ກຽມພົບກັບງານແຂ່ງຂັນ ລາວຊຸບເປີໂມເດລ 2016 ແລະ ເດັກນ້ອຍໜ້າຮັກ ຮອບຊິງຊະນະເລີດ ເຊິ່ງຈະຈັດຂຶ້ນໃນວັນທີ 20 ສິງຫາ ນີ້ ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ແຕ່ເວລາ 19 ໂມງ ເປັນຕົ້ນໄປ.
ງານປະກວດ ຄົ້ນຫາສຸດຍອດ ລາວຊຸບເປີໂມເດລ ຮອບຊິງຊະນະເລີດ ມີຜູ້ເຂົ້າຮ່ວມແຂ່ງຂັນ 20 ຄົນ ແລະ ເດັກນ້ອຍໜ້າຮັກ ຍິງ-ຊາຍ 12 ຄົນ ທີ່ໄດ້ຜ່ານ ເຂົ້າຮອບຄັດເລືອກ ແຕ່ທ້າຍເດືອນ ພຶດສະພາ ຜ່ານມາ. ພ້ອມເຂົ້າຮ່ວມ, ການຝຶກອົບຮົມ ກ່ຽວກັບທັກສະ ໃນການວາງໂຕ, ພັດທະນາ ບຸກຄະລິກກະພາບ ແລະ ເຂົ້າຮ່ວມກິດຈະກຳ ເຄື່ອນໄຫວຕ່າງໆ ຂອງໂຄງການ ເຊິ່ງໄດ້ເຮັດໃຫ້ ຜູ້ເຂົ້າຮ່ວມແຂ່ງຂັນ ມີຄວາມໝັ້ນໃຈ ແລະ ກ້າສະແດງອອກ ຫລາຍເພີ່ມຂຶ້ນ.
ຜູ້ຊະນະເລີດ ລາວຊຸບເປີໂມເດລ ຍິງ-ຊາຍ ຈະໄດ້ຮັບລາງວັນເງິນສົດ ຜູ້ລະ 10 ລ້ານກີບ, ພ້ອມຈະໄດ້ໄປເດີນແບບ ຢູ່ຕ່າງປະເທດ ແລະ ມີໂອກາດກ້າວເຂົ້າສູ່ ວົງການບັນເທິງ ເປັນຕົ້ນ ແມ່ນຖ່າຍແບບ ວາລະສານ ແລະ ອື່ນໆ. ນອກນີ້, ຍັງມີລາງວັນ ຂວັນໃຈຊ່າງພາບ ແລະ ຂວັນໃຈສື່ມວນຊົນ ຕື່ມອີກ
ຂ່າວຈາກ: ສຳນັກຂ່າວສານປະເທດລາວ
ພາບຈາກ: ເຟສບຸກ ຕ໋ອດ ລີນ້າ