ກອງປະຊຸມໃຫຍ່ຄັ້ງທີ III ຂອງອົງຄະນະພັກສານປະຊາຊົນສູງສຸດ, ໄດ້ໄຂຂຶ້ນໃນວັນທີ 4 ຕຸລານີ້, ພາຍໃຕ້ການເປັນປະທານຂອງສະຫາຍ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະພັກສານປະຊາຊົນສູງສຸດ ແລະ ໃຫ້ກຽດເຂົ້າຮ່ວມຂອງສະຫາຍ ພັນຄໍາ ວິພາວັນ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ, ມີຜູ້ແທນສົມບູນ 83 ສະຫາຍ, ຍິງ 22 ສະ ຫາຍທີ່ຕາງໜ້າສະມາຊິກພັກທັງໝົດ 125 ສະຫາຍເຂົ້າຮ່ວມ, ເພື່ອຄົ້ນຄວ້າ, ພິຈາລະນາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ ກໍຄືການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກຕົນໃນໄລຍະຜ່ານມາ, ພ້ອມທັງຮັບຮອງເອົາຄາດໝາຍສູ້ຊົນ ແລະ ໜ້າທີ່ວຽກງານໃນຊຸມປີຕໍ່ໜ້າ.
ສະຫາຍ ຄໍາພັນ ສິດທິດໍາພາ ໄດ້ຂຶ້ນລາຍງານຕໍ່ທີ່ປະຊຸມວ່າ: 5 ປີຜ່ານມາຄະນະພັກສານປະຊາຊົນສູງສຸດໄດ້ຊີ້ນໍາ-ນໍາພາ ແລະ ຈັດຕັ້ງປະຕິບັດໜ້າທີ່ການເມືອງຂອງຕົນຢ່າງມີຄວາມຮັບ ຜິດຊອບສູງ ແລະ ຍາດໄດ້ຜົນສໍາເລັດຫລາຍອັນຕາມຄໍາຂວັນທີ່ວ່າ: “ ບໍລິການດ້ວຍຄວາມຍິ້ມແຍ້ມແຈ່ມໃສ, ຊ່ວຍແກ້ໄຂຄະດີໄດ້ບາດກ້າວໜຶ່ງ, ເຮັດວຽກດ້ວຍຄວາມຊື່ສັດສຸຈະລິດຄືບາດກ້າວທໍາອິດຂອງການຕັດສິນຄະດີທີ່ຖືກຕ້ອງເປັນທໍາ ”. ພ້ອມນັ້ນ, ຍັງດໍາເນີນການພິຈາລະນາຕັດສິນຄະດີມີຄວາມວ່ອງໄວ ແລະ ມີຄຸນນະພາບນັບມື້ສູງຂຶ້ນ, ເຊິ່ງສະແດງອອກຄື: 5 ປີຜ່ານມາມີຄະດີເຂົ້າມາສານທຸກຂັ້ນທັງໝົດ 37.840 ກວ່າເລື່ອງ, ແກ້ໄຂແລ້ວ 36.070 ກວ່າເລື່ອງເທົ່າກັບ 95,32% ທຽບໃສ່ມະຕິກອງປະຊຸມໃຫຍ່ຄັ້ງທີ II ປະຕິບັດໄດ້ລື່ນຄາດໝາຍທີ່ວາງໄວ້ 10,32%, ຄະດີຍັງຄ້າງເທົ່າກັບ 4,68%, ເຊິ່ງສາມາດໄຈ້ແຍກຄະດີຢູ່ສານປະຊາຊົນແຕ່ລະຂັ້ນຄື: ຄະດີລວມຢູ່ສານຂັ້ນຕົ້ນທັງໝົດ 29.780 ເລື່ອງ, ແກ້ໄຂແລ້ວ 28.470 ກວ່າເລື່ອງເທົ່າກັບ 95,71%, ຍັງຄ້າງ 4,29%, ຄະດີຢູ່ສານຂັ້ນອຸທອນທັງໝົດ 5.560 ກວ່າເລື່ອງ, ແກ້ໄຂແລ້ວ 5.220 ກວ່າເລື່ອງເທົ່າກັບ 93,97% ຍັງຄ້າງເທົ່າກັບ 6,03%, ຄະດີເປັນຂັ້ນລົບລ້າງທັງໝົດ 2.500 ກວ່າເລື່ອງ, ແກ້ໄຂແລ້ວ 2.370 ກວ່າເລື່ອງເທົ່າກັບ 94,80 ເລື່ອງຍັງຄ້າງ 5,20%, ໃນນີ້ຢູ່ສານປະຊາຊົນສູງສຸດ 1.490 ກວ່າເລື່ອງ, ແກ້ໄຂແລ້ວ 1.420 ກວ່າເລື່ອງ ກວມ 94,85% ຍັງຄ້າງ 5,15%.
ເຖິງຢ່າງໃດກໍຕາມ, ສໍາລັບ 5 ປີຕໍ່ໜ້າຄືແຕ່ນີ້ຮອດປີ 2020 ຈະສູ້ຊົນພັດທະນາວຽກງານສານໃຫ້ມີໜັກແໜ້ນເຂັ້ມແຂງ, ເປັນລະບົບທີ່ສອດຄ່ອງ ແລະແທດເໝາະກັບສະພາບຄວາມເປັນຈິງຂອງການພັດທະນາເສດຖະກິດ-ສັງຄົມ ຂອງປະເທດເຮົາ, ຮັບປະກັນໃຫ້ການຈັດຕັ້ງຂອງສານປະຊາຊົນສາມາດບໍລິການຮັບໃຊ້ປະຊາຊົນໄດ້ສະດວກ, ປະຊາຊົນເຂົ້າຫາຂະບວນການດໍາເນີນຄະດີຢູ່ສານໄດ້ຢ່າງງ່າຍດາຍ, ການດໍາເນີນຄະດີວ່ອງໄວ, ຮັບປະກັນພິຈາລະນາຄະດີໃຫ້ສໍາເລັດຕາມກົດໝາຍກໍານົດໄວ້ຄື: ຄະດີແພ່ງຂັ້ນຕົ້ນ 9 ເດືອນ, ຂັ້ນອຸທອນ 4 ເດືອນ, ຂັ້ນລົບລ້າງ 3 ເດືອນ ແລະ ຂັ້ນຮື້ຟື້ນ 2 ເດືອນ ແລະ ແກ້ໄຂຄະດີໃຫ້ໄດ້ 85% ຕາມແຜນການທີ່ວາງອອກ.
ນອກຈາກນີ້, ກອງປະຊຸມຍັງໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານອົງຄະນະພັກສານປະຊາຊົນສູງສຸດຊຸດໃໝ່ຈໍານວນ 7 ສະຫາຍ.
ທີ່ມາ: ໜັງສືພິມ ລາວພັດທະນາ