ອາເມລິກາບໍ່ພຽງເປັນປະເທດມະຫາອຳນາດດ້ານເສດຖະກິດຂອງໂລກເທົ່ານັ້ນແຕ່ນັກທຸລະກິດຍັງກະຈາຍແຫຼ່ງທຶນໄປສ້າງກິດຈະການຢູ່ປະເທດຕ່າງໆໃນທົ່ວໂລກຈຳນວນຫຼວງຫຼາຍໃນແຕ່ລະປີສະເພາະປະຊາຄົມອາຊຽນ ມີເຖິງ 12 ຕື້ກວ່າໂດລາຖືເປັນຜູ້ລົງທຶນລາຍໃຫຍ່ຈັດຢູ່ອັນດັບ 3 ຮອງລົງມາຈາກຈີນ ແລະຍີ່ປຸ່ນ ຂອງປະເທດທີ່ມາລົງທຶນຫຼາຍ ສຸດໃນອາຊີຕາເວັນອອກສຽງໃຕ້.
ຂໍ້ມູນເປີດເຜີຍໃນກອງປະຊຸມລັດຖະມົນຕີເສດຖະກິດອາຊຽນກັບອາເມລິກາ ຊຶ່ງຈັດຂຶ້ນໃນວັນທີ 2 ສິງຫາ 2016 ນີ້ລະບຸວ່າ: ການຮ່ວມມືອາຊຽນ-ອາເມລິກາ ນັບແຕ່ສ້າງສາຍພົວພັນຮ່ວມກັນມາແມ່ນມີການຂະຫຍາຍຕົວຕໍ່ເນື່ອງ ເປັນຕົ້ນດ້ານເສດຖະກິດໃນນັ້ນ ການລົງທຶນຂອງສະຫະລັດອາເມລິກາມາອາຊຽນມີມູນຄ່າສູງ ເຖິງ 12,2 ຕື້ໂດລາ ຖືກຈັດເປັນ ອັນດັບທີສາມຂອງປະເທດທີ່ມາ ລົງທຶນໃນອາຊຽນຂະນະທີ່ມູນຄ່າດ້ານການຄ້າຂອງສອງຝ່າຍກໍບັນ ລຸ 212,8 ຕື້ໂດລາໃນປີ 2015 ຄິດເປັນ 9,3 ສ່ວນຮ້ອຍຂອງ ລວມຍອດມູນຄ່າການຄ້າທັງໝົດ ໃນອາຊຽນ.
ນອກຈາກນີ້ທັງສອງຝ່າຍຍັງ ຈະສືບຕໍ່ຮ່ວມກັນຈັດຕັ້ງປະຕິບັດ ສັນຍາຂອບວຽກຮ່ວມມືທາງດ້ານການຄ້າ ແລະການລົງທຶນ ແລະແຜນວຽກຂອງໂຄງການຮ່ວມມືດ້ານເສດຖະກິດໃຫ້ນັບມື້ເຕີບໃຫຍ່ເຂັ້ມແຂງຂຶ້ນດ້ວຍການເຊື່ອມຈອດອາເມລິກາກັບອາຊຽນແລະໃຫ້ການຊ່ວຍເຫຼືອອາຊຽນໃນຂົງເຂດການບໍລິການປະຕູດຽວທາງດ້ານພາສີ, ການອຳນວຍ ຄວາມສະດວກທາງດ້ານການຄ້າ, ທຸລະກິດຂະໜາດນ້ອຍ-ກາງ, ພະລັງງານການພັດທະນາເຕັກໂນໂລຊີ.
ບາດກ້າວທີ່ສຳຄັນສຸດຂອງຂະບວນການເຊື່ອມໂຍງເສດຖະກິດພາຍໃນພາກພື້ນ, ຄວບຄູ່ກັບການລວມເປັນປະຊາ ຄົມໜຶ່ງດຽວແຜນງານປະຊາຄົມ ເສດຖະກິດອາຊຽນ 2025 ກໍຖື ເປັນໜຶ່ງຍຸດທະສາດໃໝ່ທີ່ຈະເພີ່ມ ລະດັບການເຊື່ອມໂຍງທີ່ສູງ ແລະໜຽວແໜ້ນຂຶ້ນມີຄວາມສາມາດ ໃນການແຂ່ງຂັນ ແລະຍົກລະດັບການພັດທະນາໃຫ້ຫຍັບເຂົ້າໃກ້ກັບບັນດາປະຊາຊາດໃນໂລກ.
ເພື່ອສ້າງເງື່ອນໄຂແກ່ການ ລົງທຶນໃຫ້ສະດວກ, ໄວ ແລະມີປະສິດທິພາບສາມາດຂັບເຄື່ອນການພັດທະນາພາຍໃນປະຊາຄົມອາຊຽນກອງປະຊຸມສະພາເຂດການລົງທຶນໃນອາຊຽນຄັ້ງທີ 19 ທີ່ຈັດ ຂຶ້ນໃນວັນທີ 3 ສິງຫາ ໄດ້ໃຫ້ຮູ້ ວ່າ: ອີງຕາມສັນຍາການລົງທຶນຮອບດ້ານອາຊຽນຖືເປັນເຄື່ອງ ມືອັນສຳຄັນສຳລັບການສົ່ງເສີມເສດຖະກິດຂອງອາຊຽນໃນການ ເຄື່ອນຍ້າຍການລົງທຶນຢ່າງເສລີ ໃຫ້ປາກົດຜົນເປັນຈິງ ຊຶ່ງຜ່ານມາບັນດາປະເທດສະມາຊິກໄດ້ມີການປະຕິຮູບໃນຫຼາຍດ້ານເພື່ອປັບປຸງສະພາບແວດລ້ອມທາງດ້ານທຸ ລະກິດໃຫ້ມີຄວາມເອື້ອອຳນວຍແກ່ການລົງທຶນ, ມີຄວາມໂປ່ງໃສ ແລະບັນລຸໝາກຜົນຂຶ້ນຕື່ມ ຂອງການເປີດເສລີພາຍໃນພາກພື້ນ ໂດຍສັນຍາດັ່ງກ່າວນີ້ບັນດາ ປະເທດສະມາຊິກຕ້ອງເຮັດໃຫ້ສຳເລັດຂັ້ນຕອນພາຍໃນຂອງຕົນເພື່ອກຽມຄວາມພ້ອມລົງນາມເປັນທາງການໃນໄລຍະດຳເນີນກອງປະຊຸມສຸດຍອດອາຊຽນທີ່ລາວຈະເປັນເຈົ້າພາບຈັດຂຶ້ນໃນເດືອນກັນຍາ 2016 ນີ້.
ທີ່ມາ: ເສດຖະກິດ-ສັງຄົມ