ຂປລ. ພິທີລົງນາມບົດບັນທຶກຊ່ວຍຈຳ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ກ່ຽວກັບການຮ່ວມມືພັດທະນາ ບັນດາໂຄງການໄຟຟ້ານ້ຳຕົກຢູ່ ສປປ ລາວ ແລະ ການຊື້-ຂາຍກະແສໄຟຟ້າ ລະຫວ່າງສອງປະເທດ ເຖິງປີ 2030 ມີຂຶ້ນໃນວັນທີ 5 ຕຸລາ 2016 ນີ້, ຢູ່ນະຄອນຫລວງວຽງຈັນ, ໂດຍການລົງນາມລະຫວ່າງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຈິງ ດິງ ຢູ້ງ ຮອງນາຍົກລັດຖະມົນຕີ ແຫ່ງ ສສ ຫວຽດນາມ.
ພ້ອມດຽວກັນນີ້, ຍັງໄດ້ລົງນາມ 4 ເອກະສານ ລະຫວ່າງກະຊວງທີ່ກ່ຽວຂ້ອງຂອງ ລາວ-ຫວຽດນາມ ເປັນຕົ້ນ ເອກະສານກ່ຽວກັບ ໂຄງການຊ່ວຍເຫລືອຂອງລັດຖະບານຫວຽດນາມ ແກ່ ສປປ ລາວ, ໂຄງການກໍ່ສ້າງສະຖາບັນເສດຖະກິດ-ການເງິນ ດົງຄຳຊ້າງ ໄລຍະ 3, ໂຄງການສ້າງສູນພາສາຫວຽດນາມ ຢູ່ມະຫາວິທະຍາໄລສຸພານຸວົງ ແລະ ມະຫາວິທະຍາໄລຈຳປາສັກ ແລະ ໂຄງການສ້າງແຜນແມ່ບົດຊົນລະປະທານຢູ່ສອງແຂວງຄື: ແຂວງຫົວພັນ ແລະ ແຂວງຊຽງຂວາງ.
ໃນວັນດຽວກັນນີ້, ຍັງມີພິທີພົບປະສອງຝ່າຍ ລະຫວ່າງ ສອງລັດຖະບານ ລາວ-ຫວຽດນາມ ເພື່ອປຶກສາຫາລືແລກປ່ຽນບົດຮຽນ ເຊິ່ງກັນ ແລະ ກັນໃນຫລາຍບັນຫາ ໂດຍສະເພາະບັນຫາດ້ານການພັດທະນາເສດຖະກິດ-ສັງຄົມ ແລະ ການພົວພັນຮ່ວມມືຮອບດ້ານ ລະຫວ່າງສອງປະເທດ, ໂດຍຕາງໜ້າຝ່າຍລາວ ນຳໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ຝ່າຍຫວຽດນາມ ນຳໂດຍ ທ່ານ ຈິງ ດິງ ຢູ້ງ ຮອງນາຍົກລັດຖະມົນຕີ ແຫ່ງ ສສ ຫວຽດນາມ. ທັງນີ້ແນໃສ່ສືບຕໍ່ເສີມຂະຫຍາຍ ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໄດ້ຮັບການພັດທະນາ ແລະ ແຕກດອກອອກຜົນງອກງາມຍິ່ງໆຂຶ້ນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!