ຂປລ. ເພື່ອຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ເຂົ້າສູ່ການຈັດຕັ້ງປະຕິບັດຕົວຈິງ ໃນແຕ່ລະຂະແໜງການ ແລະ ທ້ອງຖິ່ນ ເວົ້າລວມ, ເວົ້າສະເພາະການຈັດຕັ້ງປະຕິບັດ ວຽກງານຈັດຕັ້ງ, ການກໍ່ສ້າງພັກ–ພະນັກງານ ໃນເງື່ອນໄຂໃໝ່ ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ 10 ໄຂຂຶ້ນ ຢ່າງເປັນທາງການ ໃນວັນທີ 22 ສິງຫາ 2016 ນີ້ ຢູ່ຫ້ອງວ່າການສູນກາງພັກ ໂດຍການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ; ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ; ມີບັນດາສະຫາຍກົມການເມືອງສູນກາງພັກ, ຄະນະເລຂາທິການສູນກາງພັກ, ມີບັນດາຫົວໜ້າຄະນະຈັດຕັ້ງ ຈາກບັນດາແຂວງ ແລະ ກະຊວງ, ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ສະຫາຍ ຈັນສີ ໂພສີຄໍາ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນລາຍງານ ບົດລາຍງານການເມືອງ ໃນໄລຍະ 5 ປີ ແລະ ທິດທາງແຜນການໃນຕໍ່ໜ້າ ເຊິ່ງຕະຫລອດໄລຍະ 5 ປີຜ່ານມາ ວຽກງານຈັດຕັ້ງ ໄດ້ຮັບການປັບປຸງແກ້ໄຂ, ວຽກງານກໍ່ສ້າງພັກ–ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໄດ້ມີຜົນສໍາເລັດ ໃນແຕ່ລະດ້ານ ເຮັດໃຫ້ຈໍານວນສະມາຊິກພັກເພີ່ມຂຶ້ນ, ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງ ເປັນກ້າວໆ.
ຈາກນັ້ນ, ບັນດາກະຊວງ–ອົງການ ໄດ້ປະກອບຄໍາຄິດຄໍາເຫັນ ຕໍ່ທິດທາງ, ໜ້າທີ່ວຽກງານ ໃນການປັບປຸງແນວທາງການຈັດຕັ້ງ ຂອງພັກ 5 ປີຕໍ່ໜ້າໃນດ້ານຕ່າງໆ ເປັນຕົ້ນແມ່ນວຽກງານກໍ່ສ້າງພັກປອດໃສ, ເຂັ້ມແຂງ ແລະ ໜັກແໜ້ນ, ແຜນຍຸດທະສາດ ວຽກງານພັກ-ພະນັກງານ ແຕ່ນີ້ຮອດປີ 2020, ຄົ້ນຄ້ວາ ແລະ ປັບປຸງໃໝ່ບັນດານິຕິກໍາ ກ່ຽວກັບວຽກງານຈັດຕັ້ງ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!