ພິທີເປີດການນຳໃຊ້ສູນໂບລິ້ງແຫ່ງທຳອິດຂອງແຂວງຊຽງຂວາງ ເພື່ອຮອງຮັບງານມະຫະກຳກິລາແຫ່ງຊາດ ຄັ້ງທີ 11 ຈັດຂຶ້ນໃນທ້າຍເດືອນສິງຫາ 2016 ທີ່ສູນໂບລິ້ງຂອງແຂວງ ມີທ່ານ ສົມກົດ ມັງໜໍ່ເມກ ເຈົ້າແຂວງຊຽງຂວາງ ທ່ານ ທອງຜີວ ສີປັນຍາ ຮອງຫົວໜ້າພະແນກສຶກສາທິການ ແລະກິລາແຂວງຊຽງຂວາງ ມີບັນດາຄະນະນຳຂັ້ນແຂວງ ຜູ້ຕາງໜ້າຈາກພະແນການ ກົມກອງອ້ອມຂ້າງແຂວງ ນັກທຸລະກິດ ແລະແຂກຖືກເຊີນເຂົ້າຮ່ວມ.
ທ່ານ ວໍລະເດດ ດາລາວົງ ຜູ້ຕາງໜ້າໃຫ້ຜູ້ປະກອບການສູນໂບລິ້ງແຂວງຊຽງຂວາງ ໄດ້ຂຶ້ນກ່າວລາຍງານຜົນສຳເລັດການກໍ່ສ້າງວ່າ: ສູນໂບລິ້ງແຫ່ງດັ່ງກ່າວມີສະຖານທີ່ຕັ້ງຢູ່ສູນຊາວໜຸ່ມ ໃກ້ກັບສະໜາມກີລາດອກປີກໄກ່ແຂວງ ຕັ້ງຢູ່ບ້ານໂພນມີໄຊ ເມືອງແປກ ໄດ້ເລີ່ມລົງມືກໍ່ສ້າງມາແຕ່ວັນທີ 4 ຕຸລາ 2015 ໂດຍແມ່ນທຶນສ່ວນຕົວຂອງທ່ານນາງ ຢ່າງລີ ຜູ້ປະກອບການສຳປະທານເປັນ ເວລາ 30 ປີ ໂຄງສ້າງອາຄານດັ່ງກ່າວເປັນອາຄານຖາວອນຊັ້ນດຽວ ຂະໜາດ 30×40 ແມັດ ໄດ້ຖືກຕົບແຕ່ງອອກແບບມາໂດຍມີອຸປະກອນຮັບໃຊ້ຄົບຊຸດຕາມມາດຕະຖານສາກົນ ຂ້າງໃນມີຫ້ອງຫຼິ້ນກີລາໂບລິ້ງ ຫ້ອງອອກກຳລັງກາຍ (ຟິສເນັດ) ຫ້ອງພັກຜ່ອນ ຫ້ອງຄົວ ແລະ ຫ້ອງອາຫານ ສ່ວນສະພາບແວດລ້ອມຂ້າງນອກ ມີສະຖານທີ່ຈອດລົດກວ້າງຂວາງ ສະອາດສວຍງາມ ລວມມູນຄ່າການກໍ່ສ້າງທັງໝົດ 6,4 ຕື້ກີບ ນັບທັງຕິດຕັ້ງອຸປະກອນທັງໝົດໃຊ້ເວລາການກໍ່ສ້າງ 300 ວັນ ມາຮອດວັນທີ 25 ສິງຫາ 2016 ການກໍ່ສ້າງໄດ້ສຳເລັດ ແລະເປີດນຳໃຊ້ເປັນທາງການ.
ສຳລັບສູນໂບລິ້ງແຫ່ງນີ້ເປັນແຫ່ງທຳອິດຂອງແຂວງຊຽງຂວາງ ຫຼັງຈາກເປີດນຳໃຊ້ເປັນທາງການແລ້ວ ຈະຖືກນຳໃຊ້ເຂົ້າເປັນສະໜາມແຂ່ງຂັນກີລາໂບລິ້ງຂອງແຂວງ ໃນງານມະຫະກຳກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນຕົ້ນປີ 2018 ພ້ອມທັງເປັນສະຖານທີ່ເກັບຕົວເຝິກຊ້ອມນັກກີລາໂບລິ້ງແຂວງຊຽງຂວາງນຳອີກ ນອກນັ້ນຍັງເປັນສະຖານທີ່ອອກກຳລັງກາຍຂອງພໍ່ແມ່ປະຊາຊົນພາຍໃນເທດສະບານແຂວງ ກໍ່ຄືບັນດາແຂກທັງພາຍໃນ ແລະຕ່າງປະເທດ ທີ່ມັກການອອກກຳລັງກາຍ.
ທີ່ມາ: ສຳນັກຂ່າວສານປະເທດລາວ