ຂປລ. ໃນວັນທີ 12 ສິງຫາ 2016 ນີ້ ທີ່ນະຄອນຫລວງວຽງຈັນ, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ດານຽນ ຣັດເຊວ (Daniel Russel) ຜູ້ຊ່ວຍລັດຖະມົນຕີ ກະຊວງການຕ່າງປະເທດ ສະຫະລັດອາເມລິກາ, ທັງສອງຝ່າຍ ໄດ້ປຶກສາຫາລືກັນ ດ້ານເນື້ອໃນ ເພື່ອເປັນການກະກຽມ ໃຫ້ແກ່ການເດີນທາງມາຢ້ຽມຢາມ ສປປ ລາວ ຄັ້ງປະຫວັດສາດ ແລະ ເຂົ້າຮ່ວມກອງປະຊຸມສຸດຍອດ ອາຊີຕາເວັນອອກສຽງໃຕ້ (ອາຊຽນ) ຂອງປະທານາທິບໍດີ ສະຫະລັດອາເມລິກາ ໃນຕົ້ນເດືອນກັນຍາ 2016 ນີ້.
ສອງຝ່າຍໄດ້ມີຄວາມເຫັນເປັນເອກະພາບກັນວ່າ ການພົວພັນຮ່ວມມື ຂອງສອງປະເທດ ມີທ່ວງທ່າຂະຫຍາຍຕົວດີຂຶ້ນ, ພ້ອມນີ້ ສອງຝ່າຍໄດ້ລົງເລິກ ປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນ ຢ່າງກວ້າງຂວາງ ກ່ຽວກັບບັນຫາຕ່າງໆ ທີ່ນອນຢູ່ໃນຂອບການຮ່ວມມືເຊັ່ນ: ວຽກງານການຊອກຄົ້ນຫາ ສິ່ງເສດເຫລືອ ຂອງທະຫານອາເມລິກາ ທີ່ຫາຍສາບສູນ ໃນປາງສົງຄາມ (MIA) ການເກັບກູ້ລະເບີດ ທີ່ບໍ່ທັນແຕກ (UXO), ການຮ່ວມມື ດ້ານສາທາລະນະສຸກ, ການສຶກສາ ແລະ ວັດທະນະທຳ, ນັບທັງການຊຸກຍູ້ສົ່ງເສີມ ການພົວພັນຮ່ວມມື ດ້ານການຄ້າ-ການລົງທຶນ ລະຫວ່າງ ສອງປະເທດ.
ນອກຈາກນັ້ນ, ທັງສອງຝ່າຍ ຍັງໄດ້ປຶກສາຫາລືກ່ຽວກັບ ບັນຫາສະພາບການ ພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈ ເປັນຕົ້ນແມ່ນ ການເປັນປະທານອາຊຽນ ຂອງ ສປປ ລາວ.
ແຫລ່ງຂ່າວ:
