ເພື່ອເປັນການສ້າງສິ່ງອໍານວຍຄວາມສະດວກໃຫ້ແກ່ປະຊາຊົນຊາວພຸດທີ່ໄປຫົດສົງນໍ້າພະເຈົ້າສິງຄໍາໃນບຸນປີໃໝ່ລາວທີ່ໄດ້ ມີການຫົດສົງໃນທຸກໆປີ ແລະເພື່ອຫຼຸດຜ່ອນຄວາມເປິເປື້ອນພາຍໃນອາຮາມທາງວັດພະເຈົ້າສິງຄໍາ
ຈິ່ງໄດ້ໃຊ້ງົບປະມານ 400 ລ້ານກວ່າກີບ ສ້າງຫໍສົງພະເຈົ້າສິງຄໍາຢູ່ເດີ່ນຕໍ່ໜ້າວັດຄາດຈະໃຫ້ສໍາເລັດກ່ອນ ເດືອນພຶດສະພາປີ 2017 ຈະມາເຖິງນີ້.
ຍາພໍ່ຊຽງດວງຈັນ ມະນີຈິດ ເຈົ້າອະທິການວັດພະເຈົ້າສິງຄໍາເມືອງຫຼາ ໄດ້ໃຫ້ສໍາພາດຕໍ່ທີມຂ່າວພວກເຮົາຫວ່າງບໍ່ດົນມານີ້ວ່າ: ເພື່ອເປັນການສ້າງສິ່ງອໍານວຍຄວາມສະດວກສະບາຍໃນເວລາຫົດສົງນໍ້າພະເຈົ້າສິງຄໍາ ອົງສັກສິດພະມິ່ງບ້ານຂວັນເມືອງຂອງຊາວ ເມືອງຫຼາ ທີ່ໄດ້ຈັດໃຫ້ມີການຫົດສົງທຸກໆປີ ໃນບຸນປີໃໝ່ລາວ ແລະຜ່ານມາແມ່ນໄດ້ຈັດໃຫ້ພໍ່ແມ່ປະຊາຊົນໄດ້ຫົດສົງຢູ່ພາຍໃນວັດ ເນື່ອງຈາກຜູ້ຄົນຫຼວງຫຼາຍທີ່ມາຫົດສົງນັບແຕ່ເໜືອຮອດໃຕ້ ຊຶ່ງໄດ້ສ້າງຄວາມແອອັດໃນການ ເຂົ້າ-ອອກ ແລະທັງເປັນການຫຼຸດຜ່ອນຄວາມເປິເປື້ອນພາຍໃນອາຮາມ ທາງຄະນະວັດຈິ່ງໄດ້ສົມທົບ ກັບພາກສ່ວນທີ່ກ່ຽວຂ້ອງ ຂອງເມືອງໃນການສ້າງຫໍສົງນໍ້າພະເຈົ້າສິງຄໍາຂຶ້ນຢູ່ເດີ່ນຕໍ່ໜ້າວັດ ຊຶ່ງໃຊ້ງົບປະມານຂອງວັດໂດຍກົງລວມທັງໝົດ 424 ລ້ານກວ່າກີບ, ໄດ້ເລີ່ມລົງມືກໍ່ສ້າງມາແຕ່ ວັນທີ 1 ສິງຫາ 2016 ນີ້ ແລະຄາດຈະໃຫ້ສໍາເລັດກ່ອນເດືອນພຶດສະພາປີ 2017 ສໍາລັບການກໍ່ສ້າງຄືບໜ້າ 40% ແລ້ວມາຮອດຂະນະນີ້.
ຫໍສົງນໍ້າພະເຈົ້າສິງຄໍາ ເມື່ອສ້າງສໍາເລັດແລ້ວຈະຊ່ວຍສ້າງຄວາມສະດວກສະບາຍຫຼາຍໃຫ້ແກ່ພໍ່ແມ່ປະຊາຊົນຜູ້ທີ່ມາຫົດສົງນໍ້າ ເພາະຈະບໍ່ແອອັດຄືທີ່ຜ່ານມາອີກ ຢ່າງໜຶ່ງກໍຈະຊ່ວຍໃຫ້ພາຍໃນອາ ຮາມວັດມີຄວາມສະອາດງາມຕາ.
ທີ່ມາ: ໜັງສືພິມເສດຖະກິດ-ສັງຄົມ