ຕອນແລງວັນທີ 3 ຕຸລາ 2016 ນີ້ຢູ່ທີ່ໂຮງຮຽນສາມັນກິນນອນຊົນເຜົ່າ ແຂວງອຸດົມໄຊ ໄດ້ມີພິທີມອບ-ຮັບ ອາຄານຮຽນຫຼັງໃໝ່ ລະຫວ່າງບໍລິດສັດກະດິງໄຊ ຈຳກັດກັບໂຮງຮຽນສາມັນກິນນອນຊົນເຜົ່າຊຶ່ງພິທີດັ່ງກ່າວມີທ່ານ ເພັດສາຄອນ ຫຼວງອາໄພ ເຈົ້າແຂວງໆອຸດົມໄຊ, ທ່ານ ນົບພະດົນ ເທບພິທັກ ເອກອັກຄະລາຊະທູດ ແຫ່ງລາຊະອານາຈັກໄທ ປະຈຳ ສປປ ລາວ, ການນຳຈາກສູນກາງ ອຳນວຍການບໍລິສັດໂຕໂຢຕາ ປະຈຳປະເທດໄທ, ເລຂາທິການສະມາຄົມລາວ- ໄທ, ໄທ-ລາວເພື່ອມິດຕະພາບ, ການນຳ ຂອງແຂວງອຸດົມໄຊ, ບໍລິສັດຜູ້ຮັບເໝົາ ໂຄງການກໍ່ສ້າງອາຄານຮຽນ,ອຳນວຍການໂຮງຮຽນ, ພະນັກງານຄູ ອາຈານແລະນ້ອງນັກຮຽນພາຍໃນໂຮງຮຽນດັ່ງກ່າວເຂົ້າຮ່ວມ.
ອາຄານຮຽນຫຼັງໃໝ່ນີ້ແມ່ນໄດ້ຮັບ ການຊ່ວຍເຫຼືອຈາກສົມເດັດພະເທບພະ ຣັດຣາດສຸດາ ສະຫຍາມບໍຣົມຣາດຊະກຸມາລີ ແຫ່ງລາຊະອານາຈັກໄທ ພາຍຫຼັງ ທີ່ທ່ານໄດ້ເດີນທາງມາຢ້ຽມຢາມ ແລະ ເຮັດວຽກຢູ່ທີ່ໂຮງຮຽນສາມັນກິນນອນ ຊົນເຜົ່າ ກໍຄືແຂວງອຸດົມໄຊໃນຄັ້ງວັນທີ 30 ເມສາ 2014 ພ້ອມທັງໃຫ້ທຶນໃນ ການປຸກສ້າງອາຄານຮຽນ 1 ຫຼັງ. ຊຶ່ງ ແມ່ນບໍລິສັດກະດິງໄຊ ຈຳກັດ ເປັນຜູ້ ຮັບເໝົາກໍ່ສ້າງ ໂດຍໄດ້ເລີ່ມຕົ້ນວາງສີລາລືກ ແລະລົງມືກໍ່ສ້າງຕັ້ງແຕ່ນັ້ນເປັນ ຕົ້ນມາ ແລະສຳເລັດໃນວັນທີ 21 ມິຖຸນາ 2016 ນີ້ ໂຮງຮຽນເປັນອາຄານ 2 ຊັ້ນຖາວອນ, ມີ 8 ຫ້ອງຮຽນ, ມີຫ້ອງ ນ້ຳ ນອກ 2 ຫ້ອງ ນອກນັ້ນ ພາຍໃນຍັງປະກອບມີບັນດາເຟີນິເຈີ ທີ່ເປັນໂຕະ, ຕັ່ງ, ອຸປະກອນຮັບໃຊ້ການຮຽນການສອນ ແລະສິ່ງອຳນວຍຄວາມສະດວກອື່ນໆ ເຊັ່ນ: ໄຟຟ້າ ແລະນ້ຳປະປາ ລວມມູນຄ່າ ການກໍ່ສ້າງທັງໝົດ 1,7 ຕື້ກວ່າກີບ ຫຼື 7,7 ລ້ານກວ່າບາດ ສະກຸນເງິນໄທ.
ໂອກາດດັ່ງກ່າວ ທາງບໍລິສັດ ກະດິງໄຊ ຈຳກັດ ຜູ້ຮັບເໝົາໂຄງການກໍ່ສ້າງອາຄານຮຽນໃນຄັ້ງນີ້ ກໍໄດ້ກ່າວມອບໂຄງ ການໃຫ້ກັບໂຮງຮຽນສາມັນກິນນອນ ຊົນເຜົ່າເປັນຜູ້ຊົມໃຊ້ ແລະບູລະນະຮັກສາ ພ້ອມທັງສັນຍາໃນການປັບປຸງສ້ອມແປງຄືນຫາກມີການເປ່ເພທາງດ້ານ ເຕັກນິກເປັນໄລຍະເວລາ 1 ປີ. ທ່ານ ເພັດສາຄອນ ຫຼວງອາໄພ ເຈົ້າແຂວງອຸດົມໄຊ ໄດ້ສະແດງຄວາມຂອບອົກຂອບໃຈ ຕໍ່ກັບການຊ່ວຍເຫຼືອຂອງສົມເດັດພະເທບ ພະຣັດຣາດສຸດາ ສະຫຍາມບໍຣົມ ຣາດຊະກຸມາຣີ ພ້ອມທັງມອບໃຫ້ກັບ ໂຮງຮຽນເປັນຜູ້ຊົມໃຊ້ໃຫ້ເກີດປະໂຫຍດສູງສຸດ ແລະຍາວນານສ່ວນທ່ານ ນົບພະດົນ ເທບພິທັກ ເອກອັກຄະລາຊະທູດ ແຫ່ງລາຊະອານາຈັກໄທ ປະຈຳ ສປປ ລາວ ຕາງໜ້າຜູ້ໃຫ້ທຶນຊ່ວຍເຫຼືອ ກໍໄດ້ ສະແດງຄວາມດີໃຈທີ່ໄດ້ເປັນສ່ວນໜຶ່ງ ໃນການຍົກລະດັບວຽກງານການສຶກສາ ຢູ່ແຂວງອຸດົມໄຊ ໂດຍສະເພາະແມ່ນຢູ່ ໂຮງຮຽນສາມັນກິນນອນຊົນເຜົ່າໃຫ້ມີ ບາດກ້າວຂະຫຍາຍຕົວ.
ທີ່ມາ: ໜັງສືພິມ ເສດຖະກິດ-ສັງຄົມ