ກອງປະຊຸມໃຫຍ່ຄັ້ງທີ I ຂອງອົງຄະນະພັກຄະນະພົວພັນຕ່າງປະເທດສູນກາງພັກ, ໄດ້ໄຂຂຶ້ນໃນວັນທີ 30 ກັນຍານີ້ ແລະ ປິດລົງດ້ວຍຜົນສໍາເລັດຈົບງາມໃນຕອນແລງຂອງມື້ດຽວກັນ, ພາຍໃຕ້ການເປັນປະທານຂອງສະຫາຍນາງ ສູນທອນ ໄຊຍະຈັກ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ໃຫ້ກຽດເຂົ້າຮ່ວມຂອງສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາສະມາຊິກພັກສົມບູນຈໍານວນ 54 ສະຫາຍ, ຍິງ 14 ສະຫາຍ, ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້, ໄດ້ຄົ້ນຄ້ວາປຶກສາຫາລື ແລະ ຮັບຮອງເອົາບົດລາຍງານການເມືອງຂອງຄະນະພັກສະໄໝສາມັນທີ I ທີ່ໄດ້ຕີລາຄາຢ່າງພາວະວິໄສຕໍ່ຜົນງານການເຄື່ອນໄຫວໃນໄລຍະຜ່ານມາ ແລະ ວາງທິດທາງແຜນການເຄື່ອນໄຫວໃນຕໍ່ໜ້າ ແລະ ໄດ້ດໍາເນີນການບ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່, ເຊິ່ງມີຜູ້ລົງສະໝັກຮັບເລືອກຕັ້ງທັງໝົດ 10 ສະຫາຍ, ຍິງ 4 ສະຫາຍ ແລະ ເລືອກເອົາ 7 ສະຫາຍ, ໂດຍກອງປະຊຸມໄດ້ເປັນເອກະພາບເລືອກເອົາສະຫາຍນາງ ສູນທອນ ໄຊຍະຈັກ ເປັນເລຂາຄະນະບໍລິຫານງານພັກ, ສະຫາຍ ສົມພອນ ສີຈະເລີນ ເປັນຮອງເລຂາຄະນະພັກ, ສະຫາຍ ສົມດີ ບຸນຄຸ້ມ ເປັນປະທານກວດກາ.

ໃນໂອກາດນີ້, ສະຫາຍ ຈັນສີ ໂພສີຄໍາ ໄດ້ໂອ້ລົມຊີ້ນໍາຕໍ່ກອງປະຊຸມໂດຍ ເນັ້ນໃຫ້ຄະນະພັກຄະນະພົວພັນຕ່າງປະເທດສູນກາງພັກເອົາໃຈໃສ່ 8 ບັນຫາຕົ້ນຕໍ່ ເພື່ອກໍານົດທິດທາງແຜນການໃນຕໍ່ໜ້າ ເປັນຕົ້ນ: ໃຫ້ຮີບຮ້ອນປັບປຸງພາລະບົດບາດ ແລະ ຕໍາແໜ່ງງານຂອງບັນດາກົມຂອງຄະນະພົວພັນຕ່າງປະເທດສູນກາງພັກຄືນໃໝ່ບົນພື້ນຖານມະຕິຕົກລົງຂອງຄະນະເລຂາທິການສູນກາງພັກວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພົວພັນຕ່າງປະເທດສູນກາງພັກສະບັບໃໝ່, ແນໃສ່ຮັບປະກັນປະສິດທິຜົນໃນການປະຕິບັດບົດບາດເປັນເສນາທິການໃຫ້ຂັ້ນເທິງ ແລະ ຮອງຮັບການປະຕິບັດໜ້າທີ່ການເມືອງຂອງຕົນໃນໄລຍະໃໝ່, ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ສະມາຊິກພັກມີຄວາມຮູ້ກ່ຽວກັບທິດສະດີມາກ-ເລນິນ, ມີທັດສະນະຫລັກໝັ້ນການເມືອງໜັກແໜ້ນ, ມີຄວາມຈົ່ງຮັກພັກດີຕໍ່ປະເທດຊາດ, ສືບຕໍ່ສ້າງບັນດານິຕິກໍາທີ່ຈໍາເປັນໃຫ້ແກ່ການເຄື່ອນ ໄຫວຕ່າງປະເທດຂອງພັກ ເພື່ອກ້າວໄປເຖິງການອອກມະຕິກົມການເມືອງກ່ຽວກັບການຄຸ້ມຄອງການເຄື່ອນໄຫວຕ່າງປະເທດຢ່າງລວມສູນ ແລະ ເປັນເອກະພາບໃນທົ່ວປະເທດ, ເອົາໃຈໃສ່ຍົກລະດັບວິຊາສະເພາະໃຫ້ພະນັກງານ-ສະມາຊິກພັກຢ່າງມີແຜນການ, ເປັນພະນັກງານການທູດ, ຝຶກຝົນຫລໍ່ຫລອມຕົນເອງທາງດ້ານຄວາມສາມາດໃນການຄົ້ນຄ້ວາ, ສັງລວມ, ວິໄຈ, ສະພາບການຜັນແປຢ່າງສັບສົນ, ວ່ອງໄວໃນພາກພື້ນ ແລະ ສາກົນ, ພ້ອມທັງສືບຕໍ່ປັບປຸງວຽກງານຈັດຕັ້ງ, ວຽກງານພັກ-ພະນັກງານ, ສູ້ຊົນໃຫ້ມີຈໍານວນໜ່ວຍພັກເຂັ້ມແຂງ, ປອດໄສ, ໜັກແໜ້ນມີຈໍານວນເພີ່ມຂຶ້ນ, ເສີມຂະຫຍາຍຄວາມສາມັກຄີເປັນເອກະພາບພາຍໃນຂອງຄະນະພັກ, ສະມາຊິກພັກ-ພະນັກງານ ແລະ ລັດຖະກອນບົນພື້ນຖານປະຕິບັດລວມສູນປະຊາທິປະໄຕ, ປຶກສາຫາລືເປັນໝູ່ຄະນະ, ແບ່ງຄວາມຮັບຜິດຊອບໃຫ້ບຸກຄົນຈະແຈ້ງ, ປະຕິບັດກົນໄກສະຫລຸບ ແລະ ຖອດຖອນບົດຮຽນໃນການເຄື່ອນໄຫວຕ່າງປະເທດໃນແຕ່ລະໄລຍະຂອງບັນດາຄະນະພັກ, ເປັນເຈົ້າການໃນການປະສານງານກັບພາກສ່ວນກ່ຽວຂ້ອງຂອງລາວ ເພື່ອເພີ່ມທະວີການໂຄສະນາຕໍ່ຕ່າງປະເທດ ກ່ຽວກັບແນວທາງນະໂຍບາຍຂອງພັກ-ລັດເຮົາໃນແຕ່ລະໄລຍະ, ອະທິບາຍສະພາບຄວາມເປັນຈິງຂອງການພັດທະນາປະເທດເຮົາ, ພ້ອມທັງຕີຖອຍຖ້ອຍທໍານອງໃສ່ຮ້າຍປ້າຍສີພັກ-ລັດໃນບັນຫາຕ່າງໆຢ່າງທັນການ ແລະ ຄ່ອງແຄ້ວ.

ທີ່ມາ: ລາວພັດທະນາ