ເນື່ອງຈາກສະພາບເສດຖະກິດ-ສັງຄົມມີການຂະຫຍາຍຕົວ ດ້ານການຄົມມະນາຄົມຂົນສົ່ງກໍໄດ້ຮັບການພັດທະນາເປັນກ້າວໆ ເພື່ອເປັນການເວັ້ນບັນຫາການສັນຈອນແອອັດ ໃນສະຖານີຂົນສົ່ງຜູ້ໂດຍສານສາຍໃຕ້ ແລະຕ່າງປະ ເທດແຫ່ງເກົ່າ ເຊິ່ງສະຖານີຂົນສົ່ງຜູ້ໂດຍສານທາງໄກສາຍໃຕ້ ແລະຕ່າງປະເທດແຫ່ງໃໝ່ ຈະເປີດໃຫ້ບໍລິການຢ່າງເປັນທາງການໃນຕົ້ນເດືອນກັນຍານີ້ ພ້ອມຫວັງຈະສ້າງ ຄວາມສະດວກໃຫ້ແກ່ປະຊາຊົນຜູ້ໂດຍສານຫຼາຍຂຶ້ນ.
ທ່ານ ວັນເພັນ ສີສຸກ ຮອງອຳນວຍການສະຖານີຂົນສົ່ງຜູ້ໂດຍສານສາຍໃຕ້ ແລະສາຍຕ່າງປະເທດ ໃຫ້ສຳພາດວ່າ: ໂຄງການກໍ່ສ້າງສະຖານີຂົນສົ່ງຜູ້ໂດຍສານສາຍໃຕ້ ແລະສາຍຕ່າງປະເທດ ແຫ່ງໃໝ່ໄດ້ລົງມືກໍ່ສ້າງມາເປັນເວລາ 2 ປີກວ່າແລ້ວ ປະຈຸບັນສຳເລັດ 95% ມູນຄ່າການກໍ່ສ້າງ 50 ຕື້ກວ່າກີບ ໂດຍ ປັນໂຄງການສຳປະ ທານເນື້ອທີ່ 3 ກວ່າ ເຮັກຕາ, ອາຍຸການສຳປະທານແມ່ນ 40 ປີ ສາມາດຕໍ່ຕື່ມສັນຍາໄດ້ເທື່ອລະ 5 ປີ ຊຶ່ງໂຄງສ້າງໄດ້ອອກແບບທັນສະໄໝ ແລະໃຫຍ່ກວ່າເກົ່າ, ມີລະບົບຮັກສາຄວາມປອດໄພ ໂດຍຜ່ານປະຕູດຽວ, ອາຄານເປັນຕຶກ 2 ຊັ້ນຄື: ຊັ້ນທີ 1 ແມ່ນປະກອບມີບ່ອນຂາຍປີ້ລົດຂອງບັນດາບໍລິສັດ, ຮ້ານມິລິມາກ ແລະຮ້ານຂາຍເຄື່ອງ ກິນຕ່າງໆ, ສ່ວນຊັ້ນທີ 2 ແມ່ນເປັນຫ້ອງການ.
ສະຖານີຂົນສົ່ງຜູ້ໂດຍສານສາຍໃຕ້ ແລະຕ່າງປະເທດແຫ່ງໃໝ່ແມ່ນຕັ້ງຢູ່ບ້ານສະພັງເມິກ ເມືອງໄຊທານີ ນະຄອນຫຼວງວຽງຈັນ ໂດຍຫ່າງຈາກສະຖານີເກົ່າທີ່ຕັ້ງຢູ່ ບ້ານຊ້າງຄູ່ໄປທາງເສັ້ນທາງ 450 ປີ ປະມານ 700 ແມັດ, ສະຖານີແຫ່ງໃໝ່ ຈະສາມາດສ້າງຄວາມສະດວກສະບາຍ ແກ່ຜູ້ໂດຍສານ ສາມາດຫຼຸດຜ່ອນຄວາມແອອັດຈາກເມື່ອກ່ອນໄດ້ຢ່າງຊິ້ນເຊີງ, ສາມາດຮອງຮັບລົດເມໄດ້ 100 ກວ່າຄົນ, ສ່ວນລົດທີ່ມາສົ່ງຜູ້ໂດຍສານຮັບໄດ້ ປະມານ 120 ຄັນ ຢູ່ດ້ານໜ້າຂອງສະຖານີ
ໃນໂອກາດນີ້ ທ່ານ ວັນເພັນ ສີສຸກ ໄດ້ຮຽກຮ້ອງມາຍັງພໍ່ແມ່ປະຊາຊົນ, ພະນັກງານຜູ້ໂດຍສານທຸກຊັ້ນຄົນ ພ້ອມກັນໄປໃຊ້ບໍລິການຢູ່ສະຖານີແຫ່ງໃໝ່ ເພື່ອເປັນລະບົບລະບຽບຫຼຸດຜ່ອນຄວາມແອອັດ ທັງນີ້ ສະຖານີແຫ່ງເກົ່າແມ່ນ ຈະໄດ້ປິດການໃຫ້ບໍລິການແຕ່ວັນທີ 31 ສິງຫາ 2016 ເປັນຕົ້ນໄປ, ສ່ວນສະຖານີຂົນສົ່ງຜູ້ໂດຍສານແຫ່ງ ໃໝ່ ແມ່ນຈະເປີດໃຫ້ບໍລິການຢ່າງເປັນທາງການໃນ ວັນທີ 1 ກັນຍາ 2016 ນີ້, ຊຶ່ງວ່າລາຄາຄ່າຜູ້ໂດຍສານທີ່ໃຊ້ບໍລິການແມ່ນຍັງຢູ່ ລະດັບເກົ່າບໍ່ມີຂຶ້ນ ແລະບໍ່ມີລົງ
ຂ່າວ: ເສດຖະກິດ-ສັງຄົມ