ທ່ານ ດຣ.ລຽນ ທິແກ້ວ ກໍາມະການສູນກາງພັກ ລັດຖະມົນຕີວ່າການກະຊວງການເງິນ ໄດ້ພົບປະ ໂອ້ລົມການນໍາພະແນກການກົມກອງ, ຂະແໜງການກ່ຽວຂ້ອງຂອງແຂວງ ແລະ ເມືອງ ເພື່ອຊຸກຍູ້ການ ຈັດເກັບລາຍຮັບເຂົ້າງົບປະມານໃນ 3 ເດືອນທ້າຍປີສົກງົບປະມານ 2013-2014 ໃຫ້ບັນລຸຕາມຄາດໝາຍ ທີ່ວາງໄວ້.
ການພົບປະໂອ້ລົມຄັ້ງນີ້ມີຂຶ້ນໃນວັນທີ 3 ກໍລະກົດ 2014 ທີ່ຜ່ານມາ ຢູ່ພະແນກການເງິນແຂວງ ຈໍາປາສັກ, ໃນການພົບປະທ່ານ ລຽນ ທິແກ້ວ ໄດ້ຮັບຟັງການລາຍງານສະພາບການຕົວຈິງໃນ ການຈັດຕັ້ງປະຕິບັດຈັດເກັບງົບປະມານ ຊຶ່ງໃນ 9 ເດືອນແຂວງຈໍາປາສັກປະຕິບັດລາຍຮັບໄດ້ທັງໝົດ 760,90 ຕື້ກີບ, ໃນນັ້ນລາຍຮັບຈາກການຂາຍໄມ້ 12,12 ຕື້ກີບ, ລາຍຮັບປົກກະຕິ 748,78 ຕື້ກີບ, ທຽບໃສ່ແຜນການ(1.060,15 ຕຶ້ກີບ) ເທົ່າກັບ 70,63%, ທຽບໃສ່ແຜນການ 9 ເດືອນ ເທົ່າກັບ 89%, ທຽບໃສ່ໄລຍະດຽວຂອງປີກ່ອນເພີ່ມຂຶ້ນ 19%, ພ້ອມນີ້ກໍ່ໄດ້ຮັບຟັງການລາຍງານທິດທາງແຜນການຄາດຄະເນ 3 ເດືອນທ້າຍປີສົກງົບປະມານ 2013-2014 ຊຶ່ງລາຍງານໂດຍທ່ານ ໄພທູນ ສີພູມມາ ຮອງຫົວໜ້າພະແນກການເງິນແຂວງ.
ຈາກນັ້ນທ່ານ ລຽນ ທິແກ້ວ ກໍ່ໄດ້ໃຫ້ກຽດໂອ້ລົມ, ເນື້ອໃນສໍາຄັນບາງຕອນທ່ານກ່າວວ່າ: ໃນທີ່ຜ່ານມາການວາງແຜນຈັດເກັບລາຍຮັບເຂົ້າງົບປະມານເຫັນວ່າສູງກ່ວາຖານລາຍຮັບຈິງບວກກັບຄວາມບໍ່ໂປ່ງໃສໃນການປະຕິບັດໜ້າທີ່ຂອງພະນັກງານ ແລະ ຄວາມບໍ່ຈິງໃຈໃນການມອບພັນທະອາກອນຂອງຫົວໜ່ວຍທຸລະກິດຈໍານວນໜຶ່ງ ຈິ່ງເຮັດໃຫ້ລາຍຮັບງົບປະມານຮົ່ວໄຫລ ແລະ ບໍ່ບັນລຸຕາມຄາດໝາຍທີ່ວາງໄວ້, ຈາກນັ້ນທ່ານຈິ່ງໄດ້ເນັ້ນໃຫ້ຄະນະນໍາທຸກພະແນກການກົມກອງ, ຂະແໜງການທີ່ກ່ຽວຂ້ອງ ຂອງແຂວງ ແລະ ເມືອງທີ່ມີຄວາມຮັບຜິດຊອບໂດຍກົງໃນການຈັດເກັບລາຍຮັບເຂົ້າງົບປະມານຕ້ອງເອົາໃຈ ໃສ່ສຶກສາອົບຮົມການເມືອງ-ແນວຄິດຂອງພະນັກງານລັດຖະກອນທີ່ຢູ່ໃນຄວາມຮັບຜິດຊອບຂອງຕົນໃຫ້ມີ ສະຕິຮັກຊາດ, ມີຄຸນສົມບັດສິນທໍາປະຕິວັດ ແລະ ມີຄວາມຊື່ສັດໃນການປະຕິບັດໜ້າທີ່ວຽກງານ, ເອົາໃຈໃສ່ ການຄຸ້ມຄອງລາຍຮັບ-ລາຍຈ່າຍໃຫ້ຖືກຕ້ອງຕາມລະບຽບກົດໝາຍ ພ້ອມທັງເອົາໃຈໃສ່ເຂັ້ມງວດກວດກາ ຕີລາຄາປະເມີນຜົນການເຄື່ອນໄຫວວຽກງານຂອງພະນັກງານວິຊາການທີ່ກ່ຽວຂ້ອງ ເພື່ອຕ້ານ ແລະ ສະກັດ ກັ້ນການຮົ່ວໄຫວຂອງງົບປະມານ, ຈາກນັ້ນກໍ່ເອົາໃຈໃສ່ປະສານສົມທົບກັບພະແນກການກົມກອງຕ່າງໆ ອ້ອມຂ້າງແຂວງ ແລະ ເມືອງໃຫ້ເປັນເຈົ້າການປະກອບສ່ວນຢ່າງຈິງຈັງໃນການຈັດເກັບລາຍຮັບເຂົ້າງົບປະ ມານ, ສໍາຫຼວດກວດກາ ແລະ ໄລ່ລຽງຄືນກ່ຽວກັບການມອບພັນທະອາກອນຂອງບັນດາຫົວໜ່ວຍທຸລະກິດ, ລັດວິສາຫະກິດຕ່າງໆ ວ່າມີຄວາມຖືກຕ້ອງເໝາະສົມກັບລາຍຮັບຕົວຈິງຫຼືບໍ່ ໂດຍສະເພາະແມ່ນວິສາຫະກິດ ທີ່ນໍາເຂົ້າພາຫະນະ ຊຶ່ງໃນທີ່ຜ່ານມາເຫັນວ່າການມອບພັນທະອາກອນບໍ່ຖືກຕ້ອງກັບຄວາມເປັນຈິງ ແລະ ຫົວໜ່ວຍທຸລະກິດອື່ນໆກໍ່ຕ້ອງມີການໄລ່ລຽງໃຫ້ຖືກຕ້ອງເຊັ່ນກັນ, ທັງນີ້ກໍ່ເພື່ອເຮັດໃຫ້ການຈັດເກັບລາຍຮັບ ເຂົ້າງົບປະມານໃນ 3 ເດືອນທ້າຍປີ ສົກ 2013-2014 ໃຫ້ບັນລຸຕາມແຜນການທີ່ວາງໄວ້.
ໃນພິທີມີຫົວໜ້າກົມ, ຮອງກົມທີ່ກ່ຽວຂອງຈາກກະຊວງການເງິນ, ມີການນໍາຈາກພະແນກການເງິນ ແຂວງ, ພະແນກສ່ວຍສາອາກອນແຂວງ, ພາສີປະຈໍາເຂດ IV, ພາສີດ່ານສາກົນວັງ, ຂະແໜງການສາຍ ຕັ້ງອ້ອມຂ້າງພະແນກການເງິນແຂວງ ແລະ ການນໍາຫ້ອງການໆເງິນ 10 ຕົວເມືອງ ກໍ່ໄດ້ເຂົ້າຮ່ວມ.
ຂ່າວ-ພາບ: ທູນທອງໃຈ