ສຳນັກຂ່າວຊິນຫົວຂອງຈີນລາຍງານວ່າ ຄ່ານິຍົມກ່ຽວກັບການມີລູກຊາຍຢ່າງໜ້ອຍ 1 ຄົນໃນຄອບຄົວ
ຍັງຄົງຝັງແໜ້ນຢູ່ໃນຄວາມຄິດຂອງພໍ່ແມ່ຊາວຫວຽດນາມໃນທຸກວັນນີ້ ແລະ ຖືວ່າເປັນໜ້າທີ່ຄວາມ
ຮັບຜິດຊອບຂອງຊາຍຊາວຫວຽດນາມ ທີ່ຕ້ອງມີລູກຊາຍໃຫ້ໄດ້ຢ່າງໜ້ອຍ 1 ຄົນ, ຖ້າບໍ່ເຊັ່ນນັ້ນກໍຈະຖືກ
ເບິ່ງວ່າ ບໍ່ມີຄວາມສາມາດ ແລະ ບໍ່ເຄົາລົບຕໍ່ພໍ່ແມ່ຂອງຕົນເອງ.
ລາຍງານຂອງກອງທຶນປະຊາກອນ ແຫ່ງສະຫະປະຊາຊາດ ໃນປີ 2011 ລະບຸວ່າ ບຸດເພດຊາຍ ໄດ້ຮັບຄວາມ
ນິຍົມໃນຫວຽດນາມ ເພາະວ່າເດັກຊາຍສາມາດສືບເຊື້ອສາຍຕະກູນ ບູຊາບັນພະບຸລຸດ ເປັນທີ່ເພິ່ງພາ
ຂອງພໍ່ແມ່ທີ່ເຖົ້າແກ່ ແລະ ຮັບຊ່ວງມໍລະດົກ ຫຼື ກິດຈະການຂອງຄອບຄົວຕໍ່, ເນື່ອງຈາກແນວຄິດດັ່ງກ່າວ
ທີ່ສືບຕໍ່ຈາກລຸ້ນສູ່ລຸ້ນ ເຮັດໃຫ້ເກີດມີຄວາມບໍ່ສົມດຸນຂອງເພດໃນຫວຽດນາມ ໃນບໍ່ພໍເທົ່າໃດປີຜ່ານມາ.
ສັກນັກງານເພື່ອການວາງແຜນຄອບຄົວ ແລະ ປະຊາກອນ ພາຍໃຕ້ການກຳກັບຂອງກະຊວງສາທາລະນະ
ສຸກຫວຽດນາມ ລະບຸວ່າ ອັດຕາສ່ວນເພດຂອງເດັກເກີດໃໝ່ໃນຫວຽດນາມ ເພີ່ມຈາກເດັກຊາຍ 107 ຄົນຕໍ່
ເດັກຍິງ 100 ຄົນ ໃນປີ 1999 ກາຍມາເປັນ ເດັກຊາຍ 112.6 ຄົນ ຕໍ່ເດັກຍິງ 100 ຄົນ ໃນປີ 2013.
ລາຍງານຍັງໄດ້ລະບຸວ່າ ຄວາມບໍ່ສົມດຸນທາງເພດ ເກີດຂຶ້ນໃນ 45 ແຂວງ ຈາກທັງໝົດ 63 ແຂວງໃນທົ່ວ
ປະເທດ ໂດຍອັດຕາສ່ວນເພດເດັກເກີດໃໝ່ຂອງນະຄອນຫຼວງຮ່າໂນ້ຍ ໃນປີ 2013 ສູງກ່ວາອັດຕາສະ
ເລ່ຍຂອງທົ່ວປະເທດ ທີ່ຈຳນວນເດັກຊາຍ 114.5 ຄົນ ຕໍ່ເດັກຍິງ 100 ຄົນ.
ກະຊວງສາທາລະນະສຸກຫວຽດນາມ ເຕືອນວ່າ ຫາກສະຖານະການອັດຕາສ່ວນເພດຂອງເດັກເກີດໃໝ່ຍັງ
ຄົງບໍ່ປ່ຽນແປງໄປຈົນເຖິງປີ 2030 ຫວຽດນາມກໍຈະປະສົບບັນຫາຂາດແຄນເຈົ້າສາວເຖິງ 4 ລ້ານຄົນ.
ລາຍງານຂອງສຳນັກງານເພື່ອການວາງແຜນຄອບຄົວ ແລະ ປະຊາກອນ ຍັງໄດ້ລະບຸວ່າ ຄູ່ສົມລົດຊາວຫວຽດ
ນາມ ສ່ວນໜຶ່ງເລືອກເພດຂອງລູກຕັ້ງແຕ່ຍັງຖືພາ ເຊິ່ງບໍ່ຄ່ອຍປະກົດເຫັນໃນປະເທດອື່ນ, ເຖິງຢ່າງໃດກໍ
ຕາມ ໃນເວລານີ້ ຄູ່ສົມລົດຊາວຫວຽດນາມບາງຄູ່ ກໍຄ່ອຍໆປ່ຽນທັດສະນະຄະຕິ ແລະ ປະຕິເສດແນວຄິດເດີມ
ກ່ຽວກັບການມີລູກຊາຍ.