ຄົນທີ່ເຮັດວຽກເປັນປະຈຳຈະຮູ້ດີວ່າໃນ 10 ນາທີທຳອິດ ຂອງທຸກໆວັນໃນຫ້ອງການ ຈະເປັນຕົວກຳນົດຄວາມສາມາດໃນການເຮັດວຽກຕະຫຼອດມື້ໄດ້ ພວກເຂົາຈະເຮັດບາງສິ່ງບາງຢ່າງກ່ອນການເຮັດວຽກໃນທຸກໆມື້ຢ່າງສະໝໍ່າສະເໝີ. ສະນັ້ນຫາກເຈົ້າຕ້ອງການຈະເປັນຄົນທີ່ມີປະສິດທິຜົນ ລອງເຮັດ 7 ວິທີນີ້ເບິ່ງຮັບຮອງໄດ້ຜົນດີຕໍ່ຕົວເອງ ແລະບໍລິສັດແນ່ນອນ.

1. ຂຽນ 3 ສິ່ງທີ່ເຮັດໃຫ້ທ່ານຮູ້ສຶກປະທັບໃຈ: ຈາກການວິໄຈຂອງມະຫາວິທະຍາໄລໄມອາມີ່ ກ່ຽວກັບການປະທັບໃຈ ພົບວ່າກຸ່ມຄົນທີ່ຂຽນບັນທຶກກ່ຽວກັບຄວາມປະທັບໃຈຂອງຕົວເອງ ມັກຈະມີຄວາມສຸກ ແລະມີປະສິດທິຜົນຫຼາຍກວ່າຄົນທົ່ວໄປ Sheryl towers ໂຄດຜູ້ຊ່ຽວຊານດ້ານການພັດທະນາຕົນເອງ ໄດ້ຂຽນໃນໜັງສື seeds of success ຂອງເຂົາວ່າ “ຜົນຂອງງານວິໄຈສະແດງໃຫ້ເຫັນວ່າການຂຽນບັນທຶກປະຈຳວັນກ່ຽວກັບຄວາມປະທັບໃຈຂອງຕົນເອງນັ້ນ ສົ່ງຜົນໃຫ້ລະຫວ່າງການເຮັດວຽກມີຄວາມຕື່ນຕົວ, ກະຕືລື້ລົ້ນ, ມຸ່ງໝັ້ນ, ຄິດໃນແງ່ບວກ ແລະມີພະລັງໃຈຫຼາຍຂຶ້ນ ແລະຍັງມີຄວາມເຄັ່ງຄຽດໜ້ອຍກວ່າຄົນທົ່ວໄປ ລວມທັງມີແນວໂນ້ມທີ່ຈະໃຫ້ການຊ່ວຍເຫຼືອຜູ້ອື່ນ ແລະມີຄວາມກ້າວໜ້າໃນການເຮັດວຽກຕາມເປົ້າໝາຍຫຼາຍກວ່າຄົນທົ່ວໄປ”
2. ຈັດໂຕະເຮັດວຽກໃຫ້ເປັນລະບຽບ: ຫາກເວົ້າເຖິງການຈະເຮັດໃຫ້ຕົນເອງເປັນຄົນທີ່ມີປະສິດທິຜົນ ຄົງບໍ່ມີຫຍັງຈະຂັດຂວາງໄດ້ ຖ້າເຈົ້າຕັ້ງໃຈເຮັດ, ແຕ່ເຈົ້າຕ້ອງຈັດໂຕະຕັ່ງໃຫ້ເປັນລະບຽບໂດຍໃຊ້ເວລາພຽງແຕ່ 10 ນາທີທໍາອິດກ່ອນຈະເຮັດວຽກ ເພື່ອຈັດແຈງໂຕະເຮັດວຽກຂອງເຈົ້າໃຫ້ເປັນລະບຽບ ແລະງ່າຍຕໍ່ການຫາສິ່ງຂອງຕ່າງໆ ທີ່ຕ້ອງໃຊ້ໃນເວລາເຮັດວຽກ.
3. ເວົ້າກັບເພື່ອນຮ່ວມງານ: ເຮົາຄວນເວົ້າທັກທາຍເພື່ອນຮ່ວມງານ ເວົ້າກັບເພື່ອນຮ່ວມງານໃນຫ້ອງການສິ່ງສຳຄັນອີກຢ່າງໜຶ່ງທີ່ຄວນຮູ້ໃນການຈະເປັນຄົນທີ່ມີປະສິດທິພາບຄື ເຈົ້າຄວນຮູ້ວ່າຄຳຖາມທີ່ເຈົ້າກຳລັງສົງໄສຢູ່ນັ້ນຄວນຖາມຫຼືບໍ່, ເຈົ້າຄວນພະຍາຍາມສ້າງຄວາມສຳພັນອັນດີກັບເພື່ອນຮ່ວມງານຂອງເຈົ້າ ເພາະຄົນທີ່ມີປະສິດທິຜົນຈະຮູ້ດີວ່າມິດຕະພາບນັ້ນສຳຄັນຫຼາຍປານໃດ.
