ນາງ ແລນລີ່ ພຸດທະວົງ ໜຶ່ງໃນທັບນັກກິລາລາວ ທີ່ເຂົ້າຮ່ວມ ງານມະຫະກຳກິລາ ໂອລິມປິກ 2016 ທີ່ປະເທດ ບຣາຊິນ ໄດ້ລົງສະໜາມແຂ່ງຂັນ ເປັນຄັ້ງທຳອິດ ໃນຕອນບ່າຍຂອງມື້ວານນີ້ ວັນທີ 12 ສິງຫາ 2016 ເວລາ 12:02 ໂມງ (ເວລາໃນປະເທດ ບຣາຊິນ ເຊິ່ງເປັນຕອນກາງຄືນຂອງວັນທີ 12/08/2016 ເວລາຂອງບ້ານເຮົາ).
ແລນລີ່ ພຸດທະວົງ ໄດ້ລົງແຂ່ງຂັນ ກິລາແລ່ນ-ລານ ໃນລາຍການແຂ່ງຂັນ ແລ່ນ 100 ແມັດຍິງ ມີຜູ້ເຂົ້າຮ່ວມແຂ່ງຂັນ ໃນລາຍການນີ້ທັງໝົດ 24 ຄົນ ແລະ ໄດ້ແບ່ງເປັນ 3 heat (3 ກຸ່ມ) ເຊິ່ງ ແລນລີ້ ພຸດທະວົງ ລົງແຂ່ງຢູ່ໃນ heat ທີ 2 ເຊິ່ງລາວສາມາດ ແລ່ນເຂົ້າເສັ້ນໄຊ ດ້ວຍເວລາ 12.82 ວິນາທີ ເປັນອັນດັບທີ 7 ຂອງ heat ທີ 2 ແລະ ເປັນອັນດັບ 16 ຂອງການແຂ່ງຂັນ ລາຍການນີ້.
ຈາກການເປີດເຜີຍຂອງ ແລນລີ່ ພຸດທະວົງ ໄດ້ໃຫ້ຮູ້ວ່າ ຜົນຂອງການແຂ່ງຂັນຄັ້ງນີ້ ເຖິງແມ່ນລາວ ຈະບໍ່ສາມາດຜ່ານ ການຄັດເລືອກເຂົ້າໄປໃນ ຮອບຕໍ່ໄປໄດ້ ແຕ່ລາວກໍ່ມີຄວາມດີໃຈ ແລະ ພູມໃຈທີ່ໄດ້ລົງແຂ່ງຂັນ ໃນນາມນັກກິລາ ທີມຊາດລາວ ແລະ ເວລາທີ່ລາວ ສາມາດເຮັດໄດ້ ໃນການແລ່ນໃນລາຍການ 100 ແມັດຍິງຄັ້ງນີ້ ແມ່ນໄດ້ທຳລາຍສະຖິຕິ ຂອງຕົນເອງ ທີ່ເຄີຍເຮັດໄວ້ 12.89 ວິນາທີ ໃນການແຂ່ງຂັນລາຍການແລ່ນ 100 ແມັດຍິງ ງານມະຫາກຳກິລາ ມະຫາວິທະຍາໄລ ອາຊຽນ ຄັ້ງທີ 18 ທີ່ປະເທດ ສິງກະໂປ ໄດ້ສຳເລັດ
ຖືວ່າເປັນອີກໜຶ່ງ ຄວາມພາກພູມໃຈຂອງ ທັບນັກກິລາລາວ ກໍ່ຄືຄົນລາວທັງຊາດ ທີ່ໄດ້ເຫັນຕົວແທນ ຂອງປະເທດຊາດ ເຂົ້າຮ່ວມການແຂ່ງຂັນ ໃນມະຫະກຳກິລາ ໂອລິມປິກ 2016 ທີ່ປະເທດ ບຣາຊິນ ເຖິງວ່າຈະບໍ່ສາມາດ ຍາດເອົາໄຊຊະນະມາໄດ້ ແຕ່ວ່າ ແລນລີ່ ພຸດທະວົງ ແລະ ນັກກິລາລາວທຸກຄົນ ກໍ່ສາມາດເອົາຊະນະ ໃຈຄົນລາວທຸກຄົນ ຢູ່ແລ້ວ.
ແຫລ່ງຂ່າວໄດ້ມາຈາກ : http://laosportnews.com