ໃນຕອນບ່າຍວັນທີ 18 ສິງຫາ 2016 ນີ້, ຫ້ອງການ ອຸດສາຫະກຳ-ການຄ້າເມືອງ ຫົງສາ ແຂວງໄຊຍະບູລີ ໄດ້ຈັດພິທີທໍາລາຍສິນຄ້າໝົດອາຍຸຂອງການນຳໃຊ້ຂຶ້ນ ຢູ່ທີ່ຫ້ອງການດັ່ງກ່າວ. ໂດຍມີທ່ານ ສອນສະນິດ ເພັດໄຊ ຫົວໜ້າຫ້ອງການ ອຸດສາຫະກໍາ-ການຄ້າ ເມືອງຫົງສາ, ມີແຂກຖືກເຊີນ, ມີຕາງໜ້າສະມາຄົມຕະຫຼາດ, ບັນດາຄະນະກຳມະການກວດກາຄຸນະພາບສິນຄ້າພາຍໃນເມືອງທີ່ຖືກແຕ່ງຕັ້ງສະເພາະກິດ ແລະ ພະນັກງານວິຊາການຫ້ອງການດັ່ງກ່າວເຂົ້າຮ່ວມຢ່າງພ້ອມພຽງ.
ໃນໂອກາດນີ້, ກໍ່ໄດ້ຮັບຟັງການລາຍງານການເຄື່ອນໄຫວ ລົງກວດກາຄຸນະພາບສິນຄ້າຢູ່ພາຍໃນເມືອງຫົງສາ ໂດຍປະຕິບັດຕາມແຜນເຄື່ອນໄຫວວຽກງານປະຈຳເດືອນ ແລະ ເພື່ອເປັນການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້. ດັ່ງນັ້ນ, ຫ້ອງການ ອຸດສາຫະກຳ-ການຄ້າເມືອງ ໄດ້ສົບທົບກັບຄະນະກຳມະການທີ່ກ່ຽວຂ້ອງຂັ້ນເມືອງ ໄດ້ພ້ອມກັນລົງກວດກາຄຸນະພາບສິນຄ້າ ແລະ ສິນຄ້າທີ່ຜິດລະບຽບ ຢູ່ຮ້ານຄ້າໃຫຍ່-ນ້ອຍພາຍໃນເມືອງຫົງສາ ໃນຈຳນວນ 14 ບ້ານເທສະບານ ແລະ ຢູ່ໃນບໍລິເວນຕະຫຼາດເຊົ້າຂອງເມືອງຕື່ມອີກ.
ທ່ານ ສອນສະນິດ ເພັດໄຊ ຫົວໜ້າຫ້ອງການ ອຸດສາຫະກໍາ-ການຄ້າ ເມືອງຫົງສາ ໄດ້ໃຫ້ສຳພາດຕໍ່ນັກຂ່າວເມືອງວ່າ: ການລົງເຄື່ອນໄຫວກວດກາສິນຄ້າໝົດອາຍຸ ຫຼືສິນຄ້າໝົດຄຸນະພາບໃນຄັ້ງນີ້, ມີຈຳນວນ 130 ຮ້ານຄ້າ ແລະ ໄດ້ເລີ່ມຈັດຕັ້ງປະຕິບັດມາແຕ່ກາງເດືອນ ກໍລະກົດ ຫາ ຕົ້ນເດືອນ ສິງຫາ 2016, ບັນດາຄະນະກຳມະການກວດກາຄຸນະພາບທີ່ຖືກແຕ່ງຕັ້ງສະເພາະກິດຂອງເມືອງ ແມ່ນໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ຂອບເຂດ, ສິດ ແລະ ໜ້າທີ່ ຂອງຂະແໜງການສາຍຕັ້ງໄດ້ມອບໝາຍໃຫ້. ເຊິ່ງສາມາດກວດກາພົບເຫັນ ແລະ ຍຶດສິນຄ້າປະເພດອຸປະໂພກ-ບໍລິໂພກທີ່ໝົດອາຍຸການນຳໃຊ້ ເປັນຕົ້ນແມ່ນ: ເຄື່ອງດື່ມ, ເຄື່ອງປຸງແຕ່ງອາຫານ, ໝີ່, ເຂົ້າໜົມ, ສີຍ້ອມຜົມ, ໂລຊັ່ນທາຜິວ ແລະ ອຶ່ນໆອີກຫຼາຍຢ່າງ ລວມແລ້ວມີທັງໝົດ 82 ລາຍການ ລວມເປັນມູນຄ່າ 21 ລ້ານ 3 ແສນກວ່າກີບ.
ສໍາລັບການທໍາລາຍສິນຄ້າຄັ້ງນີ້, ແມ່ນໄດ້ທໍາລາຍດ້ວຍການຈູດ-ເຜົາ ຢູ່ສະຖານທີ່ຖິ້ມຂີ້ເຫຍື້ອຂອງເມືອງຫົງສາ ເຂດບ້ານ ສີບຸນເຮືອງ ຫ່າງຈາກບ້ານອອກໄປ ປະມານ 5 ກິໂລແມັດ.
ທັງນີ້, ເພື່ອປຸກຈິດສໍານຶກໃຫ້ແກ່ຜູ້ບໍລິໂພກ ແລະ ຜູ້ປະກອບການທຸລະກິດ ຕໍ່ການເຄົາລົບລະບຽບກົດໝາຍ ເພື່ອແນໃສ່ສົ່ງເສີມ ແລະ ປົກປ້ອງບັນດາຫົວໜ່ວຍທຸລະກິດການຄ້າ ທີ່ເຄື່ອນໄຫວຢ່າງຖືກຕ້ອງສອດຄ່ອງກັບລະບຽບກົດໝາຍ ໃຫ້ເປັນໄປຕາມເສດຖະກິດຕະຫຼາດ ທີ່ມີການດັດສົມຂອງລັດ ສົ່ງເສີມການຜະລິດສິນຄ້າ ປະກອບສ່ວນເຂົ້າໃນວຽກງານຄຸ້ມຄອງສິນຄ້າ ແລະ ປົກປ້ອງສິດຜົນປະໂຫຍດຂອງຜູ້ຊົມໃຊ້ຢູ່ໃນທົ່ວເມືອງ.
ກິດຕິສັກ ບົວໄລ ທີມຂ່າວທ້ອງຖິ່ນລາຍງານຈາກ ເມືອງຫົງສາ ແຂວງໄຊຍະບູລີ