4. ຂຽນເປົ້າໝາຍທີ່ສຳຄັນ 3 ອັນດັບທຳອິດທີ່ຕ້ອງເຮັດໃນແຕ່ລະວັນ: ຄົນທີ່ເຮັດວຽກມັກຈະຂຽນເປົ້າໝາຍທີ່ສຳຄັນ 3 ອັນດັບທຳອິດທີ່ເຂົາຕ້ອງເຮັດໃນແຕ່ລະວັນ ແລະຫາກພວກເຂົາເຮັດບໍ່ສຳເລັດ ກໍຈະຖືວ່າມື້ນັ້ນເປັນມື້ທີ່ມີຫຍັງຂາດຫາຍໄປ ຫຼືເປັນມື້ທີ່ບໍ່ສົມບູນແບບ, ການວາງແຜນເປົ້າໝາຍທີ່ສຳຄັນ ສາມາດຊ່ວຍໃຫ້ເຮົາຢູ່ກັບເລື່ອງທີ່ສຳຄັນໄດ້ເປັນຢ່າງດີ.
5. ທົບທວນລາຍການສິ່ງທີ່ຕ້ອງເຮັດຂອງເຈົ້າ: ເມື່ອເຈົ້າຈັດລຳດັບຄວາມສຳຄັນຕ່າງໆຮຽບຮ້ອຍ ເຈົ້າຄວນເບິ່ງວ່າສິ່ງທີ່ຢູ່ໃນລຳດັບສິ່ງທີ່ຕ້ອງເຮັດຂອງເຈົ້ານັ້ນມີຄວາມສອດຄ່ອງໄປໃນທິດທາງດຽວກັບເປົ້າໝາຍ ແລະຄວາມສຳຄັນຂອງວຽກທີ່ວາງໄວ້ ຫຼືບໍ່ ເພື່ອຄວາມສະດວກໃນການເຮັດວຽກ.
6. ຄິດເຫັນເປົ້າໝາຍຕົນເອງທຸກວັນ: ຄົນທີ່ມີປະສິດທິຜົນມັກເບິ່ງໂລກໃນແງ່ດີ ແລະມີຄວາມຫວັງຢູ່ສະເໝີ, ພວກເຂົາຈະບໍ່ໃຊ້ຊີວິດໄປວັນໆ ຢ່າງໝົດຫວັງແນ່ນອນ ເຂົາຈະເຮັດທຸກມື້ໃຫ້ເປັນມື້ທີ່ດີທີ່ສຸດ Matthew D. Dell Porta ຜູ້ຂຽນໜັງສື The How of Happiness ຂຽນວ່າ: “ການຄິດທົບທວນເປົ້າໝາຍຕົນເອງຖືເປັນການຊ່ວຍໃຫ້ສະໝອງຂອງເຈົ້າຄິດໃນແງ່ບວກ ມັນຊ່ວຍເຮັດໃຫ້ຄວາມຈິງຫຼາຍໆຢ່າງເຜີຍອອກມາຢ່າງຊັດເຈນຂຶ້ນ”
7. ອ່ານຄຳຄົມທີ່ຊ່ວຍເສີມສ້າງແຮງບັນດານໃຈ: ທຸກວັນເຈົ້າຄວນເຕີມພະລັງໃຈໃນການເຮັດວຽກດ້ວຍຄຳຄົມ ຫຼືວະລີເດັດໆ ຂອງບຸກຄົນທີ່ປະສົບຄວາມສຳເລັດກ່ອນທີ່ຈະຕັ້ງໜ້າຕັ້ງຕາເຮັດວຽກ , ຄົນທີ່ມີປະສິດທິຜົນມັກຈະຫາແຮງບັນດານໃຈຈາກບຸກຄົນທີ່ພວກເຂົາມັກ ດ້ວຍການອ່ານຄຳຄົມສ້າງແຮງບັນດານໃຈເຫຼົ່ານັ້ນ.

ໃນ 10 ນາທີທຳອິດຂອງມື້ ມັນສາມາດເປັນຕົວກຳນົດຄວາມມີປະສິດທິພາບໃນການເຮັດວຽກໝົດມື້ ຫາກເຈົ້າລອງເດີນຕາມເສັ້ນທາງຂອງຄົນທີ່ມີປະສິດທິຜົນທັງ 7 ຂໍ້ທີ່ກ່າວມາຂ້າງເທິງນັ້ນ ແລ້ວທຸກໆວັນຂອງເຈົ້າຈະມີຄວາມໝາຍ ແລະຊ່ວຍໃຫ້ເຈົ້າກາຍເປັນຄົນໜຶ່ງທີ່ປະສົບຄວາມສຳເລັດໄດ້ຢ່າງແນ່ນອນ.