ເມືອງງອຍໃຊ້ 100 ລ້ານກວ່າກີບປາບຕັກແຕນ

0
1573

ເມືອງງອຍເປັນເມືອງໜຶ່ງຂອງແຂວງຫຼວງພະບາງທີ່ໄດ້ຮັບຜົນກະທົບຈາກການລະບາດຂອງຕັກແຕນກັດກິນຜົນລະປູກຂອງປະຊາ ຊົນລວມມີ 92 ຈຸດ,ນອນໃນ 30 ບ້ານຈາກສະພາບຄືດັ່ງກ່າວຮອດປະຈຸບັນນີ້ ທາງເມືອງໄດ້ ໃຊ້ງົບປະມານເຂົ້າໃນການກຳຈັດ ແລ້ວທັງຫມົດ 100 ລ້ານກວ່າກີບ.
ທ່ານ ລັດຕະນະໄຊ ຄໍາສີດາ ເຈົ້າເມືອງໆງອຍໄດ້ລາຍງານ ໃຫ້ທີມຂ່າວພວກເຮົາຫວ່າງບໍ່ດົນນີ້ຮູ້ວ່າ: ຈາກການລົງສໍາຫຼວດເຫັນການລະບາດ ແລະການວາງໄຂ່ຂອງຕັກແຕນໃນເມືອງ ງອຍຈໍານວນ 7 ກຸ່ມ, ມີ 30 ບ້ານ, ມີ 92 ຈຸດ,ໃນນັ້ນໄດ້ສີດປາບປາມແລ້ວ 7 ກຸ່ມ, 25 ບ້ານ, 91 ຈຸດ, ກວມເນື້ອທີ່ 308,95 ເຮັກຕາ ແລະໄດ້ໃຊ້ແຮງງານປະຊາຊົນ ຂົນນໍ້າທັງໝົດ 1.379 ແຮງງານ, ໃຊ້ ຢາທັງໝົດ 107 ກ່ອງ.

ໂດຍຫລັກການສີດຢາມີຈໍານວນ ຄວາມໜາແໜ້ນຂອງຕັກແຕນແມ່ນ 42 ໂຕຕໍ່ຕາແມັດ, ອັດຕາການຕາຍແມ່ນ 48%  ສໍາລັບພືດທີ່ຕັກແຕນກິນມີໃບເຂົ້າອ່ອນ, ສາລີ, ແຂມ, ຫຍ້າອາຫານສັດ, ໃບໄມ້ປ່ອງ, ໃບກ້ວຍ ແລະພືດຊະນິດ ອື່ນໆ ຊຶ່ງທາງເມືອງໄດ້ໃຊ້ງົບປະມານ ໃນການລົງປາບຕັກແຕນທັງຫມົດ 100 ລ້ານກວ່າກີບແລ້ວ.

ສໍາລັບບັນຫາການລະບາດຂອງຕັກແຕນທີ່ທໍາລາຍຜົນຜະລິດຂອງປະຊາ ຊົນຊາວກະສິກອນເມືອງງອຍ ແລະກໍາ ລັງພ້ອມກັນລະດົມປາບປາມຕັກແຕນ ໃນປັດຈຸບັນນີ້ ໄດ້ມີເນື້ອທີ່ຄວາມເສຍ ຫາຍກວມຫຼາຍເຮັກຕາພໍສົມຄວນ ແຕ່ຍັງບໍ່ສາມາດປະເມີນຄວາມເສຍຫາຍໄດ້ ເທື່ອ ທ່ານເຈົ້າເມືອງກ່າວ

ຂ່າວ: ເສດຖະກິດ-ສັງຄົມ