ກະຊວງວິທະຍາສາດ ແລະເຕັກໂນໂລຊີ ຮ່ວມກັບຄູ່ຮ່ວມພັດທະນາ ກຽມຈັດງານວາງສະແດງ ຕະຫລາດນັດເຕັກໂນໂລຊີ ສປປ ລາວ 2016 ເຊິ່ງຈະຈັດຂຶ້ນໃນ ລະຫວ່າງ ວັນທີ 12-16 ຕຸລາ 2016 ນີ້ ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ເຊິ່ງມີຫລາຍກວ່າ 100 ບໍລິສັດ ເຂົ້າຮ່ວມ.
ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະເຕັກໂນໂລຊີ ໄດ້ກ່າວໃນງານຖະແຫລງຂ່າວ ໃນວັນທີ 2 ກັນຍາ 2016 ນີ້ ວ່າ: ການຈັດງານວາງສະແດງ-ຕະຫລາດນັດ ເຕັກໂນໂລຊີ ສປປ ລາວ ຫລື Lao TECHMART 2016 ເປັນເວທີແລກປ່ຽນການຮ່ວມມື ທາງດ້ານການຄົ້ນຄວ້າ ແລະເປັນເວທີການຮ່ວມມື ລົງທຶນທາງດ້ານວິທະຍາສາດ ແລະເຕັກໂນໂລຊີ ລະຫວ່າງ ພາກລັດ ແລະເອກະຊົນ ບັນດາພາກທຸກລະກິດ ທັງພາຍໃນ ແລະຕ່າງປະເທດ ແນໃສ່ເຮັດໃຫ້ວຽກງານວິທະຍາສາດ ແລະເຕັກໂນໂລຊີ ເປັນກຳລັງຂັບເຄື່ອນທີ່ເຂັ້ມແຂງ ໃຫ້ແກ່ການພັດທະນາເສດຖະກິດ-ສັງຄົມ ແລະການຫັນເປັນປະເທດອຸດສະຫະກຳ ແລະທັນສະໄໝເທື່ອລະກ້າວ ພາປະເທດຊາດຫລຸດພົ້ນຈາກຄວາມດ້ອຍພັດທະນາ. ນອກນັ້ນ, ຍັງແມ່ນໜຶ່ງໃນແຜນຈັດຕັ້ງປະຕິບັດ ເປົ້າໝາຍຍຸດທະສາດ ເພື່ອສົ່ງເສີມການຄົ້ນຄວ້າ, ການປະດິດສ້າງ ແລະການນຳໃຊ້ເຕັກໂນໂລຊີ ເຂົ້າໃນການພັດທະນາເສດຖະກິດ-ສັງຄົມ ໃຫ້ມີປະສິດທີຜົນ ແລະສົ່ງເສີມການຖ່າຍທອດນຳໃຊ້ເຕັກໂນໂລຊີ ທີ່ກ້າວໜ້າ ແລະທັນສະໄໝ ຊຸກຍູ້ສົ່ງເສີມການຖ່າຍທອດນຳໃຊ້ ເຕັກໂນໂລຊີ ເຂົ້າໃນການຜະລິດ ແລະການບໍລິການໃຫ້ມີປະສິດທິພາບສູງ ເຮັດໃຫ້ສິນຄ້າຂອງລາວ ສາມາດແຂ່ງຂັນ ຢູ່ພາຍໃນ ແລະຕ່າງປະເທດ.
ນອກຈາກນັ້ນ, ພາຍໃນງານຈະມີການຈັດສຳມະນາການຮ່ວມມືດ້ານວິທະຍາສາດ, ການພົບປະຮ່ວມມືລົງ ທຶນທາງທຸລະກິດ ເຕັກໂນໂລຊີ, ການສາທິດ ແລະທົດລອງນຳໃຊ້ເຕັກໂນໂລຊີ, ໃຫ້ຄຳປຶກສາດ້ານວິທະຍາສາດ ແລະ ເຕັກໂນໂລຊີ ແລະຖາມຕອບ ຊິງລາງວັນ

ທີ່ມາ: ປະເທດລາວ