ສຳນັກຂ່າວ AFP ລາຍງານໃນວັນທີ 4 ຕຸລາຜ່ານມານີ້ວ່າ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ໄດ້ກ່າວປາໄສໂດຍບອກໃຫ້ ປະທານາທິບໍດີ ບາຣັກ ໂອບາມາ ແຫ່ງ ສະຫະລັດອາເມຣິກາ ໄປລົງນາຮົກ ພ້ອມກັບຂູ່ຕັດຄວາມສຳພັນ ຖານພັນທະມິດລະຫວ່າງສອງປະເທດ ແລ້ວຫັນໄປຜູກມິດກັບຈີນ ແລະ ຣັດເຊຍແທນ ຫລັງຈາກທີ່ທ່ານຍັງຄົງບໍ່ພໍໃຈ ຕໍ່ກັບການວິພາກວິຈານຂອງຜູ້ນຳອາເມຣິກາ ກ່ຽວກັບການເຮັດສົງຄາມຕ້ານຢາເສບຕິດ ຢູ່ປະເທດຟິລິບປິນ.
” ຂ້າພະເຈົ້າສູນເສຍຄວາມເຄົາລົບຕໍ່ອາເມຣິກາ ” ທ່ານ ດູເຕີເຕ ກ່າວໃນຂະນະປາໄສ ກ່ຽວກັບສຽງຮຽກຮ້ອງຂອງສະຫະລັດຯ, ສະຫະປະຊາຊາດ ແລະ ສະຫະພາບເອີຣົບ ໃຫ້ທ່ານເຄົາລົບສິດທິມະນຸດຢູ່ຟິລິບປິນ ໂດຍທ່ານໄດ້ເວົ້າໃຫ້ຜູ້ນຳອາເມຣິກາຢ່າງຮຸນແຮງວ່າ ” ທ້າວ ໂອບາມາ ໄປລົງນາຮົກຊະ! ”
ພ້ອມກັນນັ້ນ, ຜູ້ນຳຟິລິບປິນ ຍັງໄດ້ເວົ້າອີກວ່າ ອາເມຣິກາເປັນພວກໜ້າໄຫວ້ຫລັງຫລອກ ແລະ ເຕືອນອີກວ່າ ບາງອີອາດເຖິງເວລາ ທີ່ທ່ານຈະທຸບທຳລາຍຄວາມເປັນພັນທະມິດ ລະຫວ່າງສອງປະເທດລົງໂດຍສິ້ນເຊີງ ໃນນັ້ນລວມເຖິງຂໍ້ຕົກລົງດ້ານປ້ອງກັນປະເທດຮ່ວມກັນ, ທ່ານ ເວົ້າວ່າ ” ໃນທີ່ສຸດແລ້ວ ບາງທີໃນສະໄໝຂອງຂ້າພະເຈົ້າ ອາດແຕກຫັກກັບອາເມຣິກາ, ຂ້າພະເຈົ້າຢາກເອື້ອມມືໄປຫາຣັດເຊຍ ຫລື ບໍ່ກໍຈີນຫລາຍກວ່າ ເຖິງແມ່ນວ່າເຮົາບໍ່ເຫັນດີກັບອຸດົມການຂອງພວກເຂົາ ແຕ່ພວກເຂົາໃຫ້ຄວາມເຄົາລົບຕໍ່ຄົນອື່ນ ແລະ ຄວາມເຄົາລົບຄືສິ່ງສຳຄັນ ”
ຕິດຕາມເຮົາທາງFacebook ກົດຖືກໃຈເລີຍ!