ການຊື້ຂອງຝາກ ຫຼື ເຄື່ອງທີ່ລະນຶກ ເປັນອີກໜຶ່ງສິ່ງທີ່ນັກທ່ອງທ່ຽວຫຼາຍຄົນ ບໍ່ພາດທີ່ຈະຊື້ກັບເມືອ ບໍ່ວ່າຈະຊື້ຕາມແຫຼ່ງທ່ອງທ່ຽວ ຕາມຕະຫຼາດນັດ, ຮ້ານຄ້າຕ່າງໆ ປະເທດລາວເຮົາກໍ່ມີແຫຼ່ງຊັອບປິ້ງໄວ້ສຳລັບໃຫ້ນັກທ່ອງທ່ຽວໄດ້ເລາະຊື້ເຄື່ອງຕ້ອນຂອງຝາກທີ່ຂື້ນຊື່ຢ່າງ: ຕະຫຼາດມືດຫຼວງພະບາງ, ຕະຫຼາດມືດສວນເຈົ້າອະນຸວົງ, ຕະຫຼາດມົ້ງ, ຕະຫຼາດເຊົ້າ ເປັນຕົ້ນ ເຊິ່ງສະຖານທີ່ເຫຼົ່າເປັນແຫຼ່ງທີ່ນັກທ່ອງທ່ຽວນິຍົມມາຍ່າງເລາະຊື້ຂອງຕ້ອນກ່ອນກັບປະເທດ
ສຳລັບເຄື່ອງຕ້ອນຂອງຝາກ ສຸດຮິດທີ່ນັກທ່ອງທ່ຽວມັກຊື້ເມື່ອມາທ່ຽວເມືອງລາວໄດ້ແກ່:
- ຜ້າຝ້າຍ, ຜ້າໃໝ ຜ້າຫັດຖະກຳຂອງຄົນລາວ ຂອງຊົນເຜົ່າຕ່າງໆ ເຊິ່ງມີຈຸດເດັ່ນຢູ່ມີ່ລວດລາຍງົດງາມ ເປັນເອກະລັກ ແລະ ມີຄວາມແຕກຕ່າງຂອງແຕ່ລະຊົນເຜົ່າຢ່າງຊັດເຈນ ແຖມຜ້າລາວເປັນຜ້າທີ່ມີຄຸນນະພາບດີ ລາຄາກໍ່ແພງປານໃດ ນັກທ່ອງທ່ຽວຈິ່ງນິຍົມຊື້ກັບບ້ານ
- ກາເຟ ແລະ ຊາ ເປັນສິນຄ້າຫຼັກຂອງປະເທດລາວ ແລະ ໄດ້ຮັບການຍອມຮັບຈາກນານາຊາດ ດ້ວຍຣົດຊາດທີ່ແຊ໊ບ ແລະ ມີກິ່ນຫອມເປັນເອກະລັກ ນັກທ່ອງທ່ຽວຈິ່ງນິຍົມຊື້ເປັນຂອງຝາກ ຊາທີ່ຂຶ້ນຊື່ທີ່ສຸດໃນລາວ ແມ່ນຊາຂຽວຜົ້ງສາລີ ສ່ວນກາເຟແມ່ນກາເຟທາງປາກເຊ (ພູພຽງບໍລິເວນ)
- ເຄື່ອງເງິນ, ເຄື່ອງປະດັບ ເປັນອີກໜຶ່ງສິນຄ້າທີ່ໄດ້ຮັບຄວາມນິຍົມຊື້ຈາກນັກທ່ອງທ່ຽວ ເນື່ອງຈາກເຄື່ອງເງິນມີຄວາມສວຍງາມ ແລະ ຄວາມປານີດຂອງຊ່າງຫັດຖະກຳລາວ
- ຫັດຖະກຳໄມ້ແກະສະຫຼັກ ແລະ ຫວາຍ ຫັດຖະກຳປະເພດນີ້ຈະມີລວດລາຍເປັນເອກະລັກສະເພາະຂອງຄົນລາວ ມີໃຫ້ເລືອກຫຼາຍຂະໜາດຕາມຄວາມຕ້ອງການ
ທີ່ມາຈາກ: http://www.in1guide.com/index.php?topic=183.0