ສຳນັກຂ່າວຕ່າງປະເທດ ລາຍງານໃນວັນທີ 5 ຕຸລານີ້ວ່າ ໃນວັນອັງຄານທີ 4 ຕຸລາຜ່ານມາ ທ່ານ ອິກໍ ໂຄນາເຊນຄອບ ໂຄສົກກະຊວງປ້ອງກັນປະເທດຣັດເຊຍ ໄດ້ອອກມາລະບຸວ່າ ກອງທັບຣັດເຊຍ ໄດ້ຈັດສົ່ງລະບົບຂີປະນາວຸດ S-300 ເຂົ້າໄປປະຈຳການທີ່ ຖານທັບເຮືອໃນເມືອງຕາຕຸສ ປະເທດຊີຣີ ເພື່ອຍົກລະດັບມາດຕະການຮັກສາຄວາມປອດໄພ ໃຫ້ແກ່ຖານທັບຂອງຣັດເຊຍດັ່ງກ່າວ.
ແນວໃດກໍຕາມ ສື່ມວນຊົນຂອງອາເມຣິກາ ຟ໊ອກນິວສ໌ ໄດ້ລາຍງານວ່າ ເຈົ້າໜ້າທີ່ອາເມຣິກາມີຄວາມກັງວົນ ແລະ ເຫັນວ່າ ການກະທຳຂອງຣັດເຊຍດັ່ງກ່າວນີ້ ເປັນການຍົກລະດັບປະຕິບັດການທາງທະຫານໃນຊີຣີ ຊຶ່ງໂຄສົກກະຊວງປ້ອງກັນປະເທດຣັດເຊຍ ກໍໄດ້ຖະແຫລງຊີ້ແຈງວ່າ ລະບົບຂີປະນາວຸດ S-300 ເປັນພຽງລະບົບປ້ອງກັນຕົນເອງ ແລະ ບໍ່ໄດ້ຄຸກຄາມຜູ້ໃດທັງນັ້ນ.
” ບໍ່ຊັດເຈນວ່າດ້ວຍເຫດຜົນອັນໃດ ການປະຈຳການ S-300 ໃນຊີຣີ ເຖິງສ້າງຄວາມວຸ້ນວາຍ ໃນໝູ່ພັນທະມິດຕາເວັນຕົກເອົາແທ້ເອົາວ່າ ທັງທີ່ກ່ອນຈະສົ່ງ S-300 ໄປປະຈຳການນັ້ນ ຣັດເຊຍກໍເຄີຍສົ່ງລະບົບຂີປະນາວຸດປ້ອງກັນໄພທາງອາກາດ Fort ໄປຍັງຊີຣີມາກ່ອນແລ້ວ ” ທ່ານ ໂຄນາເຊນຄອບ ລະບຸ.
ຕິດຕາມເຮົາທາງFacebook ກົດຖືກໃຈເລີຍ!