ນັບແຕ່ນີ້ຮອດກາງເດືອນໜ້າລັດຖະບານໄດ້ແຈ້ງໃຫ້ບຸກຄົນ ແລະນິຕິບຸກຄົນຢຸດຕິຢ່າງຊິ້ນເຊີງການເຄື່ອນໄຫວກິດຈະການການບິນ (ເຮືອບິນໄລຍະ ໄກບັງຄັບດ້ວຍຣີໂໝດ) ໃນຂອບເຂດ ນະຄອນຫຼວງວຽງຈັນ ແລະແຂວງຫຼວງພະບາງ ທັງນີ້ກໍເພື່ອເປັນການຍົກລະດັບມາດຕະການຮັກສາຄວາມປອດໄພຂຶ້ນສູ່ລະດັບສູງ ໃນໄລຍະເປັນເຈົ້າພາບຈັດ ກອງປະຊຸມສອດອາຊຽນໃນຕໍ່ໜ້ານີ້.
ວັນທີ 19 ສິງຫາ 2016 ຫ້ອງການ ກະຊວງໂຍທາທິການ ແລະຂົນສົ່ງ ໄດ້ອອກແຈ້ງການສະບັບເລກທີ 01027/ຍທຂ.ຫກ ລະບຸວ່າ: ເພື່ອເປັນການຍົກລະດັບມາດຕະຖານການຮັກສາຄວາມ ປອດໄພການບິນຂຶ້ນສູ່ລະດັບສູງສຸດໃຫ້ແກ່ປະມຸກລັດ ແລະຜູ້ນຳປະເທດຕ່າງໆ ທີ່ເດີນທາງມາຮ່ວມກອງປະຊຸມສຸດຍອດອາຊຽນຄັ້ງທີ 28, 29 ແລະກອງປະຊຸມສຸດຍອດອື່ນໆທີ່ ສ.ປ.ປ.ລາວ ໄດ້ ຮັບກຽດເປັນເຈົ້າພາບຢູ່ນະຄອນຫຼວງວຽງຈັນ ໃນຕົ້ນເດືອນກັນຍາ 2016 ນີ້ນັບແຕ່ວັນທີ 20 ສິງຫາ-15 ກັນຍາ ແມ່ນໃຫ້ສະໂມສອນເຮືອບິນແຫ່ງຊາດ, ບັນດາບຸກຄົນ ແລະນິຕິບຸກຄົນ ທັງຄົນລາວ ແລະຕ່າງປະເທດ ທີ່ເປັນນັກກິລາປະເພດການບິນພາຣາໂມເຕີ້ ແລະກິລາເຮືອບິນບັງຄັບໄລຍະໄກ ດ້ວຍຣີ ໂໝດທຸກຊະນິດ, ທຸກປະເພດທີ່ມີໃບອະນຸຍາດ ແລະບໍ່ມີໃບອະນຸຍາດ ໃຫ້ຢຸດຕິທຸກໆການເຄື່ອນໄຫວການບິນຢ່າງຊິ້ນເຊີງ ແລະເດັດຂາດໃນຊ່ວງກະກຽມ ແລະດຳເນີນກອງປະຊຸມ.
ໂດຍການແຈ້ງການຫ້າມດັ່ງກ່າວ ແມ່ນສະເພາະໃນຂອບເຂດນະຄອນຫຼວງວຽງຈັນ ແລະແຂວງຫຼວງພະບາງເທົ່ານັ້ນ ໃນກໍລະນີຫາກມີການລະເມີດ ແມ່ນເຈົ້າໜ້າທີ່ກ່ຽວຂ້ອງຂອງກະຊວງປ້ອງກັນປະເທດ ແລະປ້ອງກັນຄວາມສະຫງົບຈະປະຕິບັດມາດຕະການເດັດຂາດຕາມພາລະບົດບາດ, ສິດ ແລະໜ້າທີ່ຂອງຕົນ, ສະນັ້ນ ທຸກຄວາມເສຍຫາຍທີ່ອາດເກີດຂຶ້ນຕໍ່ການຝ່າຝືນ ແລະນຳໃຊ້ມາດຕະການດັ່ງກ່າວແມ່ນບຸກຄົນ ຫຼືນິຕິບຸກຄົນທີ່ເປັນເຈົ້າຂອງເຮືອບິນ ເຫຼົ່ານັ້ນຕ້ອງຮັບຜິດຊອບທັງໝົດຕາມກົດໝາຍແຕ່ພຽງຜູ້ດຽວ.
ທີ່ມາ: ເສດຖະກິດ-ສັງຄົມ