ນັກຮຽນຊັ້ນມັດທະຍົມຕອນປາຍຂອງລາວປະກອບມີ ນາງ ສິຣິໂສພາ ສິດທິພອນຈາກໂຮງຮຽນນິລະດາ, ນາງ ອັນທິກາ ໄຊຍະພອນ ຈາກໂຮງຮຽນມັດທະຍົມສົມບູນປາກເຊ ແຂວງ ຈຳປາສັກ ແລະ ທ້າວ ຈັນຈະເລີນ ລາດສະພົນ ຈາກໂຮງຮຽນມັດທະຍົມສົມບູນແຂວງ ສະຫວັນນະເຂດ ສາມາດຍາດໄດ້ອັນດັບທີ 1 ຈາກການເຂົ້າຮ່ວມແຂ່ງຂັນຖາມຕອບຄວາມຮູ້ກ່ຽວກັບອາຊຽນລະດັບພາກພື້ນຄັ້ງທີ 7 ຊື່ງຈັດຂື້ນໃນຕອນເຊົ້າມື້ວານນີ້ ( 24.8 ) ທີ່ຫໍວັດທະນາທຳແຫ່ງຊາດ ນະຄອນຫລວງວຽງຈັນ, ສ່ວນອັນດັບທີ 2 ແມ່ນປະເທດຟີລິປີນ ແລະ ທີ 3 ແມ່ນປະເທດໄທ. ທ່ານ ບົວເງິນ ຊາພູວົງ, ຮອງລັດຖະມົນຕີກະຊວງ ຖະແຫລງຂ່າວ, ວັດທະນາທຳ ແລະ ທ່ອງທ່ຽວ ມີຄຳເຫັນວ່າ: ລາວຮູ້ສຶກເປັນກຽດຢ່າງສູງທີ່ໄດ້ຮັບກຽດເປັນເຈົ້າພາບຈັດການແຂ່ງຂັນຖາມຕອບຄວາມຮູ້ກ່ຽວກັບອາຊຽນໃນຄັ້ງນີ້ ຊື່ງເປັນກິດຈະກຳໜື່ງໃນຂອບການຮ່ວມມືຂອງເສົາຄ້ຳວັດທະນາທຳສັງຄົມອາຊຽນ ໄດ້ລິເລີ່ມໂຄງການໂດຍຄະນະກຳມະການວັດທະນາທຳ ແລະ ຖະແຫລງຂ່າວຂອງອາຊຽນ, ເປັນການແຂ່ງຂັນທົດສອບຄວາມຮູ້ກ່ຽວກັບອາຊຽນ ໂດຍການເຂົ້າຮ່ວມຂອງນັກຮຽນຈາກໂຮງຮຽນມັດ ທະຍົມຕອນປາຍທັງພາກລັດ ແລະ ເອກະຊົນຈາກ 10 ປະ ເທດສະມາຊິກອາຊຽນ. ສຽງ: ໂນະ Vong 01 ໂອກາດນີ້ຜູ້ຊະນະເລີດທີ່ເປັນຕົວແທນຈາກປະເທດລາວທີ່ເຂົ້າຮ່ວມການແຂ່ງຂັນຄັ້ງນີ້ຕ່າງຮູ້ສຶກດີໃຈທີ່ສາມາດຍາດອັນດັບທີ 1 ເປັນການສ້າງຊື່ສຽງໃຫ້ປະເທດຊາດ ພ້ອມທັງຈະນຳເອົາບົດຮຽນດີໆທີ່ໄດ້ຮັບຈາກການເຂົ້າຮ່ວມແຂ່ງຂັນຄັ້ງນີ້ໄປຜັນຂະຫຍາຍ ແລະ ພັດທະນາຄວາມຮູ້ຄວາມສາມາດຂອງຕົນເອງໃຫ້ກາຍເປັນພົນລະເມືອງດີຂອງຊາດໃນອານາຄົດ.    ໂຄງການຖາມ – ຕອບຄວາມຮູ້ກ່ຽວກັບອາຊຽນຈະຈັດການແຂ່ງຂັນທຸກສອງຫາສາມປີ ເພື່ອສົ່ງເສີມການມີສ່ວນຮ່ວມໃນໂຄງການ ແລະ ການເຄື່ອນໄຫວກິດຈະກຳຕ່າງໆຂອງປະຊາຄົມວັດທະນະທຳ – ສັງຄົມອາຊຽນ ຊື່ງເປັນໜື່ງໃນສາມເສົາຄໍ້າປະຊາຄົມອາຊຽນ ແນໃສ່ຍົກລະດັບຄວາມຮັບຮູ້ – ຄວາມເຂົ້າໃຈກ່ຽວກັບອາຊຽນຂອງນັກຮຽນໃນລະດັບມັດທະຍົມສຶກສາໃຫ້ສູງຂື້ນ.

ຂ່າວແລະຮູບຈາກ ວິທະຍຸກະຈາຍສຽງແຫ່ງຊາດ