກ, ໝາກໄມ້ຕ່າງໆ ຜະລິດຕະພັນຈາກສັດ, ຜະລິດຕະພັນແປຮູບ ຜົນຜະລິດກະສິກຳ ແລະ ເຄື່ອງຫັດຖະກຳຕ່າງໆ.
ນອກຈາກນີ້ຍັງ ມີການປະກວດ ອາຫານພື້ນບ້ານ ຄາດວ່າຈະມີເຖິງ 50 ກວ່າຮ້ານ, ເຊິ່ງທັງໝົດນັ້ນ ແມ່ນສະແດງໃຫ້ເຫັນເຖິງ ຄວາມຫຼາຍສີສັນຂອງ ຜະລິດຕະພັນກະສິກຳ ພາຍໃນ ແຂວງໄຊຍະບູລີ. ງານດັ່ງກ່າວ ຈະໄດ້ຈັດຂຶ້ນ ເປັນທາງການ ໃນວັນທີ 15 ຕຸລາ 2016 ນີ້ ທີ່ສະໜາມຫລວງຂອງ ແຂວງໄຊຍະບູລີ.
ຂ່າວ: ສຳນັກຂ່າວສານປະເທດລາວ