ສຳນັກຂ່າວຕ່າງປະເທດລາຍງານໃນມື້ນີ້ວ່າ ສື່ທ້ອງຖິ່ນໃນຝຣັ່ງ ລາຍງານການພົບຮ່າງຂອງນັກປີນພູຊາວ
ຝຣັ່ງເສດລາຍໜຶ່ງ ຖືກແຊ່ແຂງຢູ່ເທິງຈອມພູ ມົງລອງ ຫຼັງຈາກທີ່ເຂົາສູນຫາຍໄປຢ່າງໄຮ້ຮ່ອງຮອຍເຖິງ 32 ປີ.
ໜັງສືພິມ ເລີ ໂດຟີນ ລິເບເຣ ຂອງຝຣັ່ງລາຍງານວ່າ ນັກປີນພູກຸ່ມໜຶ່ງໄດ້ພົບຮ່າງຂອງ ປາທຣິດ ອີແວດ
ໂດຍບັງເອີນ ໃນຂະນະທີ່ພວກເຂົາກຳລັງໄຕ່ຂຶ້ນຍອດພູມົງລອງ ແລະ ໄດ້ແຈ້ງເຈົ້າໜ້າທີ່ຕຳຫຼວດ ເຊິ່ງຜົນ
ຂອງການກວດສອບໃນເວລາຕໍ່ມາ ໄດ້ຢືນຢັນວ່າ ຮ່າງສົບດັ່ງກ່າວຖືກແຊ່ແຂງຢູ່ເທິງຈອມພູດັ່ງກ່າວ ຄືຮ່າງ
ຂອງ ອີແວັດ ນັກປີນພູຊາວຝຣັ່ງທີ່ມີຜູ້ພົບເຫັນເປັນຄັ້ງສຸດທ້າຍ ຕັ້ງແຕ່ເມື່ອວັນທີ 1 ມີນາ 1982.
ລາຍງານຍັງໄດ້ລະບຸອີກວ່າ ປາທຣິດ ອີແວັດ ໄດ້ຫາຍຕົວໄປ ໃນຂະນະທີ່ເຂົາພະຍາຍາມພິຊິດຍອດພູດັ່ງກ່າວ
ໂດຍລຳພັງ ທ່າມກາງສະພາບອາກາດທີ່ຮ້າຍແຮງສຸດຂົ້ວ ເມື່ອ 32 ປີກ່ອນ ໃນຂະນະທີ່ເຂົາຍັງມີອາຍຸພຽງແຕ່
23 ປີ.
ອີງຕາມຂໍ້ມູນຂອງຝຣັ່ງເສດໃຫ້ຮູ້ວ່າ ໃນແຕ່ລະປີຈະມີນັກປີນພູຈຳນວນບໍ່ໜ້ອຍ ຫາຍສາບສູນໄປ ໃນລະ
ຫວ່າງພະຍາຍາມພິຊິດຈອມພູມົງລອງ ເຊິ່ງມີຄວາມສູງ 4,810 ແມັດ ເໜືອລະດັບໜ້ານ້ຳທະເລ ແລະ ໄດ້
ຊື່ວ່າ ເປັນຍອດຈອມພູທີ່ມີຄວາມສູງທີ່ສຸດໃນສະຫະພາບເອີລົບ.